Abraham naSara ova li va dulika kuKalunga

Moshilando Ur, osho sha li popepi naBabel, omwa li ovanhu hava longele oikalunga ihapu. Ashike muUr omwa li omulumenhu wedina Abraham, oo a li ha longele Jehova.

Jehova okwa li a lombwela Abraham ta ti: ‘Fikama, dja mo mepata leni nomeumbo leni u ye koshilongo eshi handi shi ku ulikile.’ Okwa udanekela yo Abraham a ti: ‘Oto ka ninga oshiwana shinene, ndele ohandi ka ningila ovanhu vahapu oinima iwa kombada yedu omolwoye.’

Nonande Abraham ka li e shii konhele oko Jehova a li te mu tumu, okwa li e lineekela muYe. Onghee hano, Abraham nomukulukadi waye Sara, xe Tera nosho yo omutekulu waAbraham, Lot, ova li va longela oinima yavo ndele tava i molweendo lile.

Eshi Abraham novaneumbo laye va fika moshilando osho Jehova a li a hala oku va ulikila, okwa li e na omido 75. Oshilando osho osha li hashi ifanwa Kanaan. Kalunga okwa li a popya naAbraham ofimbo ve li moshilando osho noku mu udanekela a ti: ‘Edu alishe eli le ku dingilila, ohandi ke li yandja koludalo loye.’ Ashike pefimbo opo Abraham naSara ova li va kulupa nokava li ve na ounona. Ongahelipi Jehova a li ta ka wanifa po eudaneko olo?