Etukulwa 122

Eshi Jesus a dja kuPilatus, okwa li a twalwa kuHerodes ndele ta shunifwa vali kuPilatus

NONANDE Jesus ka li a ninga eenghendabala a holeke Pilatus kutya ye ohamba, okwa li e mu yelifila kutya Ouhamba waye itau tu ondubo nepangelo laRoma. Jesus okwa ti: “Ouhamba wange kau fi womounyuni ou; ouhamba wange ngeno womounyuni ou, ovapiya vange ngeno va lwa, ndi ha yandjwe kOvajuda. Ndelenee pamha ouhamba wange kau fi wamu.” Kungaho, Jesus okwa li a dimina lwoikando itatu kutya oku na Ouhamba, nonande inau dja kombada yedu.

Pilatus okwa li a pula Jesus natango a ti: “Oove ohamba nokuli?” Epulo olo ola li la hala okutya, oove ohamba nonande Ouhamba woye kau fi oshitukulwa shounyuni ou?

Jesus okwa li a efa Pilatus a shiive kutya okwa fika pexulifodiladilo li li mondjila eshi a li a nyamukula a ti: “Heeno, ngaashi to ti, Aame ohamba. Onghee nda dalwa nde uya mounyuni ou, ndi [hepaulule] oshili. Keshe ou womoshili, ye ota udu ondaka yange.”

Elalakano laJesus eshi a li e uya kombada yedu olo okuhepaulula “oshili” i na sha nOuhamba waye. Jesus okwa li e lilongekida okukala omudiinini koshili oyo nonande osha li tashi ke mu pula omwenyo waye. Ndele nande Pilatus okwa li a pula kutya “oshili oshike?” ka li a teelela okuyelifilwa vali. Okwa li a uda ouyelele muhapu oo wa li tau dulu oku mu kwafela a tokole Jesus.

Pilatus okwa li a shuna keemhunga dovanhu odo da li da teelela pondje yombala. Otashi dulika a li a ya pamwe naJesus, ndele ta lombwele ovapristeri ovakulunhu nosho yo ovo va li pamwe navo a ti: “Nghi wete nande etimba muye.”

Eemhunga dovanhu oda li da handukifwa ketokolo olo, ndele tadi hovele okupopya tadi twitwimike tadi ti: “Ye omupiyanifi wovanhu noku va longa muJudea ashishe, eshi a hovela muGalilea, fiyo opapa.”

Ouladi wa pitilila wOvajuda owa li wa kumwifa Pilatus. Onghee hano, eshi ovapristeri ovakulunhu novakulunhu voshiwana va li tava twikile okwiingida, Pilatus okwa li a tala kuJesus ndele te mu pula ta ti: “Ino uda ko, eshi tave ku popi unene?” Ashike nande ongaho, Jesus ka li e mu nyamukula. Okukala kwaJesus a ngungumana fimbo a li ta lundilwa sha kwata moiti osha li sha kumwifa Pilatus.

Eshi Pilatus a li a shiiva kutya Jesus Omugalilea, okwa li a kendabala opo aha kwatelwe mwaasho sha li tashi ningilwa Jesus. Omupangeli waGalilea, Herodes Antipas (omona waHerodes Munene), okwa li e uya kuJerusalem omolwOpaasa, onghee hano, Pilatus okwa li a tuma Jesus kuye. Nale, Herodes Antipas okwa li a tetifa Johannes Omuninginifi omutwe, nokwa li a tila eshi a li a uda kombinga yoikumwifilonga oyo ya li tai longwa kuJesus, a li ta diladila kutya Jesus oJohannes a nyumuka koufi.

Herodes okwa li a tunhukwa eshi a li e na etimaumbwile lokumona Jesus. Ashike Herodes ka li e na ko nasha nonghalonawa yaJesus ile a hala ngeno okuuda kutya oinima oyo ta pangulilwa oyoshili ile hasho. Ponhele yaasho, okwa li ashike e na okatalekonawa nokwa li ta diladila kutya Jesus ota ka longa oikumwifilonga yonhumba.

Jesus okwa li a anya okuyelifila Herodes oo a li a hala okumona ouyelele. Eshi Herodes a li a pula Jesus, ka li e mu nyamukula sha. Herodes nosho yo ovakwaita vaye ova li va sheka Jesus molwaashi ova li va handuka. Ova li ve mu dika oshikutu tashi vema ndele tave mu sheke. Opo nee ova li ve mu shunifa kuPilatus. Oshidjemo, Herodes naPilatus ova li va panga oukaume, nonande ova kala ve tondafane.

Eshi Jesus a li a alukila kuPilatus, Pilatus okwa li a ifana ovapristeri ovakulunhu, ovapangeli Ovajuda nosho yo ovanhu vamwe ndele ta ti: “Mwa eta omunhu ou kuame mwa tya: ye omuhongauli wovanhu, hano taleni, ame mwene onde mu pula fimbo mu li po, ndele inandi mona momunhu ou nande etimba olo tamu li mu hokololifa. Nosho yo Herodes ine li mona, osheshi ye okwe mu shunifa kufye, hano taleni oye ou ina ninga sha shoku mu pa etimba loku mu dipaifa. Onghee hano nda hala ndi mu dengife ndele ndi mu efe.”

Pilatus okwa li a popya lwoikando ivali kutya Jesus ke na etimba. Okwa li a halelela oku mu mangulula molwaashi okwa mona kutya ovapristeri ova li ashike ve mu eta kuye omolwondubo. Eshi Pilatus a li ta kendabala okumangulula Jesus, okwa li a mona nokuli etomheno la kola loku mu mangulula. Fimbo a li koshipundi shaye shokutokola, omukulukadi waye okwa li e mu tumina etumwalaka a ti: “Omulumenhu ou omuyuki ino mu ningila owii, osheshi ame onde mu ehamenwa shili oufiku wonena mondjodi,” oyo sha yela kutya oya dja kuKalunga.

Ndele mbela ongahelipi Pilatus a li ta ka mangulula omulumenhu oo ehe na ondjo, ngaashi e shi shii kutya oku na oku mu mangulula? Johannes 18:36-38; Lukas 23:4-16; Mateus 27:12-14, 18, 19; 14:1, 2; Markus 15:2-5.

▪ Jesus okwa li a nyamukula ngahelipi epulo olo a li a pulwa li na sha nokukala kwaye ohamba?

▪ “Oshili” oyo Jesus a li ta hongo kombada yedu oshike?

▪ Pilatus okwa li a tokola ngahelipi, novanhu ova li ve linyenga ngahelipi, na Pilatus okwa li a ningila Jesus shike?

▪ Herodes Antipas okwa li lyelye, nomolwashike a li a tunhukwa okumona Jesus, nokwa li a ungaunga naye ngahelipi?

▪ Omolwashike Pilatus a li a halelela okumangulula Jesus?