Konakona Eendjovo daKalunga

Omolwashike tu na okuhongwa kuKalunga?

Moshitukulwa eshi omu na omapulo oo tashi dulika wa kala to lipula nao nomu na Omishangwa odo tadi nyamukula omapulo oo. Eendombwedi daJehova otadi ka kala da hafa okukundafana naave omanyamukulo omapulo oo.

1. Omolwashike tu na okuhongwa kuKalunga?

Kalunga okwa hala okulombwela ovanhu onghundana iwa oyo tai va etele ouwa. Onghundana oyo otai hangwa mOmbibeli. Ombibeli oi li ngaashi onhumwafo oyo twa shangelwa kuTate yetu omunahole womeulu. — Lesha Jeremia 29:11.

2. Onghundana oyo iwa oilipi?

Ovanhu ova pumbwa epangelo olo tali va etele ouwa. Ashike kape na nande omupangeli wopanhu a dula okuxulifa po oinima ngaashi elongifo leenghono, okuhenouyuki, omikifi ile efyo. Ndele onghundana iwa oyo ei kutya Kalunga ota ka eta epangelo olo tali ka etela ovanhu ouwa notali ka xulifa po okumona oixuna kwoludi keshe. — Lesha Daniel 2:44.

3. Omolwashike sha fimanenena okuhongwa kuKalunga?

Kalunga ota ka koshola edu mafiku nota ka xulifa po aveshe ovo hava etifa okumona oixuna. Ndele fimbo osho inashi ningwa, paife Kalunga ota hongo ovalininipiki omamiliyona shi na sha nanghee tava dulu okukala nonghedi yokukalamwenyo ixwepo, ve mu hole nosho yo nghee tava dulu okukala ve hole ovanhu vakwao. Eendjovo daKalunga otadi hongo ovanhu shi na sha nanghee tava dulu okuungaunga nomaupyakadi onghalamwenyo, nghee tava dulu okumona ehafo lashili nosho yo nghee tava dulu okuhafifa Kalunga. — Lesha Sefanja 2:3.

4. Olyelye Omushangi wOmbibeli?

Ombibeli oya fikama po momambo manini e li 66. Oya shangwa kovalumenhu 40 lwaapo. Omambo atano Ombibeli opehovelo okwa shangwa kuMoses omido 3 500 lwaapo da ka lupuka. Embo laxuuninwa lOmbibeli ola shangwa komuyapostoli Johannes omido da konda pe 1 900 da pita. Ndele nande ongaho, ovashangi vayo ova shanga omadiladilo aKalunga ndele kae fi avo vene. Onghee hano, Kalunga oye Omushangi wOmbibeli. — Lesha 2 Timoteus 3:16; 2 Petrus 1:21.

Otu shi shii kutya Ombibeli oya dja kuKalunga molwaashi oya xunganeka oshili i na sha naasho tashi ka ningwa po monakwiiwa. Kape na omunhu ta dulu okuxunganeka kombinga yonakwiiwa. (Jesaja 46:9, 10) Ombibeli otai tu hololele yo omaukwatya mawa aKalunga. Oi na eenghono odo tadi dulu okulundulula omunhu a dule okukala nonghalamwenyo i li xwepo. Eeshili adishe odo oda kwafela ovanhu omamiliyona va tomhwe kutya Ombibeli Ondjovo yaKalunga shili. — Lesha Josua 23:14; 1 Ovatessaloniki 2:13.

5. Oshike tashi dulu oku ku kwafela u ude ko Ombibeli?

Jesus okwa li a shiivika nawa e li omuhongi wEendjovo daKalunga. Nonande ovanhu vahapu ovo a li a popya navo ova hangwa nale ve shii Ombibeli, ova li natango va pumbwa ekwafo opo ve i ude ko nawa. Opo e va kwafele va ude ko nawa, Jesus okwa li ha tofa mOmbibeli lwoikando noku va fatululila opo va dule “okushiiva omishangwa.” Oshitukulwa eshi shi na oshipalanyole: “Konakona Eendjovo daKalunga,” otashi ke ku kwafela monghedi ya faafana naayo ya li ya longifwa kuJesus. — Lesha Lukas 24:27, 45.

Kape na lela oinima ihokwifa tai dulu okuyelekanifwa nokuhongwa kuKalunga shi na sha nelalakano longhalamwenyo. Ndele nande ongaho, ovanhu vamwe otashi dulika itava ka kala va hafa eshi to lihongo Ombibeli. Ashike ino sholola, molwaashi etimaumbwile loye li na sha noku ka mona omwenyo waalushe ole likolelela kokushiiva kwoye Kalunga. — Lesha Mateus 5:10-12; Johannes 17:3.

Opo u mone ouyelele wa wedwa po, tala etukulwa 2 lembo olo la ulikwa opo Ombibeli otai hongo lela shike?, la nyanyangidwa kEendombwedi daJehova.