Etukulwa 24

Omolwashike Jesus e uyile kombada yedu?

JESUS novahongwa vaye vane ova li ve lipyakidila efiku alishe olo va li muKapernaum, molwaashi ovanhu vomuKapernaum ova li ve mu etela ovanaudu vavo opo e va velule onguloshi oyo. Jesus ka li a mona efimbo lokulikalela.

Ongula inene yefiku la landula, fimbo kwa li kwalaula natango, Jesus okwa li a penduka ndele ta i pondje oye aeke. Okwa li a ya konhele ye likalela opo a ka ilikane kuXe oye aeke. Ashike Jesus ka li a dula okulikalela oule wefimbo molwaashi eshi Petrus navakwao va li va mona kutya Jesus ke po puvo, ova li va ya ve ke mu konge.

Eshi Petrus navakwao va li va mona Jesus, Petrus okwa li e mu lombwela a ti: “Aveshe otave ku kongo.” Ovanhu vomuKapernaum ova li va hala Jesus a kale pamwe navo, molwaashi ova li ve na olupandu shili shi na sha naasho e va ningila. Ndele mbela Jesus okwa li unene e uya okulonga oikumwifilonga yokuvelula kombada yedu? Jesus okwa ti ngahelipi shi na sha naasho?

Jesus okwa li a nyamukula ovahongwa vaye shi na sha naasho mehokololo lOmbibeli limwe a ti: “Tu yeni komikunda dopoushinda, opo ndi ka udifile ko yo, osheshi osho tuu osho nde shi endela.” Nonande ovanhu ova li va ladipika Jesus a kale pamwe navo, okwa li e va lombwela a ti: “Ondi na okuudifila oilando imwe yo evangeli louhamba waKalunga, osheshi olo tuu eli [nde] li tuminwa.”

Jesus okwa li e uya kombada yedu opo a udife Ouhamba waKalunga, oo tau ka yapulifa edina laXe notau ka xulifa po omikifi adishe filufilu. Ndele Jesus opo a yandje oumbangi kutya okwa li a tumwa kuKalunga kombada yedu, okwa li a longa oikumwifilonga yokuvelula. Omafelemido komesho yaasho, Moses naye okwa li a longa oikumwifilonga opo a yandje oumbangi kutya oku li omupiya waKalunga.

Jesus okwa li a ya pamwe novahongwa vaye vane eshi a li a dja muKapernaum a ka udife koilando imwe. Ovahongwa ovo ova li Petrus nomumwaina Andreas nosho yo Johannes nomumwaina Jakob. Dimbuluka kutya ovahongwa ovo ova li va ifanwa kuJesus oshivike sha ya opo va kale tava longo pamwe naye.

Jesus novahongwa vaye ova li va pondola neenghono molweendo lavo lokuudifa muGalilea. Ndele onghundana i na sha noilonga yaJesus oya li ya tandavela fiyo okuSiria ashishe. Eemhunga dovanhu da dja kuGalilea, kuJudea nosho yo kombinga ikwao yomulonga waJordan oda li da shikula Jesus novahongwa vaye. Markus 1:35-39; Lukas 4:42, 43; Mateus 4:23-25; Exodus 4:1-9, 30, 31.

▪ Oshike sha li sha ningwa po ongula konima eshi Jesus a li a kala e lipyakidila muKapernaum?

▪ Omolwashike Jesus a li a tumwa kombada yedu, noikumwifilonga oyo a li a longa otai ulike shike?

▪ Oolyelye va li va ya naJesus molweendo laye lokuudifa kuGalilea, novanhu ova li ve linyenga ngahelipi koilonga yaJesus?