Jesus ta shuna meulu

Jesus okwa li a ongala novashikuli vaye muGalilea. Okwa li e va pa oshipango sha fimanenena a ti: ‘Indeni ka ningeni ovanhu vomoilongo aishe ovahongwa vange. Va hongeni oinima oyo nde mu honga noku va ninginifa.’ Opo nee okwe va udanekela a ti: ‘Dimbulukweni kutya ohandi ka kala alushe pamwe nanye.’

Momukokomoko womafiku 40 okudja eshi Jesus a nyumunwa, okwa kala te lihololele ovahongwa vaye omafele muGalilea nomuJerusalem. Okwe va honga oilihongomwa ya fimana nokwa longa oikumwifilonga ihapu. Opo nee Jesus okwa li a ongala novayapostoli vaye oshikando shaxuuninwa kOmhunda yEemono. Okwe va lombwela a ti: ‘Inamu dja mo muJerusalem. Kaleni mwa teelela osho Tate a udaneka.’

Ovayapostoli vaye kava li ve udite ko osho a hala okutya. Onghee ove mu pula va ti: ‘Paife oto ningi Ohamba yaIsrael?’ Jesus okwa ti: ‘Efimbo laJehova inali fika manga lokuninga nge Ohamba. Mafiku otamu ka pewa eenghono komhepo iyapuki, notamu ka ninga eendombwedi dange. Indeni mu ka udife muJerusalem, Judea, Samaria nosho yo koitukulwa ikwao younyuni.’

Opo nee Jesus okwa yelulwa pombada ndele ta uvikwa koshilemo. Ovahongwa vaye ova kala tave mu tale, fiyo tava kala vehe mu wete vali.

Ovahongwa vaye ova dja ko kOmhunda yEemono ndele tava i kuJerusalem. Ova kala hava ongala monduda yopombada nokwiilikana nopehe na okufaula. Ova li va teelela Jesus e va pe vali omalombwelo.