Moses ta denge emanya

OVAISRAEL onghee ngoo va kala tava elaela mombuwa fiyo omido da ninga 10, 20, 30 fiyo 39. Ndele Jehova okwa kala te va file oshisho oule womido adishe odo. Okwa kala te va palula nomanna. Omutenya okwa li he va kwatele komesho noshilemo shomudile, ofimbo oufiku a li he va kwatele komesho noluudi lomundilo. Oule womido adishe odo, oikutu yavo neenghaku davo inai kulupa nande.

Momwedi wotete momudo omuti-40, Ovaisrael ova li natango va onga onhanda muKades. Dimbulukwa kutya eshi va li muKades oshikando shotete, eshi opo va di muEgipti, Moses okwa li a tuma eendadi 12 di ka lave edu laKanaan. Omumwainakadona waMoses, Miriam, okwe uya okufila muKades. Ngaashi nale, opa li pa holoka natango oupyakadi muKades.

Ovanhu kava li ve na omeva okunwa. Onghee hano, ova li tava ngongotele Moses, tava ti: ‘Oshixwepo ashike ngeno otwa file nale. Omolwashike we tu kufa muEgipti ndele to tu eta mombuwa omu ihamu mene nande osha? Kamu na oilya, eenghwiyu, omandjebele ile oiimati imwe i lili. Kamu na nokuli nomeva okunwa.’

Eshi Moses naAron va ka ilikana kuJehova ketwali, Jehova okwa lombwela Moses a ti: ‘Ongela oshiwana ashishe. Ndele to ka popya nemanya linya moipafi yavo. Opo nee memanya olo otamu ka dja omeva a wana okunuwa kovanhu nokoinamwenyo aishe.’

Moses okwa ongela oshiwana ashishe ngaashi Jehova e mu lombwela. Opo nee okwa tya kuvo: ‘Pwilikineni nye ava inamu lineekela Kalunga! Natu mu kungulukifile omeva okudja memanya eli, fye naAron? Opo nee Moses okwa denga emanya nonhaili yaye lwoikando ivali nomeva okwa hovela okukunguluka neenghono okudja memanya olo. Omeva oo okwa li a wana ovanhu noinamwenyo yavo aishe.

Ndelenee Jehova okwa li a handukila Moses naAron. Mbela ou shi shii kutya omolwashike? Omolwaashi Moses naAron ova lombwela ovanhu kutya ovo tave ke va kungulukifila omeva okudja memanya. Ndele paulelalela, Jehova oye a li a longa oshikumwifilonga osho. Molwaashi Moses naAron kava li va popya oshili moshinima osho, Jehova okwe va lombwela kutya ote ke va handukila. Okwa ti kuvo: ‘Itamu ka twala oshiwana shange medu laKanaan.’

Konima yokafimbo, Ovaisrael ova li va fiya po Kades ndele tava ka onga onhanda oule wokafimbo pomhunda yaHor. Aron okwa fila koxulo yomhunda oyo. Okwa fya e na omido 123. Ovaisrael ova li va nyika oluhodi neenghono omolwefyo laAron, nove mu lila oule womafiku 30. Aron okwa li a pingenwa po komonamati waye Eleasar, sha hala okutya, Eleasar oye a li a ninga omupristeri omukulunhu woshiwana shaIsrael.