Omwenyo mOunyuni Mupe wOmbili

Ngee to tale kemoniko lokombada yokafo aka, ou na omaliudo a tya ngahelipi? Omutima woye itau djuulukwa nee ombili, elao nehepuluko olo li wetike omo? Osho naanaa shili. Ndelenee kashi fi ashike ondjodi, ile ongano, okwiitavela kutya onghalelo ei onai ka kala kombada yedu efiku limwe?

Kashiimba ovanhu vahapu osho tava diladila ngaho. Oulela wonena oo oita, enyono, ondjala, oudu, oukulupe—okutumbula po ashike imwe. Ndelenee ope na etomhelo okukala neteelelo. Mokutala monakwiiwa, Ombibeli otai tu hokololele kombinga ‘yeulu lipe nedu lipe olo hatu teelele paudaneko la[Kalunga] omo tamu ka kala ouyuki.’—2 Petrus 3:13; Jesaja 65:17.

Pambibeli, “eulu lipe nedu lipe” eli kali fi eulu lipe lopaushitwe ile edu lipe lo venevene. Edu neulu lopaushitwe ola ningwa la wanenena, nOmbibeli otai holola kutya otaa ka kala fiyo alushe. (Epsalme 89:37, 38; 104:5) “Edu lipe” otali ka kala oulikumwe uyuki wovanhu tava kala nomwenyo kombada yedu, ‘neulu lipe’ otali ka kala ouhamba wopaulu wa wanenena, ile epangelo, olo tali ka pangela ombada youlikumwe oo wopedu wovanhu. Ndelenee oshi li tuu pandunge okwiitavela kutya “edu lipe,” ile ounyuni mupe woshinge otau dulika?

Ndee, diladila kombinga youshili kutya onghalelo iwa ya tya ngaho oya li ombinga yomhangela yotete yaKalunga kedu eli. Ye okwa tula ovanhu ovalihomboli vavali votete mOparadisa yedu yaEden nokwe va pa oshilonga shikumwifi: “Dalafaneni nokuhapupala ndee yadifeni edu, lo nali kale mepangelo leni.” (Genesis 1:28) Heeno, omhangela yaKalunga kuvo oya li opo vo va mone ounona ndee xuuninwa okutandavelifa Oparadisa yavo kombada yedu alishe. Nonande konima vo va hoolola okuhadulika kuKalunga, nomolwaasho okuliulika kutya vo inava wana okukala fiyo alushe, omhangela yaKalunga yotete inai lunduluka. Ndee yo oi na okuwanifwa mounyuni mupe!—Jesaja 55:11.

Shoshili, ngeenge to ilikana Eindilo lOmwene, ile Tate Yetu U Li mEulu, mokwiindila Ouhamba waKalunga nau uye, oto indile epangelo laye lopaulu li kufe po oukolokoshi kombada yedu nokupangela ombada younyuni ou mupe. (Mateus 6:9, 10) Nafye ohatu dulu okukala nelineekelo kutya Kalunga ota ka nyamukula eilikano olo, shaashi Eendjovo daye otadi udaneke: “Ovayuki, vo otava ka fyuulula [edu], ndee tava kala mo alushe.”—Epsalme 37:29, faafanifa New World Translation.

Omwenyo mOunyuni Mupe waKalunga

Ouhamba waKalunga otau ka eta omauwa opedu oo e he shi kuyelekwa, mokuwanifa keshe ouwa oo Kalunga a halela ovanhu vaye pehovelo ve u hafele kombada yedu. Itapu ka kala vali outondwe nokayova, ndee konima yefimbo keshe umwe kombada yedu ota ka kala kaume kolela kakeshe umwe e lili. MOmbibeli Kalunga ota udaneke kutya ye ota ka “xulifa po oita fiyo okeengaba dedu.” “Itava ka lwifafana vali nongaashi itave lilongo vali oukwaita.”—Epsalme 46:10; Jesaja 2:4.

Xuuninwa edu alishe otali ka twalwa monghalo yoparadisa ya fa oshikunino. Ombibeli otai ti: “Ombuwa nomalondo otaa ka hafa, nofuka tai ka nyakukwa pombada, otai liwapaleke ngaashi onhemo yedo; . . . osheshi mombuwa omwa fituluka omeva, nomilonga otadi tondoka mofuka. Ndele efululu la hanya tali ka ninga etale, nomatunda taa ka ninga onhele yeefifiya.”—Jesaja 35:1, 6, 7.

Otapu ka kala keshe etomhelo okuhafa mEduparadisa. Ovanhu itava ka fya vali ondjala nandenande omolwomhumbwe yoikulya. “Edu oli li po la menifa omumeno walo,” osho Ombibeli tai ti. (Epsalme 67:7; 72:16) Aveshe otava ka hafela oiimati yoilonga yavo, ngaashi Omushiti wetu ta udaneke: “Tava twike oikokola yomiviinyu, ndee tava li oiimati yayo; . . . ihava ka twika, vamwe ngeno va lye oiimati yavo.”—Jesaja 65:21, 22.

Mounyuni mupe waKalunga, ovanhu itava ka fendelwa mo vali momatungilo a finana unene ile moipondoka, shaashi omhangela yaKalunga oyo: “Vo otava ka dika omaumbo ndee tava kala mo, . . . itava ka tunga mu kale vamwe.” Ombibeli otai udaneke yo: “Vo itave ke lihepeka epwanga.” (Jesaja 65:21-23) Hano ovanhu otava ka kala ve na oilonga oyo tai ka eta po sha, noyo tai va shambula. Omwenyo itau ka kala nande noudja.

Konima yefimbo, Ouhamba waKalunga otau ka alula vali omakwatafano mawa oo a kala moshikunino shaEden pokati koinamwenyo, nopokati koinamwenyo novanhu. Ombibeli otai ti: “Opo nee embungu otali li pamwe nodi, nongwe otai nangala pamwe noukombwena; nokatana nonghoshi yonyasha nohove otadi lile mumwe ndee tadi lifwa kokamati kanini.”—Jesaja 11:6-9; Hosea 2:18.

Diladila ashike, mEduparadisa omauyahame noudu aushe wopambelela otau ka velulwa yo! Eendjovo daKalunga otadi tu shilipaleke: “Onakukala mo nande umwe ta ti: Aame oshingone.” (Jesaja 33:24) “[Kalunga] ota feta po omahodi momesho avo, nefyo itali kala po vali ile okulila ile ouyahame itau kala po vali, osheshi eshi shotete osha xula po.”—Ehololo 21:4.

Ongahelipi Eshi Otashi Dulika Kwoove

Shoshili, omutima woye otau linyengifwa komaudaneko aKalunga kombinga yomwenyo mounyuni waye mupe wouyuki. Ndee manga vamwe shiimba otava tale ewanifo lomapuniko a tya ngaho kutya itali dulu okwiitavelwa, olo inali pitilila mouwa opo li ha dule okudja meke lOmushiti wetu omunahole.—Epsalme 145:16; Mika 4:4.

Shoshili, ope na oiteelelwa oyo i na okuwanifwa ngeenge fye hatu ka kala nomwenyo fiyo alushe mOparadisa kombada yedu oyo tai ke uya. Jesus okwa ulika shimwe sha fimana, mokutya kuKalunga meilikano: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.”—Johannes 17:3.

Hano, ngeenge twa hala lela okukala nomwenyo mounyuni mupe waKalunga, otu na okulihonga tete ehalo laKalunga nopo nee oku li ninga. Shaashi oushili oyou: “Ounyuni [ou] otau xulu po pamwe nokahalu [kawo]; ndelenee ou ta longo ehalo laKalunga, oye ta kala alushe,” mokuhafela fiyo alushe omapuniko oo tae ke tu tililwa kOmushiti wetu omunahole.—1 Johannes 2:17.

Kakele kaayo i lili ya yandjwa, oitofwamo yOmishangwa aishe oya kufwa mOmbibeli yOshikwanyama.