Etukulwa 10

Oukwaneumbo waJosef owa li hau i kuJerusalem

MOMWEDI Nisan, Josef noukwaneumbo waye nosho yo ookaume kavo novapambele vavo ova li ve li pokuya molweendo lavo lokomudo opo va ka dane Opaasa kuJerusalem. Eshi va li va ya molweendo olo leekilometa 100 lwaapo, ova li va hafa neenghono ngaashi shito. Pefimbo opo Jesus okwa li e na omido 12, nokwa li a teelela nodjuulufi oshivilo osho she likalekelwa.

Jesus noukwaneumbo wavo kava li va tala ko Opaasa i li ashike oshinima shefiku limwe. Ova li yo va kala kuJerusalem omafiku aheyali konima yOpaasa, oo a li haa danwa Oshivilo shOmingome inadi ya Onhafi, osho va li ve shi tala ko shi li oshivilo shopefimbo lOpaasa. Onghee hano, olweendo lavo alishe okudja keumbo lavo kuNasaret, mwa kwatelwa omafiku oo va li hava kala muJerusalem, okwa li ha li kwata oivike ivali lwaapo. Ndele omudo oo ola li la kwata olule omolwoshinima shonhumba osho sha li sha ningwa po shi na sha naJesus.

Opa li pa holoka oupyakadi fimbo ve li mondjila yokushuna keumbo okudja muJerusalem. Josef naMaria ova li tava diladila kutya Jesus oku li mokati kovapambele nosho yo ookaume kavo ovo va li tava ende pamwe navo. Ndele eshi va li va kanghama ponhele yonhumba opo va li tava nangala, Josef naMaria ova li va konga Jesus mokati kovaendi pamwe navo, ndele kava li ve mu mona. Onghee hano, Josef naMaria ova li va shuna kuJerusalem opo ve ke mu konge.

Ova li ve mu konga efiku alishe, ndele inave mu mona. Efiku etivali natango kava li ve mu mona. Lwanima, mefiku etitatu ova li va ya kotembeli, oko va li va hanga Jesus e li medimo limwe lotembeli, e li omutumba mokati kovahongi Ovajuda ta pwilikine kuvo note va pula omapulo.

Maria okwa li a pula Jesus a ti: “Omumwange, oshike we tu ningila ngaha? Tala, fye naxo twe ku konga nokuyahama.”

Jesus okwa li a kumwa eshi ovadali vaye va li vehe shii kutya oku li peni. Jesus okwa li e va pula a ti: “Oshike mwa konga nge? Kamu shi shii hamba, Ame ndi nokukala muei yaTate?”

Jesus ka li e shii kutya omolwashike ovadali vaye va li vehe shii kutya otembeli eumbo laXe Jehova. Ashike Jesus okwa li a shuna keumbo novadali vaye nokwa kala ha dulika kuvo. Ounongo waJesus owa li wa enda tau hapupala nokwa enda ta kulu palutu nokwa li yo a hokiwa kuKalunga nosho yo kovanhu. Onghee hano, Jesus okwa tula po oshihopaenenwa shiwa okudja kounona waye shi na sha nokulalakanena oinima yopamhepo nosho yo okudulika kovadali vaye. Lukas 2:40-52; 22:7.

▪ Jesus noukwaneumbo wavo ova li hava i peni omudo keshe, nolweendo lavo ola li hali kwata omafiku angapi?

▪ Eshi Jesus a li e na omido 12, oshike sha li sha ningwa po eshi va li va ya molweendo?

▪ Jesus okwa tulila po ovanyasha oshihopaenenwa shilipi kunena?