Omapulo a dja kovaleshi
Ngeenge Jehova okwa dilika okulongela oikalunga, omolwashike a li ina katukila Aron onghatu ya kwata moiti eshi a ninga onhana yoshingoli?
Eshi Aron a li a ninga onhana yoshingoli, ngaashi tashi hokololwa metukulwa 32 laExodus, okwa li a nyona oshipango shaKalunga kutya inava longela oikalunga. (Ex. 20:3-5) Nomolwaasho, ‘Omwene okwa handukila unene Aron, onghee okwa li a hala oku mu dima po. Ndelenee Moses okwa ilikanena Aron mefimbo linya.’ (Deut. 9:19, 20) Mbela eilikano lomulumenhu omuyuki Moses olo a ilikanena Aron ola li la ‘dula shihapu?’ (Jak. 5:16) Osha yela kutya Jehova ka li a katukila Aron onghatu ya kwata moiti molwaashi okwa li a uda eilikano laMoses, nomolwomatomheno amwe avali a wedwa po.
Etomheno limwe molwaashi Aron ina katukilwa onghatu omolwaashi okwa li omudiinini. Eshi Moses a li a lombwelwa a holoke koshipala shaFarao noku mangulule oshiwana shaIsrael okudja muEgipti, Jehova okwa li a hoolola Aron a ye pamwe naMoses ve li ovapopikalelipo vaye. (Ex. 4:10-16) Ovalumenhu ovo vavali ova li va dulika. Ova li va mona oixuna eshi va li hava i lwoikando kohamba yaEgipti, Farao, oo a li a kukutika omutima waye. Onghee hano, osha yela kutya Aron okwa li a longela Jehova noudiinini ofimbo va li muEgipti. — Ex. 4:21.
Natu tale yo kutya oshike sha li sha ningifa Aron a ninge onhana yoshingoli. Moses okwa li a kala komhunda yaSinai oule womafiku 40. “Ovanhu eshi va mona nokutya, Moses okwa kala ko, ina dja ko komhunda,” ova li va fininika Aron e va ningile oshikalunga. Aron okwa li a itavela ndele te va ningile onhana yoshingoli. (Ex. 32:1-6) Eenghatu odo Aron a ka katuka lwanima otadi ulike kutya ka li a panda oshinima osho a ningifwa kovanashibofa ovo va li va hala okuningilwa oshikalunga, ndele osha yela kutya okwa li e liyandja omolwokufininikwa. Eshi Moses a li a ungaunga noshinima osho, ovana vaLevi, mwa kwatelwa Aron, ova li ve liameka kuJehova. Ovanhu 3 000 ovo va li ve na ondjo inene moshinima osho ova li va dipawa. — Ex. 32:25-29.
Konima yefimbo, Moses okwa li a lombwela oshiwana ashishe a ti: “Nye mwa nyona unene.” (Ex. 32:30) Osho otashi ulike kutya Aron haye aeke a li e na ondjo moshinima osho. Aron nosho yo oshiwana shaIsrael ova li va filwa onghenda inene kuJehova.
Konima yoshiningwanima osho shi na sha nokwiilikana onhana yoshingoli, Jehova okwa li a lombwela Moses a nangeke po Aron e li omupristeri omukulunhu. Okwa li a lombwela Moses a ti: “Dika Aron oikutu iyapuki, ndele u mu vaeke noku mu yapula, opo a shiive okulongela nge moshilonga shoupristeri.” (Ex. 40:12, 13) Nopehe na omalimbililo, Jehova okwa li a dimina po Aron omolwepuko olo a li a ninga. Paulelalela, Aron ka li a lalakanena okulongela oikalunga; okwa li omudiinini kelongelokalunga lashili.