Oumati va dalwa epasha, ndele inava faafana

OUMATI vavali ovo ve li mefano olo li li pedu inava yoolokafana mbela? Mbela ou shii omadina avo? Omumati ou womukongo edina laye oEsau. Omumati oo ta lifa eedi oJakob.

Oumati ovo, Esau naJakob, ova dalwa epasha kuIsak naRebekka. Isak okwa li e hole Esau neenghono, molwaashi okwa li omukongo muwa nokwa li ha eta ombelela meumbo. Ndele Rebekka okwa li e hole unene Jakob, molwaashi Jakob okwa li a ngungumana nomunambili.

Pefimbo olo ovamati ovo va li tava kulu, xekulu yavo Abraham okwa li natango e na omwenyo. Diladila ashike kunghee Jakob a li ha kala e udite eshi ta hokololelwa kuAbraham shi na sha naJehova. Lwanima, Abraham okwa ka fya e na omido 175. Eshi a fya, ovamati ovo ova li ve na omido 15.

Eshi Esau a li e na omido 40, okwa hombola ovakainhu vavali Ovakanaan. Ndele osho osha li sha nyemateka neenghono Isak naRebekka, molwaashi ovakainhu ovo kava li hava longele Jehova.

Efiku limwe, Jakob okwa li a ninga oshinima shimwe osho sha li sha handukifa Esau neenghono. Pefimbo opo, Isak okwa li a hala okunangeka noupuna omonamati waye ou womukulunhu kumukwao. Esau okwa li a teelela okupewa omanangeko noupuna oo, molwaashi oye a li omukulunhu kuJakob. Ndelenee Esau okwa hangwa a landifa po nale oufemba waye kuJakob wokumona omanangeko noupuna. Kakele kaasho, Kalunga okwa li a udaneka pefimbo olo ovamati ovo tava dalwa kutya Jakob oye a li ta ka pewa omanangeko noupuna. Onghee hano, Isak okwa li a nangeka noupuna Jakob ponhele yaEsau.

Eshi Esau e ke shi uda, okwa li a handukila Jakob neenghono. Okwa li nokuli a hala okudipaa Jakob. Rebekka okwa li a nyemata neenghono eshi a uda kutya Esau okwa hala okudipaa omumwaina. Onghee hano, Rebekka okwa lombwela omushamane waye Isak a ti: ‘Otashi ka kala shinyemateka neenghono ngeenge Jakob naye okwa hombola omukainhu Omukanaan.’

Opo nee Isak okwa ifana omonamati waye Jakob ndele ta ti kuye: ‘Ino hombola nande omukainhu Omukanaan. Ponhele yaasho, inda keumbo laxokulu Betuel kuHaran, ndele to hombola umwe womovanakadona vaLaban, omona waBetuel.’

Jakob okwa li a pwilikina kuxe, nokwa ya molweendo lile okuya kuHaran oko kwa li ovapambele vaye.