Oshileshwa 1

Nghee To Dulu Okumona Osho Kalunga Ta Pula

Ombimbeli oi na omayelifilo a fimana elipi? (1)

Omushangi wOmbibeli oye lyelye? (2)

Omolwashike u na okukonakona Ombibeli? (3)

1. Ombibeli oyo omaano e na ondilo a dja kuKalunga. Oya fa onhumwafo oyo xe omunahole a shangela ovana vaye. Otai tu lombwele oshili kombinga yaKalunga—kutya oye lyelye nonokutya omifikamhango daye odo shike. Otai yelifa nghee omaupyakadi e na okukandulwa po nonghee ehafo lashili tali dulu okumonika. Ombibeli oyo aike tai tu lombwele osho tu na okuninga opo tu hafife Kalunga.—Epsalme 1:1-3; Jesaja 48:17, 18.

2. Ombibeli oya shangwa kovalumenhu ve lili noku lili 40 lwaapo oule womido di dule 1 600, va hovela mo 1513 K.O.P. Oya fikama po moumbo 66. Ovo va shanga Ombibeli ova li va nwefwa mo kuKalunga. Ova shanga omadiladilo aye, ndee haavo vene. Onghee hano Kalunga komeulu oye Omushangi wOmbibeli, ndee hamunhu wonhumba kombada yedu.—2 Timoteus 3:16, 17; 2 Petrus 1:20, 21.

3. Kalunga okwa shilipaleka opo Ombibeli i shangululwe noi diininwe naanaa i li ngaashi i li. Opa nyanyangidwa Eembibeli dihapu shi dulife embo keshe limwe li lili. Hakeshe umwe ta ka hafa moku ku mona to konakona Ombibeli, ndelenee ino pitika shi ku imbe. Onakwiiwa yoye yaalushe oye likolelela kokushiiva kwoye Kalunga nokulonga ehalo laye nande pe na epataneko.—Mateus 5:10-12; Johannes 17:3.