Oshileshwa 5
Elalakano laKalunga Olashike Li Na Sha nEdu?
Omolwashike Jehova a shita edu? (1, 2)
Omolwashike edu li he fi oparadisa paife? (3)
Oshike tashi ka ningilwa ovakolokoshi? (4)
Monakwiiwa Jesus ota ka ningila shike ovanaudu? ovakulupe? oonakufya? (5, 6)
Opo u kale nombinga momanangeko noupuna omonakwiiwa, owa pumbwa okuninga shike? (7)
1. Jehova okwa shita edu eli opo ovanhu va dule okuhafela okukala kulo fiyo alushe. Ye okwa li a hala kedu ku kalwe alushe kovanhu ovayuki ve na elao. (Epsalme 115:16; Jesaja 45:18) Edu itali ka hanaunwa po nande; otali ka kala po fiyo alushe.—Epsalme 104:5; Omuudifi 1:4.
2. Ofimbo Kalunga ina shita omunhu, Ye okwa hoolola okatukulwa kamwe kanini kedu nokwe ka ninga oparadisa iwa. Ye okwe ka luka oshikunino shaEden. Omo kwa li a tula omulumenhu nomukainhu wotete, Adam naEva. Elalakano laKalunga ola li opo va mone ounona nokuyadifa edu alishe. Kanini nakanini vo okwa li ngeno tava ka ninga edu alishe oparadisa.—Genesis 1:28; 2:8, 15.
3. Adam naEva ova nyona mokuteya owina omhango yaKalunga. Onghee hano Jehova okwe va ta mo moshikunino shaEden. Oparadisa oya kanifwa. (Genesis 3:1-6, 23) Ndelenee Jehova ina dimbwa elalakano laye li na sha nedu eli. Ye ota udaneke oku li ninga oparadisa, oko ovanhu tava ka kala fiyo alushe. Eshi ote ke shi ninga ngahelipi?—Epsalme 37:29, OB-1986.
4. Ofimbo edu eli inali ninga oparadisa, ovakolokoshi ove na okukufwa ko. (Epsalme 37:38) Eshi otashi ka ningwa puHarmagedon, osho shi li oita yaKalunga yokuxulifa po oukolokoshi. Konima yaasho, Satana ota ka idililwa oule womido 1 000. Eshi otashi ti kutya itapu ka fiwa ovakolokoshi va nyone edu. Oshiwana shaKalunga osho ashike tashi ka xupa po.—Ehololo 16:14, 16; 20:1-3.
5. Opo nee Jesus Kristus ota ka pangela e li Ohamba kedu eli oule womido 1 000. (Ehololo 20:6) Ye ota ka kufa po kanini nakanini oulunde momadiladilo nomomalutu etu. Fye ohatu ka ninga ovanhu va wanenena naanaa ngaashi Adam naEva va li ofimbo inava nyona. Opo nee itapa ka kala vali omikifi, oukulupe nefyo. Ovanaudu otava ka velulwa, novakulupe otava ka ninga vali ovanyasha.—Job 33:25; Jesaja 33:24; Ehololo 21:3, 4.
6. Pefimbo lEpangelo laJesus lOmido Eyovi, ovanhu ovadiinini otava ka longa opo va lundululile edu alishe moparadisa. (Lukas 23:43, NW) Oonakufya omamiliyona otava ka nyumuninwa yo momwenyo wopanhu kombada yedu. (Oilonga 24:15) Ngeenge otava longo ngaashi Kalunga ta pula kuvo, otava ka twikila okukala fiyo alushe kombada yedu. Ngeenge hasho, vo otava ka hanaunwa po fiyo alushe.—Johannes 5:28, 29; Ehololo 20:11-15.
7. Onghee hano elalakano laKalunga lopehovelo li na sha nedu otali ke shi pondola. Owa hala mbela u ka kale nombinga momanangeko noupuna aa omonakwiiwa? Ngeenge osho, ou na okukala to lihongo kombinga yaJehova nokudulika koiteelelwa yaye. Okukala ho i kokwoongala pOlupale lOuhamba lEendombwedi daJehova lopunye otaku ku kwafele okuninga ngaho.—Jesaja 11:9; Ovaheberi 10:24, 25, yelekanifa OB-1986.
[Picture on page 10]
Oparadisa ya kana
[Pictures on page 11]
Konima yaHarmagedon, edu otali ka ningwa oparadisa