Etukulwa 2
Jesus okwa li a fimanekwa ofimbo nokuli ina dalwa
KONIMA eshi omweengeli Gabriel a li a lombwela omukainhu omunyasha Maria kutya ota ka dala okaana kokamati, oko ka li taka ka ninga ohamba yaalushe, Maria okwa li a pula omweengeli a ti: “Eshi otashi ka ningwa ngahelipi, osheshi omulumenhu nghi mu shii?”
Gabriel okwa li a yelifila Maria a ti: “Omhepo Iyapuki otai ku dile kombada, neenghono daau wOkombadambada otadi ku tuvikile, onghee hano omudalwa ou omuyapuki ota ka lukwa Omona waKalunga.”
Opo Gabriel a kwafele Maria a itavele etumwalaka olo, okwa li e mu lombwela vali a ti: “Tala, naElisabet, omukweni, ou kwa tiwa ongadji, okwa ninga [oufimba] wokamati moukulupe waye, nohani ei yaye oyo onhi-6, osheshi Kalunga iha nyengwa kusha.”
Maria okwa li a tambula ko eendjovo daGabriel, ndele ta nyamukula ta ti: “Tala, aame omupiya wOmwene, nandi ningwe ngaashi wa tya.”
Diva konima eshi Gabriel a dja po puMaria, Maria okwa li e lilongekida ndele ta i a ka talele po Elisabet, oo a li ha kala pamwe nomushamane waye Sakaria koshilongo shokeemhunda shaJudea. Okudja keumbo looMaria muNasaret fiyo okomukunda wooElisabet okwa li pe na oshinano shile, hashi pula omunhu a ende po oule womafiku atatu ile ane lwaapo.
Eshi Maria a fika peumbo laSakaria, okwa ya mo ndele ta popifa. Pefimbo opo, Elisabet okwa li a yadifwa omhepo iyapuki, ndele ta ti kuMaria: “Oove omunangekwa noupuna mokati kovakainhu, ndele nakudalwa ou womuove omunangekwa noupuna! Ndele osha dila nge peni, ina yOmwene wange te uya kuame? Osheshi ondaka yekundo loye eshi ya fika momatwi ange, okaana oka nuka kehafo medimo lange.”
Eshi Maria a uda eendjovo odo, okwa li a nyamukula nehafo a ti: “Omwenyo wange otau hambelele pombada Omwene, nomhepo yange otai nyakukilwa Kalunga, Omukulili wange, eshi a tala ouxupi womupiya. Tala, okonena omapupi aeshe otaa fimaneke nge ndi munelao. Osheshi Omunaenghono a ningila nge oinima inene.” Omolwoufembanghenda oo Maria a li e na, okwa li a tanga Kalunga. Okwa ti: ‘Edina laye olo oliyapuki, nefilonghenda laye otali kala koludalo nokomaludalo okuava have mu tila.’
Maria okwa li a twikila okutanga Kalunga meimbilo lopaxunganeko la nwefwa mo, a ti: “Okwa longa oilonganghono kokwooko kwaye, ndele okwa [halakanifa] po ava va li ve nomadiladilo elinenepeko momitima davo. Ovapangeli okwe va undula ko komalukalwa ndele okwa nenepekifa ovaxupi. Ovanandjala okwe va kutifa nouwa, noipuna okwe va lekela ongaho. Okwa tambula Israel, omupiya waye, opo a dimbulukwe efilonghenda laye kuAbraham nokoludalo laye fiyo alushe, ngaashi a lombwela ootate.”
Maria okwa li a menekela puElisabet oule weemwedi nhatu lwaapo, nosha yela kutya okwa li a kwafela Elisabet neenghono pefimbo opo a li pokumona okaana. Osha li sha yeleka eshi ovakainhu ovo vavali ovadiinini, ovo va li va ninga oufimba kekwafo laKalunga, va li va dula okukala pamwe pefimbo olo lihafifa monghalamwenyo yavo.
Mbela owa didilika ngoo kutya Jesus okwa li a fimanekwa nokuli nofimbo ina dalwa? Elisabet okwa li e mu ifana ‘Omwene wange,’ nokaana oko ka li medimo laye oka li ka nhuka kehafo eshi Maria a fika meumbo lavo. Ndele mepingafano naasho, ovanhu vamwe konima yefimbo kava li lela va fimaneka Maria nosho yo okaana oko a ka dala, ngaashi hatu ke shi mona momatukulwa taa landula. Lukas 1:26-56.
▪ Gabriel okwa li a popya shike opo a kwafele Maria a ude ko kutya otashi ka enda ngahelipi opo a ninge oufimba?
▪ Jesus okwa li a fimanekwa ngahelipi fimbo ina dalwa?
▪ Maria okwa li a popya shike meimbilo laye lopaxunganeko lokutanga Kalunga?
▪ Maria okwa li a menekela puElisabet oule wefimbo li fike peni, nomolwashike sha yeleka eshi Maria naElisabet va li va kala pamwe pefimbo olo?