Etukulwa 81

Ovanhu tava kendabala natango okudipaa Jesus

JESUS okwa li ta ende monhele ya amenwa oyo ya li hai ifanwa omukala wa ningwa neengudi waSalomo, molwaashi osha li okufu. Onhele oyo oya li ya shaama notembeli. Opo nee Ovajuda ova li ve mu dingilila ndele tava ti: “Fiyo onaini to tu kaleke momalimbililo? Oove ngenge oKristus, tu lombwela hano odikilila.”

Jesus okwa li e va nyamukula a ti: “Onde shi mu lombwela, ndele nye inamu itavela.” Jesus ka li e va lombwela odikilila kutya oye Kristus, ngaashi a li a lombwela omukainhu Omusamaria oo a shakenene naye pondungu. Ndele okwa li e va hololela kutya oye lyelye eshi a li te va yelifile kutya okwa dja meulu nokwa kala ko fimbo Abraham ina dalwa.

Jesus okwa li a hala ovanhu va fike pexulifodiladilo vo vene kutya oye Kristus mokuyelekanifa oilonga yaye nosho yo osho Ombibeli ya xunganeka shi na sha naasho Kristus a li ta ka wanifa po. Hano omolwaasho Jesus a li a kunghilila nale ovahongwa vaye vaha lombwele nande omunhu kutya oye Kristus. Okwa li yo a lombwela ovatondi vaye ovo Ovajuda, a ti: “Oilonga ei handi i longo medina laTate, otai hepaulule nge. Ndelenee nye itamu itavele.”

Omolwashike Ovajuda va li inava itavela? Mbela omolwaashi pa li pehe na oumbangi oo tau ulike kutya Jesus oye Kristus? Hasho nandenande, ndele omolwetomheno olo Jesus a li a yandja eshi a li e va lombwela, a ti: “Osheshi kamu fi eedi dange. Eedi dange ohadi udu ondaka yange, naame ondi di shii, ndele odo tadi shikula nge. Ndele Ame ohandi di pe omwenyo waalushe, ndele odo itadi ka kana fiyo alushe, ndele kape na ou te di vakula mo meke lange. Tate ou e di pa nge, oku dule aveshe, ndele kape na ou ta dulu oku di vakula mo meke laTate.”

Opo nee Jesus okwa li a yelifa ekwatafano lopofingo olo e na naXe, a ti: “Ofye naTate umwe.” Molwaashi efimbo olo Jesus okwa li kombada yedu, naXe oku li meulu, osha yela kutya ka li a hala okutya ye naXe omunhu umwe. Ponhele yaasho, okwa li a hala okutya ye naXe ove na elalakano limwe nove na oukumwe.

Ovajuda ova li va handukifwa keendjovo daJesus ndele tava toola omamanya ve mu dipae, ngaashi va li va kendabala nale pefimbo lOshivilo shOmatwali. Jesus okwa li a popya nouladi nOvajuda ovo va li va hala oku mu dipaa, a ti: “Ame onde mu ulikila oilonga iwa ihapu ya dja muTate; oshilonga shilipi po mwa hala oku shi dipaela nge nomamanya?”

Ovajuda ova li va nyamukula va ti: “Itatu ku dipaa nomamanya molwoshilonga shiwa, ndelenee omolweshekokalunga [naashi] Ove to liningi Kalunga, nande Oove omunhu.” Omolwashike Ovajuda tava tile ngaho ngeenge Jesus ke na efiku a tile kutya oye kalunga?

Ovajuda ova li va popya ngaho tashi dulika molwaashi Jesus a ti kutya oku na eenghono odo tava diladila kutya odaKalunga ashike. Pashihopaenenwa, Jesus okwa li opo a popi kutya “eedi” daye ‘ote di pe omwenyo waalushe,’ oo itau dulu okuyandjwa komunhu wonhumba. Ovajuda ovo ova li ve lipwililikila oushili oo Jesus a li a popya kutya okwa pewa eenghonopangelo kuXe.

Jesus okwa li a ulika kutya Xe oku mu dule, eshi a li a pula a ti: “Momhango yeni [mEpsalme 82:6] inamu shangwa: Ame onda tya: onye ookalunga? Oye ngenge ta ifana venya va pewa eendjovo daKalunga, ookalunga . . . otamu ti ngahelipi kuou, Xe okwe mu yapula nokwe mu tuma mounyuni: to sheke, shaashi nda tya: Aame Omona waKalunga?”

Molwaashi Omishangwa ohadi ula nokuli novapanguli vopanhu ovo vehe fi ovayuki “ookalunga,” Ovajuda ova li va mona Jesus epuko lashike eshi a ti kutya: “Aame Omona waKalunga”? Jesus okwa li a weda ko a ti: “Ngenge ihandi longo oilonga yaTate, inamu itavela nge. Ndelenee, ngenge handi i longo, nande itamu itavele nge, itaveleni oilonga ei, opo mu shiive ndele mu ude ko nokutya, Tate oku li muame naame ondi li muTate.”

Eshi Jesus a li a popya eendjovo odo, Ovajuda ova li tava kendabala oku mu kwata. Ndele Jesus okwa li a ya onhapo, ngaashi a ningile pOshivilo shOmatwali. Okwa li a dja mo muJerusalem ndele ta i kombinga ikwao yomulonga waJordan oko Johannes a li a hovela okuninginifa ovanhu konyala omido nhee da pita. Onhele oyo otashi dulika kaya li kokule nomunghulofuta wokolukadi lefuta laGalilea, opo pa li hapa endwa omafiku avali ile e dule po okudja kuJerusalem.

Ovanhu vahapu ova li ve uya kuJesus ndele tava ti: “Johannes ina longa nande oshilongadidiliko, ndele aishe ei Johannes a tongela ou, oyoshili.” Kungaho, ovanhu vahapu ova li va itavela Jesus. Johannes 10:22-42; 4:26; 8:23, 58; Mateus 16:20.

▪ Jesus okwa li a hala ovanhu va shiive kutya oye Kristus okupitila mushike?

▪ Omeityo lilipi Jesus naXe ve li omunhu umwe?

▪ Omolwashike tashi dulika Ovajuda va li tava ti kutya Jesus ote liningi kalunga?

▪ Eendjovo daJesus odo a li a tofa mEpsalme otadi ulike ngahelipi kutya ina hala okutya kutya oku fike pamwe naKalunga?