Etukulwa 131

Jesus te lihololele ovahongwa vaye lwaxuuninwa nosho yo Opentekoste 33 O.P.

POMHITO imwe, Jesus okwa li a ninga omalongekido opo a ka ongale pamwe novayapostoli vaye 11 komhunda yaGalilea. Ovahongwa vamwe navo osha yela kutya ova li va lombwelwa shi na sha nokwoongala oko, molwaashi okwa li kwa ongala ovanhu ve dule po 500. Oshoongalele osho kasha li tuu shihafifa eshi Jesus a li e uya po ndele ta hongo ovanhu!

Kakele koinima imwe, Jesus okwa li a lombwela eemhunga dovanhu kutya Kalunga okwe mu pa eenghonopangelo adishe meulu nokombada yedu. Opo nee okwa ti: “Indeni hano ka ningeni ovanhu aveshe ovalongwa vange, noku va [ninginifa, NW] medina laXe nolOmona nolOmhepo Iyapuki, noku va longa okudiinina aishe ei nde i mu lombwela.”

Diladila ashike kwaasho, ovalumenhu, ovakainhu nounona aveshe va pewa oshilonga sha faafana shokukufa ombinga moilonga yokuninga ovanhu ovahongwa. Ovapataneki otava ka kendabala okukangheka oilonga yavo yokuudifa nokuhonga ovanhu, ashike Jesus okwa li e va hekeleka a ti: “Tala, Ame ndi li pamwe nanye omafiku aeshe fiyo okexulilo lefimbo lounyuni.” Jesus okwa li ta ka kala pamwe novashikuli vaye okupitila momhepo iyapuki, opo e va kwafele va wanife po oukalele wavo.

Jesus okwa li a holokela ovahongwa vaye oule womafiku 40 okudja eshi a nyumuka. Ndele eshi a li e va holokela pomhito oyo, okwa li e va honga kombinga yOuhamba waKalunga, nokwa li a divilika kutya ove na oshinakuwanifwa shashike ve li ovahongwa vaye. Pomhito imwe, okwa li nokuli a holokela omumwaina Jakob ndele te mu tomho a itavele kutya oye shili Kristus.

Fimbo ovayapostoli va li natango muGalilea, otashi dulika Jesus a li e va lombwela va shune kuJerusalem. Eshi a li a shakena navo oko, okwa li e va lombwela ‘vaha dje mo muJerusalem, ndelenee va teelele ewanifo leudaneko laXe, olo ve li uda kuye, ngaashi a tya. Osheshi Johannes okwa [ninginifile] nomeva, ndele onye tamu ka [ninginifwa] nomhepo iyapuki omafiku amwe eshi a pita po.’

Konima yefimbo, Jesus okwa li vali a ongala novayapostoli vaye ndele ta di mo navo moshilando fiyo okuBetania, osho sha li koushilo wolufilu lOmhunda yEemono. Shikumwifi, nonande Jesus okwa li e va lombwela keshe shimwe kutya oku li pokushuna meulu, ova li natango va itavela kutya Ouhamba waye otau ka dikwa po kombada yedu. Onghee hano, ova li ve mu pula va ti: “Omwene, opefimbo tuu eli to tungululile Israel ouhamba?”

Jesus ka li vali a kendabala oku va pukulula eshi vehe udite ko oinima, ndele ponhele yaasho okwa li e va nyamukula a ti: “Kashi fi sheni okushiiva omafimbo ile eetundi edi Tate e di tula po meenghono daye mwene.” Opo nee, okwa li vali a divilika oilonga oyo ve na okulonga a ti: “Otamu pewa eenghono, Omhepo Iyapuki ngenge tai uya munye, ndee tamu ka ninga eendombwedi dange muJerusalem nomuJudea ashishe nomuSamaria nofiyo okominghulo dounyuni.”

Fimbo va li tava tale kuJesus, okwa li a hovela okulonda a yuka meulu, opo nee okwa li a uvikwa koshilemo opo vehe mu mone. Konima eshi e lidula olutu laye lopambelela, okwa londa keulu e li omunhu wopamhepo. Fimbo ovayapostoli 11 va li tava tale natango koshilemo, ova li va holokelwa kovalumenhu vavali va djala oikutu itoka. Ovaengeli ovo va li va djala omalutu opambelela ova li ve va pula va ti: “Ovalumenhu nye Ovagalilea, oshike mu li ofika ndee tamu tale keulu? Jesus tuu ou e mu kufwa a ya meulu, osho tuu ngaha ta aluka ko, ngaashi mwe mu mona a ya meulu.”

Eshi Jesus a dja ko kombada yedu ka li a monika kovanhu aveshe ndele ovashikuli vaye ovadiinini ovo ashike va li ve mu mona. Onghee hano, osho naanaa tashi ka kala ngaho eshi a li ta ka aluka, sha hala okutya, ka li ta ka monika kovanhu aveshe, ndele ovashikuli vaye ovadiinini ovo aveke va li tave ke shi didilika mo kutya okwa aluka nokwa hovela okukala po kwaye meenghono dOuhamba.

Ovayapostoli ova li va londoloka ko kOmhunda yEemono, tava tauluka efilu laKidron ndele tava i natango kuJerusalem. Ova li va kala muJerusalem ngaashi Jesus a li e va lombwela. Omafiku omulongo konima yaasho, fimbo ovahongwa 120 va li va ongala monduda yopombada muJerusalem pOshivilo shOvajuda shOpentekoste 33 O.P., opa li pa udika eweelelo la fa oshikungulu shinene shomhepo meumbo alishe. Opa li pa monika omalaka omundilo e li kombada yomitwe daavo va li va ongala, novahongwa aveshe ova li va hovela okupopya omalaka e lili noku lili. Kungaho, ovahongwa ova li va tililwa omhepo iyapuki oyo Jesus a li e va udanekela. Mateus 28:16-20; Lukas 24:49-52; 1 Ovakorinto 15:5-7; Oilonga 1:3-15; 2:1-4, yelekanifa NW.

▪ Jesus okwa li a honga oolyelye eshi a li pokuya meulu fimbo va li komhunda yaGalilea, nokwa li e va honga shike?

▪ Jesus okwa li a hekeleka ngahelipi ovahongwa vaye, nongahelipi a li ta ka kala pamwe navo?

▪ Jesus okwa kala te lihololele ovahongwa vaye oule wefimbo li fike peni, nokwa li e va honga shike?

▪ Jesus okwa li e lihololela lyelye oo a li ehe fi omuhongwa waye fimbo ina fya?

▪ Okwoongala kwopavali kulipi Jesus a li a ongala lwaxuuninwa novayapostoli vaye, noshike sha li sha ningwa po peemhito odo?

▪ Omeityo lilipi Jesus ta ka aluka monghedi ya fa oyo a ya meulu?

▪ Oshike sha li sha ningwa pOpentekoste 33 O.P.?