Etukulwa 69

Ovawiliki vOvajuda tava tu eemhata shi na sha naXe yaJesus

PEFIMBO lOshivilo shOmatwali, Jesus novawiliki vOvajuda ova li va twikila eenghundafana davo. Jesus okwa ti: “Ame ondi shi shii nokutya, nye oludalo laAbraham, ndele omwa hala okudipaa nge, shaashi eendjovo dange inadi mona onhele munye. Ame ohandi tongo eshi nde shi mona puTate, nanye yo tamu longo eshi nye mwa mona kuxo.”

Nonande Jesus ka li a popya kutya xe yavo olyelye, okwa li a yelifa nawa kutya ye oku na Xe e lili. Molwaashi ovawiliki vOvajuda ovo kava li ve shii kutya Jesus okwa li ta diladila shi na sha nalyelye, ova li va nyamukula tava ti: “Abraham oye tate yetu.” Ova li tava diladila kutya ove na eitavelo la fa laAbraham oo a li kaume kaKalunga.

Jesus okwa li e va pa enyamukulo olo la li le va halukifa a ti: “Ngeno nye ovana vaAbraham, ngeno hamu longo oilonga yaAbraham.” Doshili, omona washili oha hopaenene xe. Jesus okwa ti: ‘Paife omwa hala okudipaa nge, omunhu ou nde mu lombwela oshili, oyo nda uda kuKalunga. Abraham ina ninga ngaho.’ Jesus okwa li vali a popya a ti: “Nye ohamu longo oilonga yaxo yeni.”

Ndele nande ongaho, kava li natango ve udite ko kutya Jesus ota popi shi na sha nalyelye. Natango ova li tave liti kutya vo ovana vaAbraham shili, va li tava ti: “Fye inatu dalwa moluhaelo.” Molwaashi ova li tave liti kutya vo ovalongelikalunga vashili ngaashi Abraham, ova tya: “Otu na Tate umwe aeke, Kalunga.”

Ndele mbela Kalunga oye ngoo shili a li Xe yavo? Jesus okwa ti: “Ngeno Kalunga oXo yeni, ngeno omu hole nge, osheshi Ame nda dja muKalunga, onde uya nda dja kuye; Ame inandi dja muame mwene, ndelenee Ye okwa tuma nge. Oshike inamu uda ko ondaka yange?”

Jesus okwa li a kendabala okuulikila ovawiliki vOvajuda ovo kutya otava ka mona oilanduliko ilipi eshi inave mu itavela. Okwa li e va lombwela a ti: “Nye omu na xo yeni, Satana, ndele ouhalu waxo yeni mwa hala oku u wanifa.” Ondiaboli oxe e na omaukwatya a tya ngahelipi? Jesus okwa li a popya shi na sha nomaukwatya aSatana a ti kutya omudipai nokwa ti yo kutya: “Omunaipupulu naxe yayo.” Lwaxuuninwa, Jesus okwa li a popya a ti: “Ou womuKalunga, oye ta udu eendjovo daKalunga. Nye itamu di udu, osheshi kamu fi vomuKalunga.”

Molwaashi Ovajuda ovo ova li va handuka eshi Jesus e va nyaneka pomutenya, ova li ve mu nyamukula va ti: ‘Inatu popya mbela da yuka, eshi twa tya kutya Oove Omusamaria nou na ondemoni?’ Oshitya “Omusamaria” osha li hashi longifwa shi li outumbulilo wodino nokuula ovanhu nai molwaashi Ovasamaria ova li ve tondike kOvajuda.

Jesus ka li e na ko nasha naashi a li a ulwa kutya ye Omusamaria, onghee okwa li e va nyamukula a ti: “Nghi nondemoni, ohandi fimaneke Tate, ndele nye otamu fifa nge ohoni.” Jesus okwa li a twikila ko ta udaneke ta ti: “Ngenge ope na ou ta diinine eendjovo dange, ita ka mona efyo fiyo alushe.” Jesus ka li a hala okutya ovashikuli vaye aveshe itava ka makela efyo lovene. Ponhele yaasho, okwa li ta ti kutya itava ka hanaunwa po fiyo alushe, ile itava ka fya “efyo etivali” olo ovanhu itava ka mona vali omhito yokunyumunwa.

Ovajuda ova li va uda ko eendjovo daJesus meityo lolelalela. Onghee hano, ova li va tya: “Paife otu shi shii nee ou na ondemoni. Abraham okwa fya novaprofeti, ndele ove to ti: ngenge pe na ou ta diinine eendjovo dange, ita ka makela efyo fiyo alushe. Ove u dule mbela tate Abraham, ou a fya, novaprofeti va fya, ove oto liningi omushike hano?”

Meenghundafana davo adishe, osha yela kutya Jesus okwa li ta hololele ovalumenhu ovo oushili oo kutya oye Messias omuudanekwa. Jesus ka li a nyamukula epulo lavo odikilila kutya oye lyelye, ndele ponhele yaasho okwa ti: “Ame ngenge handi lifimaneke mwene, efimano lange olongaho, ndelenee ope na Tate ou ta fimaneke nge, Oye tuu tamu ti Oye Kalunga keni. Ndele nye kamu mu shii, Ame ondi mu shii. Ngeno Ame ndi tye kandi mu shii, ngeno Ame omunaipupulu ngaashi nye.”

Jesus okwa li a twikila natango ta popi shi na sha naAbraham oo a li omudiinini a ti: “Xo yeni Abraham okwa hafela unene okumona efiku lange, ndele okwe li mona ndee ta nyakukwa.” Doshili, nomesho eitavelo, Abraham okwa li a teelela okuuya kwaMessias oo a li a udanekwa. Ovajuda ovo va li vehe na eitavelo ova li va nyamukula va ti: “Omido doye inadi fika komilongo itano, ndele wa mona Abraham?”

Jesus okwa li e va nyamukula a ti: “Oshili ohandi mu lombwele: Abraham fimbo ina dalwa, Ame opo ndi li.” Jesus okwa li ta popi shi na sha nokukala po kwaye eshi a li omunhu wopamhepo omunaenghono meulu fimbo a li i ne uya kombada yedu.

Ovajuda ovo ova li va kufa omamanya va denge Jesus molwaashi ova li ve mu handukila eshi a ti kutya oko a kala fimbo Abraham ina dalwa. Jesus okwa li a hondama ndele ta i kondje yotembeli ina yahamekwa sha. Johannes 8:37-59; Ehololo 3:14; 21:8.

▪ Jesus okwa li a ulika ngahelipi kutya ye novatondi vaye ove na ooxe va yoolokafana?

▪ Ovajuda ova li va hala okutya shike eshi va li tava ula Jesus kutya Omusamaria?

▪ Jesus okwa li a hala okutya ngahelipi eshi a ti kutya ovashikuli vaye itava ka makela efyo?