Oshileshwa 3
Jesus Kristus Oye Lyelye?
Omolwashike Jesus ta ifanwa Omona waKalunga “omudalwa wotete”? (1)
Omolwashike ta ifanwa “Ondjovo”? (1)
Omolwashike Jesus e uyile kombada yedu e li omunhu? (2-4)
Omolwashike a longa oikumwifilonga? (5)
Jesus ota ka longa shike monakwiiwa i li popepi? (6)
1. Jesus okwa li meulu e li omunhu wopamhepo omanga ine uya kombada yedu. Ye okwa li eshito lotete laKalunga, nonghee ota ifanwa Omona waKalunga “omudalwa wotete.” (Ovakolossi 1:15; Ehololo 3:14, NW) Jesus oye aeke Omona oo Kalunga a shita ye mwene. Jehova okwa longifa Jesus fimbo ina ninga omunhu e li ‘omulongi onghulungu’ pamwe naye okushita oinima aishe imwe i lili meulu nokombada yedu. (Omayeletumbulo 8:22-31, NW; Ovakolossi 1:16, 17) Kalunga okwe mu longifa yo e li omupopikalelipo Waye munene. Omolwaashi Jesus ta ifanwa “Ondjovo.”—Johannes 1:1-3; Ehololo 19:13.
2. Kalunga okwa tuma Omona Waye kedu mokulundululila omwenyo waye moshidalelo shaMaria. Onghee hano Jesus ka li e na xe wopanhu. Omolwaashi ye ina fyuulula oulunde ile okuhawanenena kwasha. Kalunga okwa tuma Jesus kombada yedu omolwomatomheno atatu: (1) Oku tu honga oshili kombinga yaKalunga (Johannes 18:37), (2) okukanyatela oudiinini wa wanenena noku tu pa oshihopaenenwa tu shi shikule (1 Petrus 2:21), na (3) okuyamba omwenyo waye opo e tu mangulule moulunde nefyo. Omolwashike eshi sha li sha pumbiwa?—Mateus 20:28.
3. Mokuhadulika kelombwelo laKalunga, omunhu wotete, Adam, okwa longa osho Ombibeli tai shi ifana “oulunde.” Onghee hano Kalunga okwe mu tokolela efyo. (Genesis 3:17-19) Ye ina kala vali pamifikamhango daKalunga, onghee ka li vali a wanenena. Kanini nakanini okwa kulupa nokwa fya. Adam okwa tambekida oulunde kovana vaye aveshe. Omolwaashi hatu kulupa yo, hatu vele, nohatu fi. Ongahelipi ovanhu tava dulu okuxupifwa?—Ovaroma 3:23; 5:12.
4. Jesus okwa li omunhu a wanenena naanaa ngaashi Adam. Ndelenee, mepingafano naAdam, Jesus okwa li a dulika sha wanenena kuKalunga nokuli nomeyeleko linenenene. Onghee hano ye okwa li ta dulu okuyamba omwenyo waye wa wanenena wopanhu mokufuta oulunde waAdam. Eshi osho tashi ulikwa kOmbibeli shi li “ekulilo.” Kungaha ovana vaAdam okwa li tava dulu okumangululwa metokolelo lefyo. Aveshe ovo tava itavele Jesus otava dulu okudiminwa po omatimba avo nokumona omwenyo waalushe.—1 Timoteus 2:5, 6; Johannes 3:16; Ovaroma 5:18, 19.
5. Eshi Jesus a li kombada yedu okwa velula ovanaudu, okwa kutifa ovafindjala nokwa lotifa oikungulu. Ye okwa nyumuna nokuli ovafi. Omolwashike a longa oikumwifilonga? (1) Ye okwa li e uditile ovanhu ovo tava mono oixuna olukeno, nokwa li a hala oku va kwafela. (2) Oikumwifilonga yaye oya ulika kutya ye Omona waKalunga. (3) Yo oya ulika osho ta ka ningila ovanhu ovaduliki eshi ta ka pangela e li Ohamba kombada yedu.—Mateus 14:14; Markus 2:10-12; Johannes 5:28, 29.
6. Jesus okwa fya nokwa nyumunwa kuKalunga e li omushitwa wopamhepo, nokwa shuna meulu. (1 Petrus 3:18) Okudja opo, Kalunga okwe mu ninga Ohamba. Mafiku Jesus ota ka kufa po oukolokoshi noudjuu aushe kombada yedu eli.—Epsalme 37:9-11; Omayeletumbulo 2:21, 22, NW.
[Pictures on page 7]
Oukalele waJesus owa li wa kwatela mo okuhonga, okulonga oikumwifilonga, nokuli noku tu yandjela omwenyo waye