Etukulwa 117

Jesus a nyika oluhodi fimbo a li moshikunino shaGetsemane

ESHI Jesus a li a mana okwiilikana fimbo va li ve li monduda yopombada pamwe novayapostoli vaye 11 ovadiinini, ova li va imbila Jehova omaimbilohambelelo. Opo nee ova li va dja mo monduda oyo yopombada nova li va enda momilaulu doufiku oo wa li wa talala nawa. Ova li va tauluka efilu laKidron va yuka kuBetania. Ndele fimbo va li mondjila, ova li va kanghama ponhele oyo va li ve hole, oshikunino shaGetsemane. Oshikunino osho osha li shi li popepi nOmhunda yEemono. Jesus novayapostoli vaye okwa li hava shakene luhapu poshikunino osho mokati komiti dolumono.

Jesus otashi dulika a li a fiya ovayapostoli vaye vahetatu popepi noshivelo shoshikunino nokwa li e va lombwela ta ti: “Kaleni omutumba apa, fimbo handi i kwinya ndi ilikane.” Opo nee okwa li a ya moshikunino pamwe novayapostoli vaye vatatu, Petrus, Jakob naJohannes. Eshi va ya moshikunino, Jesus okwa li a nyika oluhodi neenghono nokwa li e va lombwela ta ti: “Omwenyo wange owa nyika oluhodi fiyo okufya, kaleni apa mu kale oupafi pamwe naame.”

Jesus okwa li a fiya po ovayapostoli vaye ovo oshinano shixupi ndele ta tu eengolo, nokwa li a ilikana a mana mo ta ti: “Tate, ngenge tashi dulika, eholo eli nali koye nge; ndele hangaashi Ame nda hala, ndelenee ongaashi Ove wa hala.” Jesus okwa li a hala okutya shike eshi a popya eendjovo odo? Omolwashike Jesus a li a “nyika oluhodi fiyo okufya”? Mbela ka li vali a hala okufya opo a kulile ovanhu? Hasho nandenande!

Jesus ka li ta pula a xupifwe mefyo. Jesus ka li nokuli a diladila okuhenuka efyo olo lopayambo ngaashi Petrus a li e mu ladipika pomhito imwe. Ndele ponhele yaasho, okwa li a nyika oluhodi molwaashi okwa li a tila kutya onghedi omo a li ta ka dipawa e li ngaashi omulongi wominyonena, otai ka shekifa edina laXe. Okwa li e wete kutya meni lefimbo lixupi okwa li ta ka valelwa komuti womahepeko a fa omukolokoshi oo ha sheke Kalunga. Onghee hano, osho osho sha li she mu nyikifa oluhodi neenghono.

Konima eshi Jesus a li a ilikana oule wefimbo, okwa li a shuna kovayapostoli vaye vatatu nokwa li a hanga va kofa. Okwa li a lombwela Petrus ta ti: ‘Omwa nyengwa okukala oupafi okafimbo kamwe pamwe naame. Kaleni oupafi, nye mu indile, mu ha hangike komahongaulo.’ Ndele molwaashi Jesus okwa li e shii kutya ovayapostoli vaye ovo ova li ve li moudjuu nefimbo olo okwa li kwa toka neenghono, okwa ti: “Omhepo oya hala, ndele ombelela i noungone.”

Opo nee Jesus okwa li a shuna vali oshikando oshitivali nokwa li a ilikana Kalunga kutya na kufe po “eholo eli,” sha hala okutya, oshinakuwanifwa osho e mu pa ile osho a hala a wanife po. Eshi a alukila natango kovayapostoli vaye ovo vatatu okwa li a hanga vali va kofa ofimbo va li va wana okukala tava ilikana opo vaha hangwe komayeleko. Eshi Jesus a li e va pula kava li ve shii kutya nava nyamukule shike.

Xuuninwa, Jesus okwa li a dja po vali puvo oshikando oshititatu, oule hanga woshinano shekupulo lekuma nokwa li a twa eengolo ndele ta ilikana mokule nota lili ta ti: “Tate, ngenge wa hala kufe nge eholo eli.” Jesus okwa li e udite ouyahame neenghono molwaashi okwa li e shii kutya eshi ta ka fya e li ngaashi omulongi wominyonena osha li tashi ka shekifa edina laXe. Jesus ka li ta dulu okulididimikila elundilo olo kutya oha sheke Kalunga.

Ndele nande ongaho, Jesus kwa li a twikila okwiilikana ta ti: “Ndele hahalo lange, ndelenee oloye.” Jesus okwa li ha dulika nehalo liwa kuKalunga. Pomhito oyo, omweengeli umwe a dja meulu okwa li e uya puye ndele te mu pameke neendjovo detwomukumo. Otashi dulika omweengeli oo a li a lombwela Jesus kutya Xe okwe mu hokwa.

Jesus ka li tuu e na oshinakuwanifwa shinene! Omwenyo waye waalushe nosho yo wovanhu aveshe owa li u li monghuwo i na onghambe. Jesus okwa li e udite nai neenghono pamaliudo. Onghee hano, okwa li a twikila okwiilikana a mana mo nokwa li ta di oshinhwi shohonde. O-The Journal of the American Medical Association oya ti: “Nonande osha pumba okumona omunhu ta di oshinhwi shohonde, . . . omunhu oha dulu okudja oshinhwi shohonde ngeenge e udite nai neenghono pamaliudo.”

Konima yaasho, Jesus okwa li a shuna vali kovayapostoli vaye oshikando oshititatu nokwa li a hanga natango va kofa. Ova li va nyika oluhodi nola li le va lolola neenghono. Jesus okwa li a ingida a ti: “Natango tuu omwa kofa notamu tulumukwa? Sha wana nee. Okafimbo oke uya. Tala, Omona wOmunhu ota yandjwa momake ovalunde. Yambukeni, tu yeni, tala, ou ta kengelele nge, oku li popepi.”

Fimbo Jesus a li ta popi natango, Judas Iskariot okwa li e uya puvo e li pamwe nongudu inene yovanhu va humbata eenyika neelamba nosho yo oilwifo. Mateus 26:30, 36-47; 16:21-23; Markus 14:26, 32-43; Lukas 22:39-47; Johannes 18:1-3; Ovaheberi 5:7.

▪ Konima eshi Jesus novayapostoli vaye va li va dja monduda yopombada ova li va ya peni, noshike Jesus a li a ka ninga?

▪ Fimbo Jesus a li ta ilikana, ovayapostoli ova li tava ningi shike?

▪ Omolwashike Jesus a li a nyika oluhodi, nokwa li a pula Kalunga a ninge shike?

▪ Eshi Jesus a li ta di oshinhwi shohonde osha li tashi ulike shike?