Jakob naEsau tava pange ombili

Jehova okwa li a udanekela Jakob kutya ote ke mu amena ngaashi ashike a li a amena Abraham naIsak. Jakob okwa kala hadi muHaran, nomo a hombolela. Okwa li e na ovaneumbo vahapu nokwa li a ninga oshipuna.

Lwanima, Jehova okwa ka lombwela Jakob a ti: ‘Shuna koshilongo sheni nokepata leni.’ Opo nee Jakob novaneumbo laye ova li va ya molweendo lile lokushuna. Fimbo ve li molweendo, ova li va shakeneka ovanhu vonhumba, ndele tava lombwele Jakob tava ti: ‘Omumwanyoko Esau ote uya e ku shakeneke novalumenhu 400 pamwe naye.’ Jakob okwa li a tila, nokwa li ta diladila kutya pamwe Esau ote mu dipaa nokuhanauna po oukwaneumbo waye. Nomolwaasho okwa li a ilikana kuJehova a ti: ‘Alikana, xupife nge meke lomumwameme.’ Efiku la shikula ko, Jakob okwa li a tumina Esau eeshali dihapu ngaashi eedi, oikombo, eengobe, eengamelo nosho yo eendongi.

Oufiku oo tuu oo, ofimbo Jakob a li oye aeke okwa li a mona omweengeli. Omweengeli oo okwa li a hovela okukondja naye, nova li va kondja fiyo osheshi taku hale okusha. Nonande Jakob okwa li a ehamekwa, ka li a sholola. Omweengeli okwa li e mu lombwela a ti: ‘Efe nge ndi ye.’ Ndele Jakob ta nyamukula ta ti: ‘Itandi ku efa fimbo ino nangeka nge noupuna.’

Hauxuuninwa, omweengeli oo okwa li a nangeka noupuna Jakob. Okudja opo, Jakob okwa li e shii kutya Jehova ka li ta ka efa Esau e mu ehameke.

Ongula oyo tuu oyo, Jakob okwa li a monena Esau kokule e li pamwe novalumenhu 400. Jakob okwa li a tetekela komesho ovaneumbo vaye ndele ta twile mumwaina eengolo lwoikando iheyali. Esau okwa li a tondoka a yuka kuJakob ndele te mu papatele. Opo nee aveshe vavali ova lila ndele tava pange ombili. Mbela oto diladila kutya Jehova okwa li e uditile ngahelipi onghedi omo Jakob a li ungaunga nonghalo oyo?

Konima yaasho, Esau naJakob ova shuna komaumbo avo. Jakob okwa li e na ovanamati 12; omadina avo, Ruben, Simeon, Levi, Juda, Dan, Naftali, Gad, Asser, Isaskar, Sebulon, Josef naBenjamin. Ondenge yavo Josef, oya li ya longifwa kuJehova opo i xupife oshiwana shaYe. Mbela ou shii kutya osha enda ngahelipi? Natu ka taleni kutya omolwashike.