Etukulwa 121

Jesus ta hokololifwa mOmhangu yoPombada yOvajuda, opo nee ta twalwa kuPilatus

OKWA li taku hale okusha. Petrus okwa li e lidimbika Jesus oshikando oshititatu, noilyo yOmhangu yoPombada yOvajuda oya li ya mana okuninga eemhangu dayo dihe li pauyuki noya li ya shuna komaumbo. Ndele ongula inene yEtitano, oya li ya ongala natango, nopomhito opo oya li ya ongala molupale omo ya li hai ongalele. Oya li tai kendabala okuningifa oihokolola oyo ya li ya ningwa konguloshi i kale ya fa i li paveta. Eshi Jesus a li a etwa kuvo, ova li va popya ngaashi va li va popya onguloshi ya tetekela, va ti: “Oove ngenge Kristus, tu lombwela.”

Jesus okwa li e va nyamukula a ti: “Nande ondi mu lombwele, itamu itavele, ndele nande ondi mu pule, itamu nyamukula sha.” Opo nee, Jesus okwa li a popya nouladi kutya oye lyelye a ti: “Okonena eli otamu ka mona Omona wOmunhu ta kala omutumba kolulyo leenghono daKalunga.”

Aveshe ova li va hala okushiiva, eshi va li va pula va ti: “Oove hano Omona waKalunga?”

Jesus okwa li e va nyamukula a ti: “Heeno, Aame ou, ngaashi tamu ti.”

Enyamukulo olo ola li la wanena ovalumenhu ovo va li va hala okudipaa, molwaashi ova li ve li tala ko li li okusheka Kalunga. Ova li va pula va ti: “Ondombwedi ilipi po hatu pumbwa vali? Ofye vene twe di uda mokanya kaye mwene.” Onghee hano, ova li va manga Jesus, ndele tave mu twala komupangeli waRoma, Pontius Pilatus.

Judas, omukengeleli waJesus, okwa kala ta tale oinima aishe eshi tai ningwa. Eshi a li a mona kutya Jesus okwa tokolwa, okwa li a nyika oluhodi. Onghee hano, okwa li a ya kovakulunhu nokovapristeri ovakulunhu e ke va shunifile oishiliveli 30, nokwe va lombwela a ti: “Ame nda nyona, eshi nda kengelela ohonde i he netimba.”

Ovakulunhu novapristeri ova li ve mu nyamukula nai va ti: “Otu na shike naave? Likwafa ove mwene!” Opo nee, Judas okwa li a ekela oishiliveli oyo motembeli ndele ta i noku ke limangeleka. Ashike oshitai oko a li a manga ongodi otashi dulika sha teka, ndele olutu laye tali lidenge komamanya oo a li pedu, nokutopa pokati.

Ovapristeri ovakulunhu kava li ve shii kutya nava ninge shike noishiliveli oyo. Ova li va fika pexulifodiladilo va ti: “Ei itai dulu okutulwa moimaliwa yotembeli, osheshi oyo efuto lohonde.” Onghee hano, konima eshi va kundafana, ova li va longifa oimaliwa oyo okulanda epya lomuhongi woitoo opo li kale hali pakwa ovanailongo. Epya olo ola li hali ifanwa “epya lohonde.”

Osha li natango ongula inene eshi Jesus a li a twalwa kombala yomupangeli. Ndele Ovajuda ovo va li tava ende pamwe naye ova li va anya okuya mo mombala, molwaashi ova li va itavela kutya ngeenge ova endafana monghedi ya tya ngaho novanhu ovo inava pita etanda otashi ke va nyateka. Onghee hano, opo navo va dule okukala po, Pilatus okwa li e uya pondje. Opo nee okwa li e va pula a ti: “Omulumenhu ou otamu mu hokololifile shike?”

Ova li va nyamukula va ti: “Ou ngeno ke fi omukolokoshi, ngeno inatu mu yandja kuove.”

Molwaashi Pilatus ka li a hala okukwatelwa mo, okwa li e va nyamukula a ti: “Mu kufeni po hano, mu mu tokole pamhango yeni vene.”

Ovajuda ova li va holola kutya ova lalakanena okudipaa Jesus, eshi va ti: “Fye twa dilikwa okudipaa omunhu.” Oshoshili kutya ngeno ova dipaele Jesus pefimbo lOshivilo shOpaasa, ngeno osha etifa epiyaano mokati kovanhu, molwaashi ovanhu vahapu ova li va lenga Jesus neenghono. Ndele ngeenge ova ningifa Ovaroma ve mu dipae omolwetimba lopapolotika, osho otashi ke va ningifa va kale va fa vehe na ondjo yasha koshipala shovanhu.

Opo nee, ovawiliki vomalongelokalunga ovo ova li va lundila Jesus oinima imwe i lili, ponhele yokupopya oyo va li ve mu tokolela fimbo va li tave mu pangula. Ova li ve mu lundila oinima yopatatu va ti: “Ou otwe mu mona [1] ta twifa ovanhu ondubo ndee [2] ta kelele okuyandja efendelo komukesari, ndele [3] Ye mwene ota ti Oye Kristus, ohamba.”

Elundilo olo kutya Jesus ote liti kutya ye ohamba ola li tali lipulifa Pilatus. Onghee hano, okwa li a shuna mombala, ndele ta ifana Jesus a ye kuye, noku mu pula ta ti: “Oove ohamba yOvajuda?” Noitya imwe, Pilatus okwa li ta pula ta ti: Mbela owa teya omhango eshi to ti kutya oove ohamba to tu ondubo nOmukesari?

Jesus okwa li a hala okushiiva kutya Pilatus okwa uda shi fike peni kombinga yaye, nomolwaasho okwa li e mu pula a ti: “Eshi owe shi tonga muove mwene, ile ovanhu ve shi ku lombwela, tava popi nge?”

Pilatus okwa li te liningifa a fa ehe shii sha kombinga yaJesus nokwa li a hala okushiiva shihapu, eshi a li a nyamukula a ti: “Aame Omujuda? Ovanhu vomoshilongo sheni novapristeri ovakulunhu ovo ve ku yandja kuame; owa ninga shike?”

Jesus ka li a kendabala okuhenuka oshinima shi na sha nokukala ohamba, nomolwaashi okwa li a nyamukula monghedi oyo sha yela kutya oya li ya kumwifa Pilatus. Lukas 22:66–23:3; Mateus 27:1-11; Markus 15:1; Johannes 18:28-35; Oilonga 1:16-20.

▪ Omhangu yoPombada yOvajuda oya li ya ongala vali ongula omolwelalakano lashike?

▪ Judas okwa li a fya ngahelipi, noshike sha li sha ningwa po noishiliveli 30?

▪ Omolwashike Ovajuda va li va hala Ovaroma ovo va dipae Jesus, ponhele yoku mu dipaa vo vene?

▪ Ovajuda ova li va lundila Jesus shike?