Etukulwa 21

Jesus e li moshinagoga yomoshilando shavo

NOPEHE na omalimbililo, ovanhu vomuNasaret ova li va tunhukwa eshi Jesus a li a alukila keumbo. Omudo umwe fimbo Jesus a li ina ya kuJohannes a ka ninginifwe, Jesus okwa li a shiivika nawa e li omuhongi womiti. Ndele paife okwa li a shiivika keshe pamwe e li omulongi woikumwifilonga. Ovanhu vomoshitukulwa shavo ova li va halelela oku mu mona ta longo imwe yomoikumwifilonga mokati kavo.

Ova li ve na etimaumbwile linene eshi Jesus a li a ya koshinagoga ngaashi ha ningi shito. Fimbo a li ta udifa moshinagoga, okwa li a pewa omushangwatonywa ndele ta lesha eendjovo di na sha nexunganeko laJesaja. Okwa li a mona etukulwa olo tali popi kombinga yOmunhu oo a vaekwa kuJehova nomhepo iyapuki, olo mEembibeli detu kunena li li etukulwa 61.

Konima eshi Jesus a li a lesha kombinga yanghee omunhu oo a li ta ka udifila eenghwate emanguluko, ovapofi etwikululo nosho yo omudo muwa waJehova, okwa li a yandja omushangwatonywa komuyakuli ndele ta kala omutumba. Ovanhu aveshe ova li tava tale nawa kuJesus. Opo nee okwa li a popya tashi dulika oule wefimbo, nokuyelifa ta ti: ‘Nena tuu eli eshangelo eli la wanifwa ngaashi la fika momatwi eni.’

Ovanhu ova li va kuminwa “eendjovo [diwa, OB-1986]” odo Jesus a li ta popi, ndele tava pulafana tava ti: “Ou ke fi omona waJosef?” Ndele eshi Jesus a li a didilika kutya ovanhu ova li va hala okumona ta longo oikumwifilonga, okwa li a twikila okupopya ta ti: “Shiimba mwa hala okulombwela nge eyeletumbulo eli: omuveluli, livelula mwene, osho twa uda sha ningilwa muKapernaum, shi ninga omu moshilando shambuleni yo.” Ovashiinda vaJesus vonale otashi dulika va li tava diladila kutya Jesus okwa li e na okuhovela okuvelula moshilando shavo, opo ovanhu vamo va mone ouwa tete. Onghee hano, ova li ve wete Jesus e va ninga nai.

Eshi Jesus a li a didilika osho ovanhu ovo va li tava diladila, okwa li e va hokololela omahokololo amwe oo a li taa dulu oku va kwafela. Okwa li e va lombwela kutya opa li ovafiyekadi vahapu muIsrael pefimbo lomuprofeti Elia, ndele Elia ka li a tumwa nande okuumwe womuvo. Ponhele yaasho, okwa li a ya komufiyekadi ehe fi Omuisrael kuSidon, oko a li a longa oshikumwifilonga mokunyumuna omona womufiyekadi oo. Natango pefimbo laElisa, opa li ovanashilundu vahapu muIsrael, ndele Elisa okwa li ashike a velula Naeman oo a li hadi kuSiria.

Ovanhu ovo va li moshinagoga ova li va handukifwa koiningwanima yopandjokonona oyo ya li ya nyaneka pomutenya oikala yavo yokuliholamwene nosho yo okuheneitavelo, ndele tava fikama nokufindikila Jesus kondje yoshilando. Ova li ve mu twala komhunda oko kwa li kwa tungilwa oshilando Nasaret, opo ngeno ve mu undule ko komungenge. Ashike Jesus okwa li a dja po puvo ndele ta i inave mu ninga sha. Lukas 4:16-30; 1 Eehamba 17:8-16; 2 Eehamba 5:8-14.

▪ Omolwashike ovanhu vomuNasaret va li va tunhukwa?

▪ Ovanhu ova li tava diladila shike kombinga yoshipopiwa shaJesus, noshike sha li she va handukifa?

▪ Ovanhu ova li va kendabala okuningila shike Jesus?