Etukulwa 16
Jesus okwa li e na ouladi notembeli yaJehova
OVAMWAINAMATI vaJesus ovo va dalwa kuina Maria ova li Jakob, Josef, Simon nosho yo Judas. Fimbo Jesus novahongwa vaye nosho yo ovamwainamati ovo va li inava ya kuKapernaum, oshilando osho sha li popepi nefuta laGalilea, otashi dulika va li va kanghama peumbo lavo muNasaret opo va pitule oinima oyo va li va pumbwa.
Ndele mbela omolwashike Jesus a li a ya kuKapernaum ponhele yokutwikila noukalele waye muKaana, muNasaret ile moitukulwa imwe yo i li koikulundudu yaGalilea? Etomheno limwe ololo kutya Kapernaum osha li onhele ya tumbala nosha li oshilando shinene. Shimwe vali oshosho kutya ovahongwa vahapu vape vaJesus ova li hava di muKapernaum ile popepi nasho, onghee hano, kava li ve na okufiya po omaumbo avo opo va ka deulwe kuJesus.
Eshi Jesus a li muKapernaum, okwa li a longa oikumwifilonga, ngaashi e ke shi ulika eemwedi da ka landula ko. Ndele diva pefimbo loitemadula, Jesus novahongwa vaye ova li natango va ya molweendo lokuya kuJerusalem opo va ka dane Opaasa yomo 30 O.P. Fimbo va li muJerusalem, ovahongwa ova li va mona Jesus ta ningi oshinima shonhumba osho tashi dulika inava mona nale.
Omhango yaKalunga oya li ya ufa kutya Ovaisrael ove na okuyamba omayambo oinamwenyo. Onghee hano, ovalandifi vomuJerusalem ova li hava landifa oinamwenyo nosho yo oudila opo Ovaisrael vakwao va dule okumona noupu oinamwenyo yokuyamba. Ndele ovalandifi ovo ova li hava landifile motembeli nova li tava nyokoma ovanhu, tave va landifa oinima kondilo.
Osho osha li sha handukifa Jesus, ndele ta ningi oshokoto yeengodi nokutaataa mo ovalandifi ovo motembeli. Okwa li a tilashi oimaliwa yovakumaani ovo nokuundulilashi oitaafula yavo. Jesus okwa li yo a lombwela ovo va li tava landifa eenghuti a ti: “Tumbeni po oinima ei. Ongulu yaTate inamu i ninga oshilandelo.”
Eshi ovahongwa vaJesus va li va mona osho Jesus a li ta ningi, osha li she va dimbulukifa exunganeko limwe li na sha nOmona waKalunga tali ti: “Ouladi omolwongulu yoye otau li nge.” Ndele Ovajuda ova li va pula Jesus va ti: “Oto tu ulikile edidiliko lashike, eshi to longo ngaha?” Jesus okwa li e va nyamukula a ti: “Ngumauneni po otembeli ei, ndele handi i tungulula momafiku atatu.”
Ovajuda ova li tava diladila kutya Jesus ota popi shi na sha notembeli yo vene, onghee hano, ova li ve mu pula va ti: “Otembeli ei [oya] tungwa omido omilongo nhe nomido 6, ndele Ove to i tungu momafiku atatu?” Ashike, Jesus okwa li ta popi kutya olutu laye olo li li otembeli. Eshi papita omido nhatu, konima eshi Jesus a nyumuka koufi, ovahongwa vaye ova li va dimbuluka eendjovo odo. Johannes 2:12-22; Mateus 13:55; Lukas 4:23.
▪ Konima eshi Jesus a dja koshivilohombolo muKaana okwa li a ya peni?
▪ Omolwashike Jesus a li a handuka, nokwa li a ninga po shike?
▪ Ovahongwa vaJesus ova li va dimbuluka shike eshi va mona eenghatu odo Jesus a li a katuka?
▪ Jesus okwa li a popya shike shi na sha ‘notembeli ei,’ nokwa li a hala okutya shike?