Etukulwa 68

Jesus ta twikile okuhonga ovanhu mefiku etiheyali lOshivilo shOmatwali

OSHA li natango efiku laxuuninwa lOshivilo shOmatwali, efiku etiheyali. Jesus okwa li ta hongele ovanhu moshitukulwa shotembeli omo mwa li mu na ‘oshikefa shoiyandjwa.’ Oshikefa osho otashi dulika sha li shi li monhele oyo hai ifanwa Oshihale shOvakainhu, omo mwa li oikefa yokutula omayambidido.

Onguloshi keshe pefimbo loshivilo, monhele omo omwa li hamu kala ouyelele we likalekelwa. Omwa li hamu tulwa oixwekelwashela ine inene, oyo keshe shimwe sha li hashi kala shi na oiyasha ine inene i yadi omahooli. Ouyelele weelamba odo di na omahooli e li moiyasha 16 owa li hau kala wa yeleka nawa omudingonoko aushe efimbo loufiku. Jesus otashi dulika a li a dimbulukifa ovapwilikini vaye shi na sha naasho eshi a li a popya a ti: “Aame ouyelele wounyuni; ou ta shikula nge, ita ende momulaulu, ndele ota kala e nouyelele womwenyo.”

Ovafarisai ova li va ula Jesus va ti: “Ove to lihepaulula mwene, elihepaululo loye li he shii kulineekelwa.”

Jesus okwa li e va nyamukula a ti: “Nande handi lihepaulula, ehepaululo lange oli shii kulineekelwa, osheshi Ame ndi shii apa nda dja, naapa handi i, ndele nye kamu shii apa nda dja naapa handi i.” Okwa li yo a weda ko a ti: “Ame ou handi lihepaulula mwene, naTate ou a tuma nge ota hepaulula nge.”

Ovafarisai ova li ve mu pula va hala okushiiva tava ti: “Xo oku li peni?”

Jesus okwa li e va nyamukula a ti: “Kamu shii nge, naTate kamu mu shii; ngeno omu shii nge, ngeno naTate omu mu shii.” Nonande Ovafarisai ova li natango va hala Jesus a kwatwe po, kape na oo a li e mu kwata.

Jesus okwa ti vali: ‘Ame ohandi di po. Oku handi i, itamu shiiva okuya ko.’

Osho osha li sha kumwifa Ovajuda ndele tava ti: “Ote lidipaa mbela, eshi ta ti: Oku handi i, itamu shiiva okuya ko?”

Jesus okwa li a yelifa a ti: “Nye ovopedu, Aame owopombada, nye ovomounyuni ou, Ame nghi fi womounyuni ou.” Opo nee okwa li a weda ko a ti: “Osheshi ngenge itamu itavele nokutya, Aame tuu ou, otamu ka fila momatimba eni.”

Osha yela kutya Jesus okwa li ta popi shi na sha nokukala po kwaye fimbo ina ninga omunhu wokombada yedu nosho yo okukala kwaye e li Messias ile Kristus oo a li a udanekwa. Ndele nande ongaho, ova li ve mu pula nodino tava ti: “Oove lyelye hano?”

Molwaashi ovanhu ovo kava li va itavela Jesus, Jesus okwa li e va nyamukula a ti: “Omolwashike handi popi nokuli nanye?” Opo nee okwa li a twikila ko a ti: “Ou a tuma nge Oye omunashili, naashi nda uda kuye, ohandi shi tongo kounyuni.” Jesus okwa li a weda ko vali a ti: “Omona wOmunhu nge mwe mu yelula pombada, opo nee tamu ka dimbulukwa nge nokutya, Aame tuu ou, osho ihandi longo sha muame mwene, ndelenee osho Tate e shi a longa nge, osho ashike handi shi tongo. Naau a tuma nge oku li puame. Ina fiya nge po andike, osheshi ohandi longo ashishe eshi she mu wapalela.”

Eshi Jesus a popya eendjovo odo, ovanhu vahapu ova li ve mu itavela. Jesus okwa li e va lombwela a ti: “Ngenge tamu kala meendjovo dange, onye ovalongwa vange shili, ndele tamu ka shiiva oshili, noshili otai mu mangulula.”

Ovapataneki vaJesus ova ti: “Fye oludalo laAbraham, tu he na apa twa li ovapika vomunhu. Oto ti ngahelipi hano, otamu ka mangululwa?”

Nonande Ovajuda luhapu ova kala tava pangelwa kovanhu vokoilongo imwe, kava li hava tale ko ovapangeli va tya ngaho ve li oovene vavo. Ova li hava a nye okwiifanwa ovapika. Ndele Jesus okwa li a ulika kutya ove li ovapika. Ongahelipi mbela a li eshi ulika? Jesus okwa ti: “Oshilishili ohandi mu lombwele: Keshe tuu ou ta longo oulunde, oye omupika woulunde.”

Ovajuda ova li ve li monghalo ya nyika oshiponga eshi va li va anya okudimina kutya vo ovapika voulunde. Jesus okwa li e va yelifila a ti: “Omupika iha kala alushe meumbo, omona oha kala alushe.” Molwaashi omupika ke na oufemba wokufyuulula oinima yomwene waye, otashi dulika a lekelwe efimbo keshe. Omona oo a dalwa komwene waye ile oo ta tekulwa meumbo oye ashike ta dulu okukala mo “alushe,” sha hala okutya, fimbo e na omwenyo.

Jesus okwa li a twikila ko a ti: “Omona ngenge te mu mangulula, omwa manguluka shili.” Onghee hano, oshili oyo tai mangulula ovanhu oyo oshili i na sha nOmona, Jesus Kristus. Ovanhu otava dulu ashike okumanguluka mo moulunde oo hau eta efyo okupitila mekuliloyambo lomwenyo waJesus wopanhu wa wanenena. Johannes 8:12-36, yelekanifa NW.

▪ Mefiku etiheyali Jesus okwa li a hongela ovanhu peni? Oshike sha li hashi ningwa po oufiku monhele oyo, naasho osha li sha pambafana ngahelipi nehongo laJesus?

▪ Jesus okwa ti kutya okwa dja peni, naasho otashi holola shike shi na sha naye?

▪ Omeityo lilipi Ovajuda va li ovapika, ndele oshili ilipi ya li tai ke va mangulula?