Etukulwa 112
Jesus e li poku ka dana Opaasa yaye yaxuuninwa
ESHI Etivali, 11 aNisan la li tali ehene popepi, Jesus okwa li ta manifa okuhonga ovayapostoli vaye kOmhunda yEemono. Kala li tuu efiku lomalipyakidilo nokulonga noudiinini! Fimbo tashi dulika va li tava shuna kuBetania oko va ka nangale, Jesus okwa li a lombwela ovayapostoli vaye a ti: “Onye omu shi shii, ngenge taku piti omafiku avali oku nopassa; nOmona wOmunhu ota yandjwa okuvalelwa.”
Otashi dulika Jesus novayapostoli vaye va li va fuda po efiku la landula ko, Etitatu, 12 aNisan. Efiku la tetekela okwa li a hanyena ovawiliki vomalongelokalunga moipafi, nokwa li a didilika kutya ova hala oku mu dipaa. Onghee hano, mEtitatu ka li a ya moipafi yovanhu, molwaashi ka li a hala okudana Opaasa pamwe novayapostoli vaye kwiiwe moshipala koshinima shonhumba konguloshi oyo.
Lwopokati opo, ovapristeri ovakulunhu nosho yo ovakulunhu voshiwana ova li va ongala moluumbo lomupristeri omukulunhu Kajafas. Molwaashi ova li va handuka eshi va li va tanguninwa kuJesus efiku la tetekela, ova li tava pangele eemhangela ve mu kwate moku mu kengelela noku mu dipaifa. Ndele nande ongaho, ova li tava ti: “Hapefimbo [loshivilo] shinene, pu ha ninge epiyaano movanhu.” Ova li va tila ovanhu ovo va li va hokwa Jesus.
Ofimbo ovawiliki vomalongelokalunga va li tava pangele omhangela va dipae Jesus, puvo opa li pe uya omunhu umwe. Ova li va kumwa molwaashi omunhu oo okwa li umwe womovayapostoli vaJesus, Judas Iskariot, oo a li a kunwa omadiladilo mai kuSatana opo a kengelele Omwene waye. Ovawiliki vomalongelokalunga ova li va hafa eshi Judas a li e va pula a ti: “Omwa hala okupa nge shike, ndi mu yandje momake eni?” Ova li va dimina nehafo oku mu pa oisilveri 30, ondado oyo ya li hai landwa omupika pahangano lOmhango yaMoses. Okudja opo, Judas okwa li ta kongo omhito iwa opo a yandje Jesus kuvo nopehe na eemhunga dovanhu.
Omafiku 13 aNisan okwa li a hovela mEtitatu eshi etango la ningina. Jesus okwa li a fika mEtitano okudja kuJeriko, naalo ola li efiku etihamano nolaxuuninwa olo a li a nangala muBetania. Efiku la landula ko, Etine, okwa li pe na okuningwa omalongekido axuuninwa e na sha nOpaasa, oyo ya li tai ka hovela ngeenge etango la ningine. Pefimbo opo odjona yOpaasa oi na okudipawa nokuyofwa aishe. Mbela openi va li tava ka danena Opaasa, noolyelye va li tava ka ninga omalongekido?
Jesus ka li a yandja omalombwelo a tya ngaho, tashi dulika opo Judas aha dule oku ka lombwela ovapristeri ovakulunhu va ka kwate po Jesus pefimbo lokudana Opaasa. Ndele pomhito ei, tashi dulika mEtine omutenya, Jesus okwa li a lombwela Petrus naJohannes eshi tava di kuBetania a ti: “Indeni mu ke tu longekidile odi yopassa tu i lye.”
Ova li va pula va ti: “Owa hala tu i longekidile peni?”
Jesus okwa li e va yelifila a ti: “Tala, ngenge tamu i moshilando, omulumenhu te mu shakeneke, ta humbata oshitoo shomeva, mu shikuleni mongulu omo ta i mo, ndele nye mu tye komwene weumbo: Omuhongi te ku lombwele: Olupale oli li peni, ndi lile mo odi yopassa pamwe novalongwa vange? Ndele ye ote mu ulikile olupale linene la wapalekelwa ovaenda, omo tuu tamu i longekidile.”
Osha yela kutya mwene weumbo olo okwa li omuhongwa waJesus, oo tashi dulika a li a teelela Jesus a ka pule eumbo laye opo va danene mo Opaasa. Ndele kashi na nee mbudi kutya oshike, eshi Petrus naJohannes va li va fika muJerusalem, ova li va hanga oinima aishe oyo Jesus a popya. Onghee hano, ovahongwa ovo vavali ova li va longekida odjona nova li va ninga omalongekido makwao e na sha nokufila oshisho eemhumbwe dovadani vOpaasa ve li 13, sha hala okutya, Jesus novayapostoli vaye 12. Mateus 26:1-5, 14-19; Markus 14:1, 2, 10-16; Lukas 22:1-13; Exodus 21:32.
▪ Jesus otashi dulika a li a ninga shike mEtitatu, nomolwashike?
▪ Okwoongala kwashike kwa li kwa ningwa meumbo lomupristeri omukulunhu, nonelalakano lashike Judas a li a ya kovawiliki vomalongelokalunga?
▪ Jesus okwa li a tuma oolyelye kuJerusalem mEtine, nomolwashike?
▪ Ovahongwa ovo va li va tumwa ova li va mona shike osho tashi ulike kutya Jesus oku na eenghono okulonga oikumwifilonga?