Etukulwa 79
Oshiwana sha kana, ndele haashishe
DIVA konima eshi Jesus a li ta kundafana novanhu ovo va li va ongala peumbo lOmufarisai umwe, ovanhu vamwe ova li ve mu lombwela kombinga ‘yOvagalilea ovo [omupangeli waRoma Pontius] Pilatus a li a lumbakanifa ohonde yavo mumwe nomaxwikiloyambo avo.’ Ovagalilea ovo otashi dulika ovovo va li va dipawa eshi Ovajuda omayovi va li va tukululila Pilatus oshibofa eshi a li a longifa po oimaliwa yomoshikefa shotembeli opo a tungife omukangha wokweeta omeva muJerusalem. Ovanhu ovo va li va lombwela Jesus kombinga yoshinima osho otashi dulika va li tava diladila kutya Ovagalilea ovo ova li va mona oixuna omolwoukolokoshi wavo.
Jesus okwa li a pukulula ovanhu ovo eshi a li e va pula a ti: “Omu shii Ovagalilea venya va hepekwa ngaha ova li ovalunde ve dule Ovagalilea vakwao? Ahowe.” Opo nee Jesus okwa li a popya kombinga yoshiponga osho opo a londwele Ovajuda, a ti: “Ngenge itamu lidilulula, osho nanye yo tamu ka nyonauka po amushe.”
Jesus okwa li vali a longifa oshiponga shimwe osho sha li sha ningwa moshitukulwa omo, tashi dulika a li e shi kwatakanifa nokutungwa kwomukangha womeva. Okwa li a pula a ti: “Ile mu shii omulongo nava-8 venya va fya, eshi va wilwa koshungo yomuSiloa ova li ovalunde ve dule Ovajerusalem ovakwao aveshe?” Jesus okwa li a nyamukula kutya ovanhu ovo inava fya molwaashi va longa owii wonhumba. Ponhele yaasho, oiponga ya tya ngaho luhapu ohai etifwa ‘kefimbo nombadilila.’ Jesus okwa li vali a longifa oshiningwanima osho opo a londwele ovanhu a ti: “Ngenge itamu lidilulula, osho tuu tamu ka [nyonauka] po amushe.”
Jesus okwa li yo a yandja efaneko la yeleka, a ti: “Okwa li ku na omunhu e na omukwiyu wa twikwa mepya laye lomiviinyu, ndele ye okwe uya okukonga mo oiimati muwo, ye ine i mona ko. Ndele a lombwela omulongi wepya lomiviinyu: Tala, omido nhatu nda ile okukonga oiimati momukwiyu ou, ame inandi mona mo sha. U ka po. Oshike tau kufa ashike edu eenghono? Ndelenee winya okwe mu nyamukula ta ti: Omwene, u efa manga neudo, fimbo handi u helele vali, ndele ndi u tutile oushosho. Kashiimba tau imi tuu omudo ou tau uya, ndele ngenge [itau] imi, opo nee nau kewe po.”
Jesus okwa li a kendabala oule womido di dule punhatu okukwafela Ovajuda va kale ve na eitavelo. Ndele okwa li ashike a mona ovahongwa omafele manini ovo va li oiimati yoilonga yaye. Pefimbo lomudo omutine woukalele waye, Jesus okwa li ta longo noudiinini, ta fe pafaneko nokutula oushosho pomiti domikwiyu odo da li tadi faneke Ovajuda mokuudifa nouladi nokuhonga muJudea naPerea. Ndele nande ongaho, ka li a pondola. Oshiwana kasha li sha hala okulidilulula nomolwaasho osha li sha wana okuhanaunwa po. Ovanhu ashike vanini va li va tambula ko etumwalaka laye.
Diva konima yaasho, Jesus okwa li a ka honga moshinagoga mEshabata. Okwa li a hanga mo omukainhu umwe oo a li ha ende a petama oule womido 18 molwaashi okwa kala ta hepekwa kondemoni. Jesus okwa li a popya naye nombili, a ti: “Omukainhu, wa veluka koudu woye.” Opo nee Jesus okwa li a kuma omukainhu oo, nomukainhu okwa li a hovela okuyukilila ndele ta fimaneke Kalunga.
Omukulunhu woshinagoga okwa li a handuka, ndele ta ti: “Oku na omafiku a-6 oilonga, ileni hano momafiku oo mu velulwe, ndele hameshabata.” Omukulunhu woshinagoga oo okwa li a dimina kutya Jesus oku na eenghono dokuvelula ndele okwa li a tokola ovanhu eshi va li ve uya okuvelulwa mEshabata.
Jesus okwa li a lombwela omukulunhu woshinagoga oo a ti: “Omunaihelele ove, nanye yo ihamu pitifa mo ongobe ile okambulu keni moshiunda meshabata, nye mu ke ka xwile? Ndelenee omukainhu ou, omona waAbraham, Satana e mu kwatelela meemango, tala, omido 18 nokuli, a ha mangululwe hamba meemango edi mefiku leshabata?”
Eshi ovanhu ovo va li tava pataneke Jesus va li va uda eendjovo odo, ova li va fya ohoni. Ndele eemhunga dovanhu oda li da hafa omolwoinenelonga aishe oyo Jesus a li a ninga. Jesus okwa li a popya novanhu a endulula omafaneko avali opaxunganeko e na sha nOuhamba waKalunga, oo a li a longifa fimbo a li mowato pefuta laGalilea konima yomudo umwe. Lukas 13:1-21; Omuudifi 9:11, NW; Mateus 13:31-33.
▪ Oiponga ilipi ya li ya tumbulwa, na Jesus okwa li e i longifa ngahelipi opo a honge ovanhu?
▪ Efaneko li na sha nomukwiyu oo ihau ima nosho yo eenghendabala doku u kwafela u ime otali dulu ngahelipi okutulwa moilonga?
▪ Omukulunhu woshinagoga okwa li a dimina shike shi na sha neenghono daJesus dokuvelula, nongahelipi Jesus a li a nyaneka pomutenya oihelele yomulumenhu oo?