Etukulwa 124
Jesus ta yandjwa ndele tai wa naye
PILATUS okwa li natango e linyengifwa kengungumano laJesus oo a li a hepekwa neenghono, nokwa li ta kendabala natango oku mu mangulula, naasho osha li sha handukifa neenghono ovapristeri ovakulunhu. Ovapristeri ovo ova li va tokola toko okuwanifa po elalakano lavo lii. Onghee hano, ova li vali va ingida tava ti: “Mu valela komuti womahepeko! Mu valela komuti womahepeko!”
Pilatus okwa li e va nyamukula ta ti: “Mu kufeni nye mu mu valele komuti womahepeko.” (Mepingafano naasho va li tava popi pehovelo, Ovajuda otashi dulika va li ve na oufemba wokudipaa ovalongi vominyonena ovo va nyona omanyono opalongelokalunga a kwata moiti.) Pilatus okwa li natango a popya oshikando oshititano kutya Jesus ke na etimba, a ti: “Ame nghi wete etimba muye.”
Eshi Ovajuda va li va mona kutya omalundilo avo opapolotika okwa ponya, ova li va yandja elitulemo kelundilo lopalongelokalunga li na sha naasho va li tava ti kutya Jesus okwa sheka Kalunga, olo va li va longifa eevili da tetekela eshi Jesus a li ta pangulwa mOmhangu yoPombada yOvajuda. Ova ti: “Fye otu nomhango ndele omhango otai mu pe etimba lokufya, osheshi ote liningi Ye mwene Omona waKalunga.”
Pilatus opo a li ta udu oshikando shotete elundilo olo, neendjovo odo oda li de mu tilifa neenghono. Okwa li a didilika kutya Jesus kefi ashike omunhu wongaho, ngaashi ondjodi yomukulukadi waye ya li ye shi ulika nosho yo ouladi waJesus we likalekelwa. Ndele mbela Jesus okwa li ngoo “Omona waKalunga” shili? Pilatus okwa li e shii kutya Jesus okwa li a dalelwa muGalilea. Ndele mbela otashi dulika ngoo a kala ko nale? Pilatus okwa li a twala natango Jesus mombala yaye ndele te mu pula ta ti: ‘Ove owa dja peni?’
Jesus okwa kala ashike a mwena. Okwa li a lombwela nale Pilatus kutya ye ohamba ndele Ouhamba waye kau fi womunyuni ou. Onghee hano, ka li vali a pumbwa oku mu yelifila sha. Ndele molwaashi Pilatus okwa li e na ounhwa, okwa li a handuka eshi Jesus i ne mu nyamukula nokwa li a pula Jesus a handuka a ti: “Ito popi naame? Ove ku shi shii nokutya, ondi neenghono doku ku valela [komuti womahepeko, NW ] ndele ondi neenghono doku ku efa.”
Jesus okwa li e mu nyamukula nefimaneko a ti: “Eenghono dokutokola nge ngeno ku di pelwe da dja kombada, ngeno ku di kwete.” Jesus okwa li ta popi shi na sha naashi Kalunga apa ovapangeli vopanhu eenghonopangelo opo va file oshisho oinima yokombada yedu. Jesus okwa li a weda ko ta ti: “Onghee hano ou a yandja nge kuove, oye e netimba li dule loye.” Doshili, omupristeri omukulunhu Kajafas novawiliki vomalongelokalunga vakwao nosho yo Judas Isakriot ova li ve na oshinakuwanifwa sha kwata moiti shi na sha nokuungaunga naJesus shihe li pauyuki ve dule Pilatus.
Molwaashi Pilatus okwa li natango a kumwifwa neenghono kuJesus nokwa li a tila kutya pamwe Jesus okwa dja kuKalunga, okwa li vali a kendabala oku mu mangulula. Ndele Ovajuda ova li va anya eetepo laPilatus. Ova li natango va endulula elundilo lavo lopapolotika nova li va tilifa nekonda Pilatus tava ti: “Ou ngenge to mu efa, ku fi vali kaume komukesari; keshe tuu ou te liningi ohamba, oku nondubo nomukesari.”
Nonande otashi ulike kutya Ovajuda ova li va hala okuningila Jesus owii, Pilatus okwa li vali a eta Jesus pondje. Okwa ti vali: “Taleni ohamba yeni.”
Ovajuda ova ti: “Na dje po, na dje po, mu valela [komuti womahepeko, NW ]!”
Pilatus okwa li e va pula a teka omukumo a ti: “Nandi valele ohamba yeni [komuti womahepeko, NW ]?”
Ovajuda kava li va hafela okupangelwa kepangelo laRoma, nova li ve li tonde. Ndele nande ongaho, ovapristeri ovakulunhu ova li va popya noihelele tava ti: “Fye katu na ohamba imwe, omukesari aeke.”
Molwaashi Pilatus okwa li a tila okukanifa ondodo yaye yopapolitika nokukala e tondike kovanhu, okwa li a efa Ovajuda va ninge osho va li tava pula. Pilatus okwa li a yandja Jesus. Ovakwaita ova li va dula Jesus oshikutu shitilyana nova li ve mu dika oshikutu shaye shokombada. Eshi Jesus a li ta ka dipawa, okwa li a humbatekwa omuti waye womahepeko.
Pefimbo opo osha li efimbo loshitumbetango mEtitano, 14 aNisan, notashi dulika omutenya wa li u li pokutwa. Jesus ka li a kofa okudja ongula yEtine, nokwa kala ta hepekwa oikando ya landulafana. Nomolwaasho, osha li shi shii okuudiwa ko eshi a li a loloka eshi a humbata omuti. Onghee hano, eshi omulumenhu umwe wedina Simon wokuKireni muAfrika a li ta ende po, ova li ve mu fininika a humbate omuti oo. Fimbo va li molweendo, ovanhu vahapu mwa kwatelwa ovakainhu, ova li ve va shikula nova li va nyika oluhodi neenghono nova li tava lili molwaJesus.
Jesus okwa li a pungulukila kovakainhu ovo ndele ta ti: “Oukadona nye Ovajerusalem, inamu lila nge, lililileni nye vene, nye mu lilile ovana veni. Osheshi tala, omafiku tae uya fiku taku tiwa: Ovanelao ovo eengadji, nomadimo inaa dala nomavele inaa nyamifwa. . . . Osheshi omuti mutalala ngenge tau ningwa ngaha, omukukutu otau ningwa ngahelipi?”
Jesus eshi a li ta popi omuti okwa li ta popi oshiwana shOvajuda, osho sha li natango shi talala molwaashi Jesus okwa li e li mokati kavo, nosho yo oshixupe osho sha li she mu itavela. Ndele ngeenge oshixupe osho osha di mo mokati koshiwana osho, oshiwana osho otashi ka kala ashike sha fa omuti wa kukuta, sha hala okutya, otashi ka fya pamhepo. Ovanhu kava li tuu tava ka lilaana eshi omatangakwaita aRoma a li taa ka wanifa po etokolo laKalunga mokuhanauna po oshiwana shOvajuda! Johannes 19:6-17; 18:31, yelekanifa NW; Lukas 23:24-31; Mateus 27:31, 32; Markus 15:20, 21.
▪ Ovawiliki vomalongelokalunga ova li va lundila Jesus shike eshi va mona kutya omalundilo avo opapolotika inaa pondola sha?
▪ Omolwashike Pilatus a li a tila neenghono?
▪ Olyelye a li e na etimba linene shi na sha naasho sha li tashi ningilwa Jesus?
▪ Xuuninwa ovapristeri ova li va pondola ngahelipi okuningifa Pilatus a yandje Jesus a ka dipawe?
▪ Jesus okwa li a lombwela shike ovakainhu ovo va li tave mu lili, nokwa li a hala okutya shike eshi a li a popya kombinga yomuti “mutalala” ndele tau ‘kukuta’?