Jesus a kwatwa po

Jesus novayapostoli vaye ova li va enda molufilu laKidron va yuka kOmhunda yEemono. Osha li mokati koufiku, nomwedi owa li wa tokeka. Eshi va fika koshikunino shaGetsemane, Jesus okwa ti: “Kaleni apa nye mu kale oupafi.” Opo nee Jesus okwa ya kokule kanini moshikunino ndele ta tu eengolo. Okwa li a ilikana kuJehova a nyika oluhodi neenghono ta ti: “Ehalo loye nali wanifwe.” Opo nee Jehova okwa tuma omweengeli a twe Jesus omukumo. Eshi Jesus a shuna kovayapostoli okwa hanga vatatu va kofa. Okwa tya: ‘Pendukeni! Eli halo efimbo lokukofa. Efimbo ola fika opo ndi yandjwe momake ovatondi vange.’

Diva Judas okwa li e uya, e kwetele komesho ongudu inene yovanhu va homata omaongamukonda needibo. Okwa li e shii kutya Jesus oku li peni molwaashi ova li have uya ko luhapu koshikunino osho. Judas okwa lombwela ovakwaita kutya ote ke va ulikila kutya Jesus elipi. Okwa ya a yuka puJesus ndele ta ti: ‘Omuhongi, wa tokelwa po,’ ndele te mu xupita. Jesus okwa ti: ‘Judas, oto kengelele nge nexupito?’

Jesus okwa ehena kongudu yovanhu ndele te i pula ta ti: ‘Otamu kongo lyelye?’ Ove mu nyamukula tava ti: ‘OJesus Omunasaret.’ Jesus okwa nyamukula ta ti: “Aame ou,” opo nee ovanhu ova shuna monima ndele tava wile pedu. Jesus okwa pula vali ovanhu ta ti: ‘Otamu kongo lyelye?’ Natango ova nyamukula tava ti: ‘OJesus Omunasaret.’ Jesus okwa nyamukula ta ti: ‘Onde mu lombwela kutya aame ou. Efeni ava va ye.’

Eshi Petrus a mona osho sha li tashi ningwa po, okwa pweya mo eongamukonda ndele ta tete ko okutwi kwaMalkus, omupiya womupristeri omukulunhu. Jesus okwa kwata okutwi komulumenhu oo ndele te ka velula. Opo nee Jesus okwa lombwela Petrus ta ti: ‘Shunifa mo eongamukonda loye. Ngeenge owa lu neongamukonda, oto ka fya keongamukonda.’ Ovakwaita ova kwata Jesus noku manga eenyala daye ndele ovayapostoli tava faduka po. Opo nee ovanhu ove mu twala kuHannas, omupristeri omukulunhu. Hannas okwe mu pulapula ndele te mu tumu keumbo lOmupristeri Omukulunhu, Kajafas. Ndele mbela oshike sha ningilwa ovayapostoli?