Eendemoni otadi xumifa komesho oshibofa okukondjifa Kalunga

Ndele omolwashike Satana neendemoni daye tava longo unene neenghono okupukifa ovanhu? Omolwaashi vo ova hala tu djoine oshibofa shavo. Vo ova hala tu va ilikane. Ova hala tu itavele oipupulu yavo nokulonga oinima oyo Jehova e tonde. Dihapu domomikalo edi oda kwatela mo eenghedi da kwatafana noonakufya.

Efyo lomuholike olo oshimoniwa shouyahame wopamaliudo, ndee osho paushitwe nosha yuka okunyika oluhodi. Konima yefyo lakaume kaye Lasarus, Jesus “okwa lila.” — Johannes 11:35.

Oku na eenghedi dihapu di na sha nefyo, neenghedi da tya ngaha oda yoolokafana unene mounyuni aushe. Dihapu itadi kondjifafana nomafinamhango Ombibeli. Ndelenee eenghedi dimwe ode likolelela kediladilo kutya oonakufya ove na omwenyo notava dulu okumona ovanamwenyo. Oivil

o yeenghali, oluhodi la pitilila, neenghedi domafudiko da ningika — aishe ei oya mena omidi moutile wokuhanyemateka eemhepo doonakufya. Ndele molwaashi oonakufya ‘inava shiiva sha,’ ovo hava longo oinima ya tya ngaha otava xumifa komesho oipupulu yaSatana. — Omuudifi 9:5.

Eenghedi ile oivilo imwe ohai di meitavelo kutya oonakufya ova pumbwa ekwafo lovanamwenyo nonokutya vo otava ka etela ovanamwenyo oshiponga ngee itava lotifwa. Moilongo imwe omadano oivilo nomayambo ohaa ningwa omafiku 40 ile odula imwe konima yefyo lomunhu. Eshi ohashi ningwa nediladilo lokukwafela nakufya a ‘taulukile’ mouhamba weemhepo. Onghedi imwe yaapeshe okuyandja oikulya noikunwa koonakufya.

Oinima ei oya puka shaashi otai xumifa komesho oipupulu yaSatana shi na sha noonakufya. Mbela Jehova ota ka hafela okukala tu na sha neenghedi de likolelela komahongo eendemoni? Nandenande! — 2 Ovakorinto 6:14-18.

Ovapiya vaKalunga kashili kave na oshitukulwa shasha meenghedi odo tadi yambidida oipupulu yaSatana. Ponhele yaasho, vo otava yandje elitulemo lavo lopahole okukwafela ovanamwenyo noku va hekeleka. Vo ove shi shii kutya ngeenge omunhu okwa xulifa, oJehova ashike ta dulu oku mu kwafa. — Job 14:14, 15.

Oumhulile otau tokolwa kuKalunga

Ovanhu ohava kwatafana neendemoni sha yukilila ile mokupitila momupopi neemhepo wopanhu. Eshi osha ifanwa oumhulile. Oundudu, owanga, oulodi, omanyanekelo, nokupula koonakufya oyo eenghedi doumhulile.

Ombibeli otai tokola oinima ei, eshi tai ti: “Mokati keni mu ha kale nande umwe, . . . ou ha diinine oundudu ile enyanekelo ile ta xunganeke omadidiliko ile ta pulike ile ta longifa oupule ile ta pula keemhepo dovafi ile komhepo yovashitukifi ile ta kongo omapukululo kovafi. Osheshi keshe ou ta longo oinima oyo, oye oixuna koshipala shOmwene.” — Deuteronomion 18:10-12.

Omolwashike Jehova te tu londwele ngaho neenghono tu kondjife eenghedi edi?

Shi na sha noukalinawa wetu vene, Jehova ote tu londwele tu kondjife eenghedi adishe doumhulile. Ye oku hole ovanhu noku na ko nasha navo, ndee ye oku shi shii kutya aveshe ovo tava kwatafana neendemoni otava ka mona shili oixuna.

Umwe womovanhu va tya ngaha okwa li Nilda, oo a li omupopi neemhepo muBrasilia. Eendemoni oda etela onghalamwenyo yaye oluhepo. Ye ota hepaulula: “Eemhepo . . . da li di kwete nge noda telaanifa nge. Onda kala nokutengela pokati keenghalo dokushiiva nokuhashiiva sha nokwa li nda tulwa moshipangelo omolwomaupyakadi omutwe. Eendemoni oda hepeka nge unene ndee eenelve dange tadi yahamekwa kwaasho. Onda kufa omiti dokulotifa ndee handi tameke okunwa oikolwifa nomakaya alushe. Eshi osha twikila oule weedula.”

Hauxuuninwa, nekwafo laJehova nEendombwedi daye kombada yedu, Nilda okwa manguluka ko kenwefemo leendemoni nopaife oku li monghalamwenyo ya punapala noyoukolele. Ye ota ti: “Ohandi kumaida aveshe va ha kwatafane nande okanini neemhepo [dii].”