Konakona Eendjovo dakalunga

Jesus Kristus oye lyelye?

Moshitukulwa eshi omu na omapulo oo tashi dulika wa kala to lipula nao nosha ulika kutya omanyamukulo omapulo oo otaa hangwa peni mOmbibeli. Eendombwedi daJehova otadi ka kala da hafa okukundafana naave omanyamukulo omapulo oo.

1. Jesus Kristus oye lyelye?

Mepingafano novanhu vakwao, Jesus okwa kala meulu e li omunhu wopamhepo ofimbo ina dalwa e li omunhu kombada yedu. (Johannes 8:23) Oye a shitwa tete kuKalunga nokwa li a kwafela Kalunga mokushita oishitwa ikwao aishe. Jesus oye aeke a shitwa kuJehova odikilila nomolwaasho ha ifanwa Omona waKalunga ‘Ewifa.’ Okwa kala yo ta longo e li Omupopikalelipo waKalunga nomolwaasho ha ifanwa yo “Ondjovo.” — Johannes 1:1-3, 14; lesha Omayeletumbulo 8:22, 23, 30; Ovakolossi 1:15, 16.

2. Omolwashike Jesus e uyile kombada yedu?

Kalunga okwa li a tuma Omona waye kombada yedu okudja meulu eshi a lundululila omwenyo waye moshidalelo shokakadona Okajuda kedina Maria. Onghee hano, Jesus ka li e na xe wopanhu. (Lukas 1:30-35) Jesus okwa li e uya kombada yedu opo (1) a honge ovanhu oshili kombinga yaKalunga, (2) e va tulile po oshihopaenenwa shi na sha nanghee ve na okulonga ehalo laKalunga nosho yo (3) okuyandja omwenyo waye wa wanenena u ninge “oikulila.” — Lesha Mateus 20:28; Johannes 18:37.

3. Omolwashike twa li twa pumbwa ekulilo?

Ekulilo olo ofuto oyo hai yandjwa okumangulula omunhu meemhango. Kalunga ka li a lalakanena ovanhu va kale hava fi nohava kulupa. Osho otu shi shii ngahelipi? Kalunga okwa li a lombwela omunhu wotete, Adam, a ti kutya ngeenge okwa nyono ota ka fya. Ngeno Adam ka nyonene, ngeno ina fya nandenande. Nonande Adam okwa ka kala nomwenyo omafelemido a ka landula ko okudja eshi a nyona, pataleko laKalunga okwa fya mefiku olo a nyona. (Genesis 2:16, 17; 5:5) Oludalo laAdam alishe ola fyuulula oulunde nondjabi youlunde, efyo. Onghee hano, efyo “ole uya” movanhu aveshe omolwokunyona kwaAdam, nomolwaasho twa li twa pumbwa ekulilo. — Lesha Ovaroma 5:12; 6:23.

4. Omolwashike Jesus a li a fya?

Olyelye a li ta dulu oku tu kulila mefyo? Ngeenge otwa fi, ohatu futile po ashike omatimba etu vene. Kape na omunhu ina wanenena ta dulu okukulila ovanhu vakwao. — Lesha Epsalme 49:8-10.

Molwaashi Jesus ka li e na xe wopanhu, ka li a fyuulula okuhawanenena. Nomolwaasho Jesus okwa li a fya omolwomatimba ovanhu, ndele hamolwomatimba aye mwene. Eshi Kalunga a li a tuma Omona waye e tu file osha li euliko lohole yaYe inenenene yokuhola ovanhu. Jesus okwa li yo a ulika kutya oku tu hole eshi a dulika kuXe nokwa yandja omwenyo waye omolwomatimba etu. — Lesha Johannes 3:16; Ovaroma 5:18, 19.

5. Jesus ota ningi shike paife?

Eshi Jesus a li a velula ovanaudu, a nyumuna ovafi nokwa xupifa ovanhu moiponga, okwa li ashike a ulika osho ta ka ningila ovanhu aveshe ovaduliki monakwiiwa. (Lukas 18:35-42; Johannes 5:28, 29) Konima eshi Jesus a fya, Kalunga okwa li e mu nyumuna e li omunhu wopamhepo. (1 Petrus 3:18) Opo nee Jesus okwa ka kala kolulyo laKalunga a teelela a pewe eenghonopangelo dokupangela edu alishe e li Ohamba. (Ovaheberi 10:12, 13) Paife Jesus ota pangele meulu e li Ohamba novashikuli vaye kombada yedu otava udifa onghundana iwa mounyuni aushe. — Lesha Daniel 7:13, 14; Mateus 24:14.

Mafiku, Jesus ota ka longifa eenghonopangelo daye e li Ohamba opo a xulife po okumona oixuna akushe nosho yo ovo have ku etifa. Ovanhu omamiliyona ovo ve na eitavelo tali longo muJesus nohava dulika kuye otava ka kala nomwenyo moparadisa kombada yedu. — Lesha Epsalme 37:9-11.

Opo u mone ouyelele wa wedwa po, tala etukulwa 4 lembo Ombibeli otai hongo lela shike? olo la ulikwa apa, la nyanyangidwa kEendombwedi daJehova.

[Efano pepandja 11]

Ovanhu omamiliyona ovo ve na eitavelo tali longo muJesus nohava dulika kuye otava ka kala nomwenyo moparadisa kombada yedu