Gabriel ta talele po Maria

Elisabet oku na omupambele waye wedina Maria, oo a li ha di muNasaret muGalilea. Maria okwa li a valekwa kuJosef, omuhongi woipilangi. Eshi Elisabet a li e na eteelelo leemwedi hamano, omweengeli Gabriel okwa li a holokela Maria. Okwa ti: ‘Kundwa Maria. Jehova okwe ku tumbaleka neenghono.’ Maria ka li e udite ko kutya omweengeli okwa hala okutya shike. Gabriel okwe mu lombwela a ti: ‘Oto ka ninga oufimba, ndele to dala okaana okamati, noku ka luka Jesus. Ota ka pangela e li Ohamba. Ouhamba waye otau ka kala fiyo alushe.’

Maria okwa ti: ‘Ame okakadona. Ohandi ka dula ngahelipi okumona okaana?’ Gabriel okwa ti: ‘Jehova iha nyengwa kusha. Omhepo iyapuki otai ke uya kwoove, ndele to ka dala okamati. Omupambele woye Elisabet naye oku na eteelelo.’ Opo nee Maria okwa tya: ‘Ame okakadona okapiya kaJehova. Nandi ningilwe ngaashi wa popya.’

Maria okwa li a ya koshilando shi li keemhunda a ka talele po Elisabet. Eshi Maria a popifa Elisabet, Elisabet okwa uda okaana taka nuka medimo laye. Molwaashi okwa li a yadifwa omhepo iyapuki, okwa ti: ‘Maria, Jehova okwe ku nangeka noupuna. Oshi li oufembanghenda okutalelwa po kuina yOmwene wange meumbo letu.’ Maria okwa ti: ‘Ohandi tange Jehova nomutima wange aushe.’ Maria okwa kala naElisabet oule weemwedi nhatu, ndele ta shuna keumbo kuNasaret.

Eshi Josef a shiiva kutya Maria oku na eteelelo, okwa li a hala oku mu henga po. Ashike okwa li a holokelwa komweengeli mondjodi ndele ta ti: ‘Ino tila okuhombola Maria. Ina ninga sha sha puka.’ Onghee hano, Josef okwa hombola po Maria ndele te mu twala keumbo lavo.