Henuka oinima oyo tai dulu oku ku piyaaneka ‘mefiku eli longhundana iwa’

OVANASHILUNDU vane ova li tava diladila kombinga yomatokolo oo va li ve na okuninga. Kape na oo a li e va pa oikwafa poshivelo shoshilando. Ovaarami (Ovaasiria) ova li va indika ovanhu vaha twale oikulya muSamaria opo Ovasamaria ve liyandje ile va fye ondjala. Kasha li tashi kwafa sha okuya moshilando molwaashi oikulya oya li ya ninga ondilo. Opa li yo pa udika ovanhu ovo va lya ombelela yovanhu vakwao. — 2 Eeh. 6:24-29.

Ovanashilundu ovo ova li va lombwelafafana va ti: ‘Natu ningei po sha. Omolwashike itatu ile konhanda yOvaasiria?’ Eshi kwa toka nokapa li oo a li e va wete, ova li va ya konhanda yOvaasiria. Eshi va fika po, opa li pa mwena, nokapa li ovanangeli. Eenghambe neendongi oda li da pandekwa, ndele kapa li ovakwaita. Ovanashilundu ovo ova li va talaatala monhanda, ndele kamwa li ovanhu, ashike omwa li mu yadi oikulya noikunwa. Opo nee ovanashilundu ova li va lya nokunwa. Ova li yo va mona oshingoli, oshisiliveri, oikutu nosho yo oinima imwe vali yondilo. Ova li va tuta mo oinima imwe ndele tave ke i holeka, nova li va aluka opo va ka tale ko vali ihapu. Ovaasiria ova li va fiya po onhanda yavo aishe. Jehova okwa li a ningifa Ovaasiria va ude omawi etangakwaita pashikumwifilonga. Kungaho, Ovaasiria ova li tava diladila kutya otava ponokelwa, ndele tava i onhapo. Onghee hano, ova li va fiya po oinima aishe, nakeshe umwe okwa li ta dulu oku i kufa po.

Ovanashilundu ovo ova li va kufa oinima i na ondilo monhanda noku i holeka. Ashike ovanashilundu ovo ova li tave lipula kombinga yovanhu ovo tava fi ondjala muSamaria, neliudo lavo ola li la hovela oku va pa oushima. Ova li va hovela okulombwelafana tava ti: “Inatu ninga osho sha yuka. Efiku eli olo efiku [longhundana iwa, OB-1986].” Ovanashilundu ova li va shuna diva kuSamaria ndele tava twala onghundana iwa i na sha naasho va mona. — 2 Eeh. 7:1-11.

Nafye otu li mefimbo olo taku dulu okutiwa kutya “efiku longhundana iwa.” Eshi Jesus a li ta popi kombinga yoiningwanima ididilikwedi i na sha ‘nedidiliko lexulilo lefimbo lounyuni,’ okwa li a popya kutya: “Evangeli [“onghundana iwa,” NW] eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” (Mat. 24:3, 14) Mbela osho oshi na oku tu kuma ngahelipi?

Oisho yopaumwene otai dulu oku tu wilila po

Ovanashilundu ovo ova li va dimbwa ovanhu ovo va li muSamaria oule wokafimbo molwaashi ova li va tunhukwa neenghono koinima oyo va li va mona. Pefimbo opo, ova li ashike va yandja elitulemo kwaasho va li tava dulu okumona. Mbela nafye ohatu dulu okuningilwa oshinima sha tya ngaho? ‘Ondjala’ oi li oshitukulwa shedidiliko lefimbo lexulilo longhalelo yoinima. (Luk. 21:7, 11) Jesus okwa li a londwela ovahongwa vaye a ti: “Lipashukileni, omitima deni di ha lolokifwe koitendele nokokukolwa nokoshisho shoipalwifa, efiku olo li he mu vakele ngaashi omwiyo.” (Luk. 21:34) Tu li Ovakriste, otu na okukala twa lungama tuha efe oisho yopaumwene i na sha nonghalamwenyo yakeshe efiku i tu dimbwife kutya otu li ‘mefiku longhundana iwa.’

Omukriste umwe wedina Blessing ka li a efa oisho yopaumwene i mu wilile po. Okwa li ta kokola ondjila, ta mane ofikola, nohauxuuninwa okwa ka hombolwa kOmubetel nokwa li yo a tambulwa a ka ninge oshilyo shoukwaneumbo waBetel moBenin. Blessing okwa ti: “Ohandi longo oilonga yokuwapaleka nohandi i hafele neenghono.” Blessing okwa hafa eshi ta diladila kombinga yeedula 12 odo a kala moilonga yefimbo li yadi nosho yo eshi a kala a yandja elitulemo ‘kefiku longhundana iwa’ olo tu li mulo paife.

Natu lungameni oinima oyo tai dulu okuhepifa efimbo letu

Eshi Jesus a li ta tumu ovahongwa 70, okwa ti: “Eteyo olo olihapu, ndele ovalongi ovo ovanini, ilikaneni hano Omwene weteyo a tume ovateyi meteyo laye.” (Luk. 10:2) Ngaashi ashike oilya tai dulu okuhepa pefimbo leteyo ngeenge ovateyi itava teya meendelelo, okuhakala twe litula moilonga yokuudifa nako otaku dulu okweetifa ekanifo leemwenyo. Jesus okwa li a weda ko a ti: “Inamu kunda nande omunhu mondjila.” (Luk. 10:4) Oshitya “kunda” osho sha tolokwa okudja melaka lopehovelo osha kwatela mo shihapu shihe fi ashike omapopifo ngaashi “wa lele po” ile “wa uhala po.” Okulikunda otaku dulu yo okukwatela mo okulipapatela nokuninga eenghundafana diledile odo tadi dulu okuningwa ngeenge omunhu okwa shakene nakaume kaye. Kungaho, Jesus okwa li a honga ovashikuli vaye va henuke oinima oyo tai dulu oku va piyaaneka nokuhepifa efimbo lavo inashi pumbiwa, molwaashi etumwalaka olo va li ve na okuudifa ola endelela.

Diladila ashike kutya oinima oyo hai piyaaneke ovanhu ohai dulu okumana po efimbo li fike peni! O-TV oya kala tai hepifa efimbo lihapu lovanhu oule womido i dule oinima ihapu. Mbela ongahelipi shi na sha neengodi dopeke nosho yo eekombiyuta dopaumwene? Ekonakono olo la ningwa shi na sha novakulunhu 1000 muBritania otali ulike kutya “efiku keshe omuvalu wovanhu vahapu muBritania ohau longifa ominute 88 meengodi dokopala, ominute 62 meengodi dopeke, ominute 53 tava tumu omatumwalaka moe-mail nosho yo ominute 22 tava shange omatumwalaka.” Ngeenge ominute adishe odo oda tulwa kumwe, otadi ka kala di dule lwomapa avali efimbo olo omukwafelikokolindjila ha longo moukalele efiku keshe. Mbela ove oho longifa efimbo li fike peni moinima oyo?

Ernst naHildegard Seliger ova li hava longifa efimbo lavo nelungi. Omido adishe odo va kala meekamba deenghwate daNazi nosho yo meedolongo dOukomonisi ngeenge oda wedwa kumwe, odi dule po 40. Konima eshi va mangululwa, ova kala ovakokolindjila fiyo osheshi va mana eengeda davo kombada yedu.

Ovanhu vahapu ova li va hala okushangela ovalihomboli ovo, nomolwaasho ova li tava dulu okulongifa eevili dihapu mokulesha nomokushanga eenhumwafo. Ndele ponhele yaasho, ova li va pitifa komesho oinima yopamhepo monghalamwenyo yavo.

Oshoshili kutya atusheni otu hole okukala tu na ekwatafano novaholike vetu, noshinima sha tya ngaho inashi puka nandenande. Oshiwa okukala hatu ningi oinima i lili noku lili ya unganekwa nawa momalipyakidilo etu efiku keshe. Ndele nande ongaho, otu na okukala twa lungama tuha piyaanekwe koinima oyo hai mane po efimbo mefiku eli lokuudifa onghundana iwa.

Natu udifeni onghundana iwa nawanawa

Kashi fi tuu enangeko noupuna okukala ‘mefiku longhundana iwa’! Inatu piyaanekwa nande ngaashi ovanashilundu va li va piyaanekwa oule wokafimbo. Natu dimbuluke kutya ovanashilundu ovo ova ka fika pexulifodiladilo va ti: “Inatu ninga osho sha yuka.” Sha faafana, inashi yuka kufye okweefa oinima yopaumwene ile oinima oyo hai mane po efimbo i tu imbe okukufa ombinga moukalele pauyadi.

Otu na oshihopaenenwa sha denga mbada osho hatu dulu okushikula. Eshi omuyapostoli Paulus a li a dilonga kombinga yomido 20 dotete doukalele waye, oshe mu linyengifa a shange ta ti: “Ame nda wanifa eudifo levangeli laKristus.” (Rom. 15:19) Paulus ka li a efa nande osha shi ninipike ouladi waye. Onghee hano, natu kale ovaladi ngaashi Paulus, eshi hatu udifa etumwalaka lOuhamba ‘mefiku eli longhundana iwa.’

[Efano pepandja 31]

Blessing ina efa oinima yopaumwene i mu imbe a kale moilonga yefimbo li yadi

[Efano pepandja 32]

Ernst naHildegard Seliger ova li hava longifa efimbo lavo nelungi