Etukulwa 56

Oshike hashi nyateke omunhu?

OVANHU ova li va hovela okupataneka Jesus neenghono. Kakele kovahongwa vaJesus vahapu ovo va li ve mu fiya po, Ovajuda vomuJudea ova li tava kongo eemhito opo va dipae Jesus, ngaashi naanaa va li va hala oku shi ninga nale eshi a li muJerusalem pefimbo lOpaasa yomo 31 O.P.

Osha li Opaasa yomo 32 O.P., na Jesus okwa li a ya a ka dane Opaasa kuJerusalem, tashi dulika a katuka metwokumwe noshiteelelwa shaKalunga shokudana oshivilo osho. Jesus okwa li a ya kuJerusalem meholeko molwaashi ovanhu ova li va hala oku mu dipaa. Konima eshi Opaasa ya pita, okwa li a shuna kuGalilea.

Eshi Ovafarisai novanongo vomishangwa va li va dja kuJerusalem ve uya kuJesus, Jesus otashi dulika a li muKapernaum. Ova li tava kongo omatomheno opo va dule oku mu lundila kutya okwa nyona omhango yelongelokalunga. Ova li ve mu pula va ti: “Ovalongwa voye oshike hava nyono eenghulunghedi dovakulunhu? Osheshi ovo ihava kosho omake avo ngenge tava li omungome.” Kalunga ka li a teelela ovanhu va ninge ngaho, ndele Ovafarisai ova li ve shi tala ko shi li enyono la kwata moiti ngeenge omunhu okwa dopa okuwanifa po eenghulunghedi odo da kwatela mo okulikosha fiyo opeengolo domaoko.

Ponhele yokunyamukula omalundilo Ovafarisai ovo, Jesus okwa li a popya shi na sha noukolokoshi wavo eshi hava nyono Omhango yaKalunga owina. Jesus okwa li e va pula a ti: “Nanye yo oshike hano [hamu] nyono oshipango shaKalunga omolweenghulunghedi deni? Osheshi Kalunga okwa tya: Fimaneka xo nanyoko, na: Ou ta tuku xe ile ina, oye e nokufya shili. Ndelenee nye ohamu ti: Ou ta ti kuxe ile kuina: Oipalwifa nda li ndi noku ku palulifa ngeno, oyo nda yandja oshali kotembeli, oye ke nokufimaneka xe ile ina.”

Ovafarisai ova li hava longo ovanhu kutya oimaliwa, oiniwe ile keshe shimwe osho sha yapulilwa Kalunga shi li oshali, oshi na okuya kotembeli ndele kashi na okulongifwa va li moinima imwe. Ndele oushili oyoo kutya oshali oyo ya yapulilwa Kalunga ohai kala nomunhu oo e i mu yapulila. Mokuninga ngaho, omonamati ota dulu okuhenuka oshinakuwanifwa shaye shokufila oshisho ovakulunhu vaye ovanamido ovo tashi dulika ve li moluhepo linene, mokupopya kutya oimaliwa yaye ile oiniwe yaye oi li “korban,” sha hala okutya, oshali ya yapulilwa Kalunga ile otembeli.

Jesus okwa li a handukila Ovafarisai omolwokupengifa Omhango yaKalunga, nokwa li a popya a ti: “Osho ngaha mwa hekula eendjovo daKalunga eenghono omolweenghulunghedi deni. Ovanaihelele nye, Jesaja okwe mu profeta da twa eshi a tya: Ovanhu ava ohava fimaneke nge nomilungu, ndele omitima davo odi li kokule naame; ndelenee otava fimaneke nge ongaho nokulonga ovanhu omalongo oipango yovanhu.”

Eemhunga dovanhu otashi dulika da li da ehena kokule opo dipe Ovafarisai omhito yokupula Jesus omapulo. Ndele molwaashi Ovafarisai kava li ve na enyamukulo konima eshi Jesus a li e va tangunina neenghono, Jesus okwa li a ifana eemhunga dovanhu di ehene popepi naye. Jesus okwa li a lombwela eemhunga dovanhu ovo a ti: “Udeni, nye mu didilike. Haeshi hashi i mokanya tashi nyateke omunhu, ndelenee osheshi hashi di mokanya osho tashi nyateke omunhu.”

Lwanima eshi Jesus novahongwa vaye va li va ya meumbo, ovahongwa ova li ve mu pula va ti: “Ou shi shii tuu ovafarisai eshi va uda eendjovo odo, ova ninga omwenyo mwii?”

Jesus okwa li e va nyamukula a ti: “Okeshe tuu [onhwika] inai twikwa kuTate meulu, otai dudwa mo nomidi dayo. Va efeni; ovo ovakwatiketi ovapofi vovapofi; ngenge ku nomupofi ta kwata omupofi mukwao komango, aveshe vavali otava wile moshilambo.”

Jesus okwa li a kumwa eshi Petrus a li a pulila ko ovahongwa vakwao opo va yelifilwe kombinga yaasho hashi nyateke omunhu. Ndele Jesus okwa li e mu nyamukula a ti: “Nanye yo kamu neendunge natango. Kamu shi wete, keshe eshi hashi i mokanya, otashi i medimo notashi piti mo vali. Ndelenee keshe osho hashi di mokanya, hashi di komitima, ndee tashi nyateke omunhu. Osheshi momutima omo hamu di omadiladilo [mai], omadipao, omanyonohombo, oluhaelo, oulunga, omalundilafano, omasheko. Oyo tuu ei tai nyateke omunhu; ndele okulya nomake inaa koshwa ihaku nyateke omunhu.”

Jesus ka li ta ladipike ovanhu vaha kale ovakoshoki eshi a li a popya eendjovo odo. Ka li a hala okutya omunhu ke na okukosha omake aye fimbo ina longekida oikulya ile fimbo ina lya. Ponhele yaasho, okwa li ta tokola oihelele yovawiliki vomalongelokalunga ovo va li tava kendabala monghedi yoinheya okuhenuka eemhango daKalunga douyuki mokukanyatela keenghulunghedi dihe li pamishangwa. Oshoshili kutya oilonga ii oyo hai nyateke omunhu, na Jesus okwa li a popya kutya oilonga ya tya ngaho ohai di momutima womunhu. Johannes 7:1; Deuteronomion 16:16; Mateus 15:1-20; Markus 7:1-23; Exodus 20:12; 21:17; Jesaja 29:13.

▪ Jesus okwa li a shakeneka omapataneko elipi?

▪ Ovafarisai ova li va lundila Jesus va ti ngahelipi, ndele Jesus okwa li a popya ngahelipi kutya Ovafarisai ova li tava nyono Omhango yaKalunga owina?

▪ Jesus okwa li a popya oinima ilipi oyo hai nyateke omunhu?