Etukulwa 67

Ovawiliki vomalongelokalunga ova li va dopa okukwata po Jesus

OFIMBO Oshivilo shOmatwali sha li natango mokati, ovawiliki vomalongelokalunga ova li va tuma ovapolifi va ka kwate po Jesus. Jesus ka li nande a kendabala okuhondama, ndele ponhele yaasho, okwa kala ashike ta hongo moipafi yovanhu ta ti: “Okafimbo kaxupi natango ondi li punye, opo nee handi i kuou a tuma nge; Ndele nye otamu ka kala nokukonga nge, ndee itamu mono nge, apa Ame ndi li itamu dulu okuya ko.”

Ovajuda kava li ve udite ko osho Jesus a li a hala okutya, onghee ova li va pulafana tava ti: “Ou okwa hala okuya peni, eshi itatu mu mono? Ota i mbela kuava va halakana mokati kOvagreka nokulonga Ovagreka? Eendjovo edi oda tya ngahelipi, eshi ta ti: Otamu kala nokukonga nge, ndele itamu mono nge, apa Ame ndi li, itamu dulu okuya ko?” Jesus okwa li ta popi shi na sha nefyo laye olo la li popepi nosho yo okunyumukila omwenyo womeulu omo ovatondi vaye itava dulu oku mu shikula.

Efiku etiheyali olo la li efiku laxuuninwa loshivilo osho la fiki. Ongula keshe yefiku loshivilo, omupristeri okwa li ha tileshi omeva oo a li ha kufa metale laSiloa opo a kunguluke pedu loaltari. Opo Jesus tashi dulika a dimbulukife ovanhu shi na sha nonghedindjikilile yokudana oshivilo osho, okwa li e va lombwela a ti: “Ngenge pe na ou a fya enota, ne uye kuame ye a nwe. Oye ou ta itavele nge, ngaashi omishangwa tadi ti, meni laye otamu ka tondoka omilonga domeva e nomwenyo.”

Jesus otashi dulika a li ta popi shi na sha naasho sha li tashi ka ningwa po ngeenge ovahongwa vaye ova tililwa omhepo iyapuki. Ovahongwa ova li va tililwa omhepo iyapuki momudo wa ka shikula ko pefimbo lOpentekoste. POpentekoste oyo, omulonga womeva e na omwenyo owa li wa kunguluka eshi ovahongwa 120 va li va hovela okuudifila ovanhu. Ndele fimbo ovahongwa ovo va li inava tililwa omhepo iyapuki, kapa li omhepo, sha hala okutya, kapa li omuhongwa waKristus a vaekwa nomhepo iyapuki noku na eteelelo lokuya meulu.

Ovanhu vamwe ova li va popya shi na sha nehongo laJesus va ti: “Oshili ou omuprofeti winya,” tashi dulika va li tava popi shi na sha nomuprofeti munene e dule Moses oo kwa li a udanekwa. Ovanhu vamwe ova ti: ‘Ou oKristus.’ Ndele vamwe ova li tava sheke tava ti: “Kristus ota di tuu kuGalilea? Omushangwa itau ti: Kristus ota di moludalo laDavid nomoshilando shaBetlehem, oku kwa li David?”

Onghee hano, mokati keemhunga dovanhu omwa li mwa holoka okuhaudafana. Ovanhu vamwe ova li va hala Jesus a kwatwe po, ndele kape na oo a li e mu kwata. Eshi ovapolifi va li va shuna vehe li naJesus, ovapristeri ovakulunhu nOvafarisai ova li ve va pula va ti: “Oshike hano inamu mu eta oku?”

Ovapolifi ovo ova li va nyamukula va ti: “Kapa li omunhu noshito, a popya ngaashi winya ta popi.”

Osho osha li sha handukifa ovawiliki vomalongelokalunga neenghono nova li va hovela oku va sheka, oku va lundila noku va ula nai. Ova li ve va ula va ti: “Nanye yo omwa pukifwa mbela? Ope na tuu mbela nande umwe womovakulunhu e mu itavela, ile umwe womofarisai? Ndele ovanhu ava, inava shiiva omhango, ova fingwa.”

Nikodemus oo a li Omufarisai nomupangeli wOvajuda (sha hala okutya, oshilyo shomhangu yopombada yOvajuda), okwa li a popila Jesus nopehe na oumbada. Otashi dulika to dimbuluka kutya omido mbali netata da tetekela, Nikodemus okwa li a ya kuJesus oufiku nokwa li e mu itavela. Onghee hano, Nikodemus okwa ti: “Omhango yetu otai pe tuu omunhu etimba mbela fimbo ina pwilikinwa, ye a udike eshi a ninga?”

Ovafarisai ova li va handuka neenghono eshi umwe womuvo naye a li ta yambidida Jesus. Ova li va pula Nikodemus tava sheke tava ti: “Naave yo [owomuGalilea], hamba? Konakona u tale, muGalilea ihamu di nande omuprofeti.”

Nonande Omishangwa inadi popya kondadalunde kutya muGalilea otamu ka dja omuprofeti, otadi ulike kutya Kristus okwa li ta ka dja muGalilea eshi da ti kutya “ouyelele muhapu” otau ka monika moshitukulwa osho. Shimwe vali, Jesus okwa li a dalelwa muBetlehem nokwa dja moludalo laDavid. Nonande Ovafarisai otashi dulika va li ve shii kutya Jesus okwa dalelwa peni, otashi dulika ovo va li va tandavelifa eudeko la puka li na sha naJesus olo la li movanhu. Johannes 7:32-52; Jesaja 8:23–9:1; Mateus 4:13-17.

▪ Oshike sha li hashi ningwa po ongula keshe yefiku lOshivilo shOmatwali, nongahelipi Jesus a li a popya shi na sha naasho?

▪ Omolwashike ovapolifi va li va dopa okukwata po Jesus, novawiliki vomalongelokalunga ova li ve linyenga ngahelipi?

▪ Nikodemus okwa li lyelye, nokwa li e na etaleko la tya ngahelipi shi na sha naJesus, nOvafarisai vakwao ova li va ungaunga ngahelipi naye?

▪ Oumbangi ulipi wa li tau ulike kutya Kristus okwa li ta ka dja muGalilea?