Etukulwa 92

Jesus ta velula ovanashilundu molweendo laye laxuuninwa lokuya kuJerusalem

JESUS okwa li a ya moshipala omhangela yoilyo yOmhangu yoPombada oyo ya li ya hala oku mu dipaa eshi a li a dja mo muJerusalem ndele ta i koshilando shedina Efraim osho tashi dulika sha li eekilometa 24 ile di dule po koushilolundume waJerusalem. Jesus okwa kala konhele oyo pamwe novahongwa vaye, kokule novatondi vaye.

Opaasa yomo 33 O.P. oya li ya ehena popepi, na Jesus okwa li e na vali okuya molweendo. Okwa li a pita muSamaria a yuka kuGalilea. Osho osha li oshikando shaxuuninwa ta talele po onhele oyo fimbo ina fya. Eshi va li muGalilea, Jesus novahongwa vaye otashi dulika va li va ya pamwe novanhu ovo va li va ya molweendo lokuya kuJerusalem va ka dane Opaasa. Ova li va ya nondjila oyo ya li ya pita moshitukulwa shaPerea, koushilo womulonga waJordan.

Fimbo va li molweendo, Jesus okwa li a ya momukunda oo tashi dulika wa li muSamaria ile muGalilea, nokwa li a shakenekwa kovalumenhu omulongo ovo va li ve na oudu woshilundu. Omukifi oo mu nyanyalifa ohau lemaneke kanini nakanini oilyo yolutu lomunhu ngaashi ominwe dokeenyala nodokeemhadi, omatwi, eyulu nosho yo omilungu. Opo ku amenwe vamwe vaha kwatwe koshilundu, Omhango yaKalunga oya li ya popya kutya omunashilundu ‘oku na okutuvikila eendjedi daye nokwiingida: Omunashilundu! Omunashilundu! Ye ta kala ina yela, fimbo oudu u li muye noku na okulikalela.’

Molwaashi ovanashilundu ovo ova li ve shii omangabeko oo Omhango ya li ya tulila po ovanashilundu, ova li kokule naJesus. Ndele nande ongaho, ova li va ingida mokule tava ti: “Jesus, omuhongi, tu filonghenda!”

Jesus okwa li e va wete ve li kokule ndele te va lombwele ta ti: “Indeni mu ke liulikile kovapristeri.” Jesus okwa li a lombwela ovanashilundu ovo ngaho molwaashi Omhango yaKalunga oya li ya pa ovapristeri eenghonopangelo okulombwela ovanashilundu ovo va veluka oshilundu kutya ova veluka filufilu. Kungaho, ova li hava pewa epitikilo va kale pamwe novanhu ovo itava vele.

Ovanashilundu ovo omulongo ova li ve na elineekelo kutya Jesus oku na eenghono okulonga oikumwifilonga. Onghee hano, ova li va ya kovapristeri tava endelele nonande pefimbo opo kava li va veluka. Fimbo va li mondjila, ova li va veluka, nokungaho ova li va pewa ondjabi omolweitavelo lavo. Opo nee ova li va mona nove udite kutya ova veluka.

Ovanashilundu omuwoi ovo va li va velulwa ova li va twikila nondjila yavo, ashike omunashilundu umwe oo a li Omusamaria okwa li a aluka a ka konge Jesus. Omolwashike mbela? Omolwaashi okwa li a pandula neenghono eshi a velulwa. Okwa li a tanga Kalunga ta ingida mokule, naashi a mona Jesus okwa li e linyongamena peemhadi daye noku mu pandula.

Jesus okwa li a pula a ti: “Hamulongo ovo va velulwa? Venya 9 ove li peni? Inaku monika vali nande oumwe a aluka, a hambelele Kalunga, omunailongo oye tuu aeke?”

Opo nee okwa li a lombwela omulumenhu oo Omusamaria a ti: “Fikama ove u ye, eitavelo loye le ku velula.”

Ngeenge hatu lesha shi na sha naashi Jesus a li a velula ovanashilundu ovo omulongo, natu kale alushe hatu dimbuluka oshilihongomwa osho hatu lihongo mepulo olo Jesus a li a pula a ti: “Venya 9 ove li peni?” Eshi ovanashilundu ovo omuwoi va li inava ulika olupandu lavo, ova li va nyona enyono la kwata moiti. Mbela ohatu ka kala twa fa Omusamaria, hatu ulike olupandu omolwoinima oyo Kalunga e tu pa, mwa kwatelwa eudaneko li na sha nomwenyo waalushe mounyuni mupe waKalunga wouyuki? Johannes 11:54, 55; Lukas 17:11-19; Leviticus 13:16, 17, 45, 46; Ehololo 21:3, 4.

▪ Ongahelipi Jesus a li a ya moshipala omhangela yaavo va li va hala oku mu dipaa?

▪ Jesus okwa li a ya vali peni, nokwa li ta i peni lela?

▪ Omolwashike ovanashilundu va li kokule naJesus, nomolwashike Jesus a li e va lombwela kutya nava ye kovapristeri?

▪ Oshike hatu lihongo mo moshimoniwa shovanashilundu ovo?