Etukulwa 133

Jesus ta mane oilonga aishe oyo Kalunga a li e mu pa

ITASHI ka kala tuu shihafifa ngeenge ohambakwaita Jesus Kristus oya hanauna po ounyuni ou woukolokoshi nokumanga Satana! Opo nee, Jesus ota ka hovela epangelo laye lombili lOmido Eyovi.

Koshi yewiliko laJesus nosho yo ovo tava ka pangela pamwe naye, ovanhu ovo tava ka xupa po puHarmagedon otava ka wapaleka po oinima aishe oyo ya fiwa po pefimbo loita oyo i li pauyuki. Ovanhu ovo tava ka xupa po kombada yedu otashi dulika yo tava ka dala ounona, ovo tava ka kufa ombinga pamwe navo moilonga yokulonga edu li ninge oshikunino shiwa.

Mokweendela ko kwefimbo, Jesus ota ka nyumuna ovanhu omamiliyona mahapu ovo ve li meembila opo va dule okuhafela Oparadisa oyo iwa. Mokuninga ngaho, Jesus ota ka wanifa po eudaneko laye olo tali ti: ‘Efimbo otali uya, opo aveshe ava va kala meembila otava holoka mo.’

Umwe womwaavo Jesus ta ka nyumuna ota ka kala omulumenhu oo a li omukolokoshi, oo a li a valelwa popepi naye komuti womahepeko. Dimbuluka kutya Jesus okwa li e mu udanekela a ti: ‘Oshili ohandi ku lombwele, onena tuu eli to ka kala pamwe naame mOparadisa.’ Osho inashi hala okutya omulumenhu oo ota ka ya meulu a ka pangele e li ohamba pamwe naJesus, ile kutya Jesus ota ka ninga vali omunhu wopambelela nokukala mOparadisa kombada yedu pamwe naye. Ponhele yaasho, Jesus ota ka kala pamwe nomulumenhu oo meityo olo kutya ote ke mu nyumunina mOparadisa nota ka fya oshisho opo eemhumbwe daye dopalutu nosho yo dopamhepo di wanifwe po, ngaashi sha ulikwa pefano olo li li pepandja olo la landula ko.

Diladila shi na sha naasho, koshi yefiloshisho lopahole laJesus, ovanhu aveshe ovo tava ka kala kombada yedu, sha hala okutya, ovanhu ovo tava ka xupa po puHarmagedon, ovana vavo nosho yo ovanhu omamiliyona omayovi ovo tava ka nyumunwa, ovo tava ka dulika kuye, otava ka kala va wanenena. Jehova ota ka kala pamwe novanhu ovo pamhepo okupitila mOmona waye Ohamba, Jesus Kristus. Opo nee, ngaashi ondaka oyo Johannes a li a uda ya dja meulu, Jesus “ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali.” Kape na omunhu kombada yedu ta ka mona oixuna ile ta ka ehama.

Pexulilo lEpangelo lOmido Eyovi laJesus, onghalo kombada yedu otai ka kala ngaashi Kalunga a li a lalakanena i kale pehovelo eshi a li a lombwela ovalihomboli votete, Adam naEva, va dale ounona nova yadife edu. Edu otali ka kala li yadi ovanhu ovayuki nova wanenena. Osho osho tashi ka kala ngaho molwaashi ovanhu aveshe otava ka mona ouwa mekuliloyambo laJesus. Efyo olo la etifwa koulunde waAdam itali ka kala po vali.

Kungaho, Jesus ota ka wanifa po oilonga aishe oyo Jehova e mu lombwela a longe. Onghee hano, pexulilo lomido eyovi, Jesus ota ka yandja Ouhamba nosho yo ovanhu va wanenena kuXe. Kalunga ota ka mangulula Satana neendemoni daye mombwili, monghalo yokuhalonga sha nandenande. Mbela omolwashike Kalunga ta ka ningila ngaho?

Ovanhu vahapu ovo tava ka kala mOparadisa pexulilo lomido eyovi otava ka kala ovanyumunwa ovo eitavelo lavo inali yelekwa nande onale. Ovanhu va tya ngaho fimbo va li ve na omwenyo kava li ve shii sha shi na sha nomaudaneko aKalunga, nomolwaasho kava li va itavela momaudaneko oo. Konima ngeenge ova nyumunwa ndele tava hongwa eeshili dOmbibeli, otashi ka kala shipu kuvo okulongela Kalunga molwaashi ove li mOparadisa omo pehe na oo te va pataneke. Ndele mbela ngeenge Satana okwa pewa omhito opo a kendabale oku va efifa po okulongela Kalunga, otava ka kala tuu ovadiinini ngeenge tava yelekwa? Opo ku monike ngeenge otava ka kala ngoo ovadiinini ile hasho, Satana oku na okumangululwa.

Ehololo olo la li la pewa Johannes otali ulike kutya konima yEpangelo lOmido Eyovi laJesus, Satana ota ka pondola okwaamuna ko ovanhu vahapu kuKalunga. Ndele ngeenge eyeleko laxuuninwa ola pu, Satana, eendemoni daye nosho yo aveshe ovo a pukifa, otava ka hanaunwa po fiyo alushe. Mepingafano naasho, ovo va kala ovadiinini pefimbo leyeleko olo otava ka kala nomwenyo opo va hafele omanangeko noupuna fiyo alushe oo tava ka pewa kuXe yomeulu.

Osha yela kutya Jesus okwa dana onghandangala ya fimanenena mokuwanifwa kwomalalakano aKalunga makumwifi, nota ka twikila okudana onghandangala ya tya ngaho. Itatu ka hafela tuu onakwiiwa ishambula omolwoinima aishe oyo Jesus a wanifa po e li Ohamba inene yomeulu oyo ya nangekwa po kuKalunga! Ndele nande ongaho, katu na okudimbwa ashishe osho a li a ninga fimbo a li omunhu kombada yedu.

Jesus okwa li e uya kombada yedu nehalo liwa opo e tu honge shi na sha naXe. Jesus okwa li yo ha hopaenene omaukwatya aKalunga a tongomana. Omitima detu ohadi linyengifwa ngeenge hatu dilonga kouladi waye munene nokukala kwaye omulumenhu elela, ounongo waye uhe fi okuyelekwa, ounghulungu waye wokuhonga, okupangela kwaye nopehe na oumbada nosho yo olukeno laye nonghenda. Ngeenge hatu diladila shi na sha nokuhepekwa kwaye monghedi ihe fi okuhokololwa eshi a li ta yandje oikulila, oyo okupitila muyo omo ashike hatu dulu oku ka mona omwenyo, ohashi linyengifa omitima detu tu mu pandule.

Eshi twa konakona onghalamwenyo yaJesus, inatu mona tuu kutya okwa li shili omulumenhu elela! Ounene waye ou liwetikile noukumwifi. Osho otashi tu linyengifa tu popye ngaashi omupangeli waRoma Pontius Pilatus oo a tile: “Taleni omunhu”! Doshili, Jesus oye ‘omunhu’ munenenene oo a li ko nale.

Ngeenge otwa tambula ko omafiloshisho e na sha nekuliloyambo laJesus, omutengi woulunde nefyo olo twa fyuulula kuAdam otai ka xulifwa po, na Jesus ota ka ninga ‘Tate yetu yaalushe.’ Aveshe ovo tava ka mona omwenyo waalushe ove na okushiiva Kalunga nosho yo Omona waye, Jesus Kristus. Okulesha kwoye embo eli nokulikonakona naku ku kwafele u kale u na eshiivo olo tali twala komwenyo waalushe! 1 Johannes 2:17; 1:7; Johannes 5:28, 29; 3:16; 17:3; 19:5; Lukas 23:43; Genesis 1:28; 1 Ovakorinto 15:24-28; Ehololo 20:1-3, 6-10; 21:3, 4; Jesaja 9:5.

▪ Ovanhu ovo tava ka xupa puHarmagedon nosho yo ovana vavo otava ka kala ve na oufembanghenda ulipi?

▪ Kakele kaavo tava ka xupa po puHarmagedon nosho yo ovana vavo, oolyelye vali tava ka kala mOparadisa, nomeityo lilipi Jesus ta ka kala pamwe navo?

▪ Onghalo kombada yedu otai ka kala ngahelipi pexulilo lomido eyovi, na Jesus ota ka ninga shike konima yaasho?

▪ Omolwashike Satana ta ka mangululwa mo mombwili, nohauxuuninwa oshike tashi ke mu ningilwa nosho yo ovalanduli vaye aveshe?

▪ Jesus ota ka ninga ngahelipi ‘Tate yetu yaalushe’?