Etukulwa 118

Jesus ta kengelelwa nokukwatwa po

OSHA LI efimbo lokeengulasha eshi Judas a li a kwatela komesho ongudu inene yovakwaita, ovapristeri ovakulunhu, Ovafarisai nosho yo ovanhu vamwe vali ovo va li ve uya koshikunino shaGetsemane. Ovapristeri ova li va udaneka okupa Judas oishisiliveli omilongo 30 ngeenge okwa kengelele Jesus.

Osha yela kutya eshi Judas a li a lekelwa konima eshi va li va dana Opaasa, okwa li a ya kovapristeri ovakulunhu. Ovapristeri ovo ova li va ongaleka divadiva omalenga avo nosho yo ongudu yovakwaita. Judas otashi dulika a li a ya navo tete konhele oko Jesus novayapostoli vaye va li tava danene Opaasa. Eshi va mona kutya kave ko, Judas nongudu inene oyo ya li tai mu landula, oyo ya li ya humbata oilwifo, eelamba nosho yo eenyika, ova li va ya kondje yaJerusalem nova li va tauluka efilu laKidron.

Eshi Judas a li a kwatela komesho osheendo fiyo okOmhunda yEemono, okwa li e shii kutya openi ta dulu okuhanga Jesus. Oshivike sha tetekela, eshi Jesus novayapostoli vaye va li hava i kuBetania nosho yo kuJerusalem, luhapu ova li hava kanghama moshikunino shaGetsemane opo va fude po nova kundafane. Ndele mbela pefimbo opo, ovakwaita ova li tava ka mona ngahelipi Jesus oo a li e li mokati komiti dolumono omo mwa li mwa laula? Otashi dulika ovakwaita ovo kava li va mona nale Jesus. Onghee hano, Judas okwa li e va pa edidiliko a ti: “Ou handi mu fipi komulungu, Oye ou, mu kwateni, nye mu ye naye mwe mu diinina.”

Judas okwa li a ya pamwe nongudu inene yovanhu moshikunino, naashi a mona Jesus novayapostoli vaye, okwa li a ya puvo a yukilila puJesus. Judas okwa ti: “Rabbi, wa tokelwa!” ndele te mu fipi komilungu.

Jesus okwa ti: “Kaume, owa ila shike apa?” Jesus okwa li a nyamukula epulo laye mwene a ti: “Judas, Omona wOmunhu oto mu kengelelifa efipo lokomilungu?” Osho otashi ulike kutya Jesus okwa li a fya Judas ounye omolwoukengeleledi waye. Jesus okwa li a katuka a finda komesho mouyelele weenyika nosho yo weelamba ndele ta pula ta ti: “Olyelye tamu mu kongo?”

Ova li va nyamukula va ti: ‘OJesus Omunasaret.’

Jesus okwa li a nyamukula a ti: “Aame ou.” Eshi Jesus a li ta popi ngaho okwa li e li ofika komesho yavo e na ouladi. Molwaashi ovalumenhu ovo ova li va kuminwa ouladi waJesus nokava li ve shii kutya oshike Jesus a li ta ka ninga po, ova li va shuna monima ndele tava wile poshi.

Jesus okwa li a twikila ko ta popi a ngungumana ta ti: “Onde mu lombwela nale nokutya, Aame ou. Hano ngenge Ame tamu kongo nge, efeni ava va ye.” Konima yefimbo lixupi, eshi Jesus a li monduda yopombada pamwe novayapostoli vaye ovadiinini okwa li a ilikana kuXe ta ti kutya okwe va diinina nokape na nande oumwe womuvo ehe po kakele ‘komona wekano aeke.’ Jesus okwa li a pula ovanhu ovo va efe ovahongwa vaye va ye, tashi dulika opo eendjovo daye odo di wanifwe.

Eshi ovakwaita va li va ngungumana vali, ova li va fikama ndele tava mange Jesus. Ovayapostoli ova li ve wete kutya oshike sha li shi li pokuningwa po. Onghee hano ova li va pula va ti: “Omwene, natu denge neongamukonda?” Fimbo Jesus ine va nyamukula, Petrus okwa li a pweya mo eongamukonda limwe lomomaongamukonda avali oo va li va etelela, ndele ta ponokele nalo Malkus oo a li omupiya womupristeri omukulunhu. Petrus okwa li a shekuna omutwe womulumenhu oo ndele ta tete ko okutwi kwaye kwokolulyo.

Jesus okwa li a popya a ti: “Efeni, naasho shi ningwe.” Jesus okwa li a kwata okutwi kwaMalkus ndele te ku velula. Opo nee okwa li a honga oshilihongomwa sha fimanenena, a lombwela Petrus ta ti: “Shunifa mo eongamukonda loye moshilaleko shalo, osheshi aveshe ava tava kwata keongamukonda, otava fi keongamukonda. Ile ou shii, nghi dulu okwiindila Tate, a tumine nge paife ovaengeli ve dule eengudu da kula omulongo nambali!”

Jesus okwa li e liyandja nehalo liwa a kwatwe po, nomolwaasho a ti: “Omishangwa otadi wanifwa ngahelipi ngeno, odo tadi ti, oshi nokuningwa ngaha?” Opo nee okwa li a weda ko a ti: “Eholo eli Tate okwa pa nge, inandi li nwa mbela?” Jesus okwa li a dimina filufilu okulonga ehalo laKalunga.

Opo nee Jesus okwa li a lombwela eemhunga dovanhu odo da li de uya oku mu kwata po a ti: “Onye mwe uya okukwata nge ongaashi omukolokoshi, mu nomaongamukonda needibo. Omafiku aeshe kwa li nda kala omutumba motembeli ndele nda longa, nye inamu kwata nge. Ndelenee aishe ei oya ningwa, omishangwa dovaprofeti opo di wanifwe.”

Pomhito oyo ongudu yovakwaita, omukulunhu wetangakwaita nosho yo omalenga Ovajuda okwa li va kwata po Jesus ndele tave mu mange. Eshi ovayapostoli va mona osho sha ningwa po, ova li va fiya po Jesus ndele tava faduka po. Ndele omulumenhu umwe omunyasha, oo tashi dulika a li omuhongwa Markus, okwa li a fyaala mokati keemhunga dovanhu. Otashi dulika a li keumbo oko Jesus a li a danena Opaasa ndele ta shikula eemhunga dovanhu eshi da li de uya ko. Ovanhu ova li ve mu dimbuluka mo nova li va hala oku mu kwata. Markus okwa li a fiya po oshikutu shaye shokombada sholiina ndele ta faduka po. Mateus 26:47-56; Markus 14:43-52; Lukas 22:47-53; Johannes 17:12; 18:3-12.

▪ Omolwashike Judas a li e shii kutya ota hange Jesus moshikunino shaGetsemane?

▪ Jesus okwa li a ulika ngahelipi kutya oku na ko nasha novayapostoli vaye?

▪ Petrus okwa li a katuka onghatu ilipi opo a amene Jesus, na Jesus okwa li a lombwela Petrus shike?

▪ Jesus okwa li a ulika ngahelipi kutya okwa hala okulonga filufilu ehalo laKalunga?

▪ Olyelye a li a fyaala po eshi ovayapostoli va li va fiya po Jesus, noshike sha li sha ningwa po shi na sha naye?