Etukulwa 40
Jesus ta hongo oshilihongomwa shi na sha nokufila vamwe onghenda
JESUS otashi dulika a li natango muNain omo a li a nyumuna omonamati womufiyekadi, ile tashi dulika a li a ka talela po koshilando shimwe shopopepi. Omufarisai umwe wedina Simon okwa li a hala okumona nawa Jesus oo ha longo oikumwifilonga. Onghee hano, okwa li a shiva Jesus e uye va lye pamwe naye.
Jesus okwa li a tambula ko eshivo olo molwaashi okwa li e wete kutya oshi li omhito iwa yokuyandja oundombwedi kwaavo tava ka kala po, ngaashi ashike a li ha tambula ko omashivo oku ka lya pamwe novafendelifi nosho yo novalunde. Ndele eshi Jesus a li a ya keumbo laSimon, ka li a yakulwa nawa ngaashi sha li onghedindjikilile yokuyakula ovaenda.
Omunhu ngeenge ta ende a djala eenghaku deesandala, eemhadi daye ohadi kala tadi hapuka nohadi kala da twima ondwi ngeenge okwa enda mondjila i yadi ondwi. Okukosha eemhadi dovaenda nomeva matalala osha li onghedindjikilile yokuyakula ovaenda. Ndele eshi Jesus a li e uya meumbo laSimon, kape na oo a li a kosha eemhadi daye. Ka li a xupitwa nokuli ngaashi sha li onghedi yokutambula ko ovaenda, neexwiki daye kada li da vaekwa omaadi oo a li haa vaekwa ovaenda.
Fimbo ovaenda va li tava li, monduda omo va li omwa li mwe uya omukainhu wonhumba oo a li ina shivwa. Omukainhu oo okwa li a shiivika nawa moshilando omo kutya i na koshoka paenghedi. Otashi dulika omukainhu oo a li a uda omahongo aJesus, mwa kwatelwa eshivo olo kutya “ileni kuame amushe hamu longo nomwa lolokifwa, Ame ohandi mu pe etulumuko.” Molwaashi omukainhu oo okwa li e linyengifwa kwaasho a mona nokwaasho a uda, okwa li a ka konga Jesus.
Omukainhu oo okwa li e uya puJesus ndele ta tu eengolo peemhadi daye. Omukainhu oo okwa li ta lili, naashi omahodi aye a li a wila keemhadi daJesus okwa li e a pushula ko neexwiki daye. Okwa li yo a kufa okakende komaadi edimba liwa ndele ta vaeke eemhadi daJesus noku di xupita. Simon okwa li ta tale ashishe osho omukainhu oo a li ta ningi noka li e shi hokwa. Onghee okwa li e lipopila momutima waye a ti: “Ou ngeno omuprofeti, ngeno a koneka omukainhu ou omushike nokwa tya ngahelipi, nokutya, ye omulunde.”
Eshi Jesus a li a didilika kutya Simon ota diladila ngahelipi, okwa ti: “Simon, ondi na ondjovo oku ku lombwela.”
Simon okwa ti: “Omuhongi, popya.”
Jesus okwa li a hovela ta ti: “Okwa li ku nomuyandji woikolo e novanhu vavali ve mu lila oikolo, umwe okwe mu lila oikolo yeendenari omafele atano, nomukwao omilongo itano. Ndele eshi va nyengwa okufuta, okwe di va dimina po aveshe ovo vavali. Olyelye hano muava vavali ta kala e mu hole e dule omukwao?”
Simon oo tashi dulika a li ehe na ko nasha nepulo olo, okwa li a nyamukula a ti: “Ndi shii oye ou a diminwa po dihapu.”
Opo nee Jesus okwa ti: “Wa tokola nawa.” Jesus okwa li a tala komukainhu ndele ta ti kuSimon: “Omukainhu u mu wete ou? Ame nde uya meumbo loye, ove ino pa nge omeva okukosha eemhadi, ou a tutika eemhadi dange nomahodi ndele okwe di fetifa eexwiki daye. Ove ino fipa nge komilungu, ndele ou [nghee] tuu e uya mo ina efa okufipa eemhadi dange. Ove ino vaeka omutwe wange nomaadi, ndele ou okwa vaeka eemhadi dange nomaadi.”
Omukainhu oo okwa li a ulika kutya okwe livela shili ombedi konghedi yaye yonale yokukalamwenyo inai koshoka. Opo nee Jesus okwa li a xulifa a ti: “Hano handi ku lombwele: Ou okwa diminwa po omatimba mahapu, onghee oku na ohole ihapu, ndele ou ta diminwa po manini, ye oku na ohole inini.”
Jesus ka li nande ha kala a hokwa ovanhu ovo ve na onghalamwenyo inai koshoka. Ponhele yaasho, oshiningwanima osho otashi ulike kutya okwa li ha kenukile ovanhu ovo va nyona ndele tava ulike kutya ove livela ombedi komanyono avo nove uya kuKristus e va pe etulumuko. Jesus okwa li a yandja etulumuko lashili komukainhu oo e shi a ti: “Omatimba oye okwa dimwa po. . . . Eitavelo loye le ku xupifa, inda nombili.” Lukas 7:36-50; Mateus 11:28-30.
▪ Jesus okwa li a tambulwa ko ngahelipi kuSimon oo a li e mu shiva?
▪ Olyelye a li ta kongo Jesus, nomolwashike?
▪ Jesus okwa li a yandja efaneko lilipi, nongahelipi a li a yelifa nghee tali dulu okutulwa moilonga?