Etukulwa 42

Jesus ta hanyene Ovafarisai

JESUS okwa li a lombwela Ovafarisai kutya ngeenge oha te mo eendemoni keenghono daSatana, mboli Satana okwe litukaula. Opo nee okwa li a twikila ko a ti: “Ningeni omuti muwa, [noiimati] yawo oiwa, ile mu ninge omuti mwii, noiimati oii; osheshi omuti ohau shiivika koiimati yawo.”

Kashi li pandunge okupopya kutya oiimati iwa yokutamo eendemoni otai ulike kutya Jesus ota longele Satana. Ngeenge oiimati oiwa, osha yela kutya inai dja komuti mwii. Mepingafano naasho, Ovafarisai ova li va imika oiimati ii yomapopyo a nyika oulai nova li yo tava ula Jesus eendjovo dihe na ekanghameno, naasho oshi li euliko kutya ove li omiti dii. Jesus okwa li e va ula a ti: “Oludalo nye lomauta, otamu shiiva ngahelipi okupopya ouwa, onye vene eshi mu li po vaii? Osheshi eshi shi yadi momutima, osho tashi popifa okanya.”

Molwaashi eendjovo detu ohadi ulike oikala yomitima detu, ohatu ka tokolwa she likolelela kwaasho hatu popi. Jesus okwa ti: “Ndelenee ohandi mu lombwele: Okeshe tuu ondjovo yongaho, ovanhu tava tumbula, ovo ve na oku i pulwa efiku letokolo. Osheshi okeendjovo doye ove to yukifwa omuyuki, nokeendjovo doye to pewa oushima.”

Nonande Jesus okwa li a longa oikumwifilonga ihapu, ovanongo vomishangwa nOvafarisai ova li ve mu pula tava ti: “Omuhongi, fye [otwa] hala u tu ulikile edidiliko.” Nonande otashi dulika ovalumenhu ovo va li va dja kuJerusalem kava li va mona oikumwifilonga oyo Jesus a li a longa, opa li pe na ovamoninomesho ovo va li tava dulu okukoleka oushili oo. Onghee hano, Jesus okwa li a lombwela ovawiliki vOvajuda ovo a ti: “Epupi eli lii lovanyoni [vohombo] la hala edidiliko, ndele itali pewa edidiliko limwe, olo tuu alike lomuprofeti Jona.”

Jesus okwa li a twikila ko ta yelifa eendjovo daye a ti: ‘Ngaashi Jona a kalele medimo loshikwameva omitenya nhatu nomaufiku atatu, hano osho yo Omona wOmunhu ta ka kala koshi yedu omitenya nhatu nomaufiku atatu.’ Eshi Jona a li a ponwa po koshi ndele konima ta i ke mu kunga mo, okwa li a fa a nyumuka, onghee hano, Jesus okwa li ta xunganeke kutya ota ka fya nokwa li ta ka nyumuka mefiku etitatu. Ndele nande ongaho, ovawiliki vOvajuda kava li va itavela ‘edidiliko laJona,’ nokuli nokonima eshi Jesus a li a nyumuka.

Kungaho, Jesus okwa li ta ti kutya Ovaninive ovo va li ve lidilulula omolweudifo laJona otava ka nyumuka pefimbo letokolo opo va ka tokole Ovajuda ovo va ekelashi Jesus. Natango, Jesus okwa li a longifa oshihopaenenwa shohambanghainhu yokuSheba, oyo ya li ya dja koilongo yokokule opo i uye i ude kombinga younongo waSalomo noya li ya kumwa kwaasho ya li ya mona noya uda. Jesus okwa ti: “Ndele tala, ou e li apa, oku dule Salomo.”

Opo nee Jesus okwa li a hokolola efaneko li na sha nomulumenhu oo a li a kosholwa omhepo ya nyata. Ndele omulumenhu oo ka li a yadifa omwaka omo mwa li omhepo ya nyata noinima iwa, onghee hano, okwa li a kwatwa keemhepo da nyata heyali. Jesus okwa ti: “Hano epupi eli lii osho tali ningilwa.” Oshiwana shaIsrael osha li sha kosholwa, ngaashi omunhu oo a li a kosholwa omhepo ya nyata. Ashike oshiwana osho osha li sha ulika kutya onghalo yasho oya li ya naipala neenghono shi dulife osho ya li pehovelo, molwaashi osha li sha ekelashi ovaprofeti vaKalunga, nohauxuuninwa osha li sha pataneka Kristus.

Fimbo Jesus a li ta udifa, ina novamwaina ova li ve uya peemhunga dovanhu odo da li puye. Nomolwaasho omunhu umwe okwa li a lombwela Jesus a ti: “Tala, nyoko novamwanyoko [ove] li pondje ndele va hala ve ku popife.”

Jesus okwa li a pula omunhu oo a ti: “Meme olyelye novamwameme oolyelye? Opo nee Jesus okwa li a ulika kovahongwa vaye ndele ta ti: “Tala, meme, novamwameme ovo ava! Osheshi keshe tuu ou ta wanifa ehalo laTate meulu, oye omumwameme omulumenhu nomumwameme omukainhu nameme.” Kungaho, Jesus okwa li a ulika kutya kashi na nee mbudi kutya oku hole ovapambele vaye shi fike peni, ekwatafano laye novahongwa vaye olo la fimanenena kuye. Mateus 12:33-50; Markus 3:31-35; Lukas 8:19-21.

▪ Ovafarisai ova li va dopa ngahelipi okukala “omiti” nosho yo ‘oiimati’ iwa?

▪ ‘Edidiliko laJona’ oshike, nongahelipi ovanhu va li ve li ekelashi?

▪ Omonghedi ilipi oshiwana shOvaisrael shomefelemudo lotete sha li sha fa omulumenhu oo a li a yelifwa omhepo ya nyata?

▪ Jesus okwa li a divilika ngahelipi ekwatafano laye lopofingo novahongwa vaye?