Omunyasha Jesus

Josef naMaria ova li hava kala muNasaret pamwe naJesus nounona vavo vakwao, oumati noukadona. Josef okwa li ha yambidida oukwaneumbo waye mokuhonga oipilangi, nokwa li he u hongo kombinga yaJehova nEemhango daye. Oukwaneumbo owa li hau i koshinagoga pandjikilile opo u ka longele Jehova nokuJerusalem kOpaasa omudo keshe.

Eshi Jesus a li e na omido 12, oukwaneumbo wavo owa li wa ya molweendo lile kuJerusalem ngaashi shito. Moshilando omwa li mu yadi ovanhu ve uya okudana Opaasa. Konima yaasho, Josef naMaria ova li va ya molweendo lokushuna keumbo, tava diladila kutya Jesus naye oku li molweendo pamwe navakwao. Ndele eshi ve mu konga mokati kovapambele, kava li ve mu mona.

Ova li va shuna kuJerusalem, ndele tave mu kongo oule womafiku atatu. Hauxuuninwa ova li ve mu hanga motembeli. Ova li ve mu hanga e li omutumba mokati kovahongi, ta pwilikine nawa noku va pula omapulo mawa. Ovahongi ova li va kumwa neenghono, nomolwaasho ova li va pula Jesus omapulo. Ova li yo va kuminwa omanyamukulo aye. Ova li ve wete kutya oku udite ko Omhango yaJehova.

Josef naMaria ova li va limbililwa. Maria okwa ti: ‘Mona wange, otwe ku konga keshe pamwe! Owa li peni?’ Jesus okwa nyamukula a ti: ‘Kamu shii kutya ondi na okukala meumbo laTate?’

Opo nee Jesus okwa ya keumbo pamwe novadali vaye kuNasaret. Josef okwa honga Jesus okuhonga oipilangi. Mbela oto diladila kutya Jesus okwa li omunyasha a tya ngahelipi? Eshi a enda ta kulu, ounongo waye owa enda tau hapupala nokwa li a hokiwa kuKalunga nokovanhu.