Oshileshwa 6
Ouhamba waKalunga Oshike?
Ouhamba waKalunga ou li peni? (1) Olyelye Ohamba yao? (2)
Mbela vamwe ove na ombinga mokupangela pamwe nOhamba? Ngeenge osho, vangapi? (3)
Oshike tashi ulike kutya otu li momafiku axuuninwa? (4)
Ouhamba waKalunga otau ka ningila shike ovanhu monakwiiwa? (5-7)
1. Eshi Jesus a li kombada yedu, okwa honga ovashikuli vaye va ilikane Ouhamba waKalunga. Ouhamba oo epangelo olo tali wilikwa kohamba. Ouhamba waKalunga oo epangelo le likalekelwa. Owa dikwa po meulu notau ka pangela ombada yedu eli. Otau ka yapulifa edina laKalunga. Otau ka ningifa ehalo laKalunga li longwe kombada yedu ngaashi hali longwa meulu.—Mateus 6:9, 10.
2. Kalunga okwa udaneka kutya Jesus ota ka ninga Ohamba yOuhamba Waye. (Lukas 1:30-33) Eshi Jesus a li kombada yedu, okwa ulika kutya ye ota ka kala Omupangeli omunanghenda, omuyuki nokwa wanenena. Eshi a shuna meulu, ka li a tulwa kolukalwapangelo efimbo olo tuu olo e li Ohamba yOuhamba waKalunga. (Ovaheberi 10:12, 13) Mo 1914, Jehova okwa yandja kuJesus eenghonopangelo odo kwa li E mu udanekela. Okudja opo, Jesus okwa pangela meulu e li Ohamba yaJehova ya tulwa po.—Daniel 7:13, 14.
3. Jehova okwa hoolola yo ovalumenhu novakainhu ovadiinini vamwe kombada yedu va ye meulu. Vo otava ka pangela ovanhu pamwe naJesus ve li eehamba, ovatokoli novapristeri. (Lukas 22:28-30; Ehololo 5:9, 10) Jesus ovapangeli pamwe naye ava mOuhamba waye, okwe va ifana “oshiunda shinini.” Ove li 144 000.—Lukas 12:32, OB-1954; Ehololo 14:1-3.
4. Diva eshi Jesus a ninga Ohamba, okwa umba mo Satana novaengeli vaye ovakolokoshi meulu nokwe va umbila komudingonoko wedu. Hano omolwaashi oinima ya naipala unene oku kombada yedu okudja mo 1914. (Ehololo 12:9, 12) Oita, eendjala, oudu wolutapo, ehapupalo louhenamhango—aishe ei oyo oshitukulwa ‘shedidiliko’ olo tali ulike kutya Jesus ota pangele nonokutya onghalelo ei oi li momafiku ayo axuuninwa.—Mateus 24:3, 7, 8, 12; Lukas 21:10, 11; 2 Timoteus 3:1-5.
5. Mafiku Jesus ota ka tokola ovanhu noku va yoolola ngaashi omufita ta yoolola eedi moikombo. “Eedi” ovovo tava ka kala ve liulika vo vene ve li ovapangelwa vaye ovadiinini. Vo otava ka mona omwenyo waalushe kombada yedu. “Oikombo” ovovo va ekelashi Ouhamba waKalunga. (Mateus 25:31-34, 46) Monakwiiwa i li popepi, Jesus ota ka hanauna po aveshe ovo va fa oikombo. (2 Ovatessaloniki 1:6-9) Ngeenge owa hala okukala imwe ‘yomeedi’ daJesus, ou na okupwilikina ketumwalaka lOuhamba nokukatuka metwokumwe naasho to lihongo.—Mateus 24:14.
6. Paife edu ola tukaulwa moilongo ihapu. Keshe shimwe oshi na epangelo lasho vene. Oiwana ei luhapu ohai kondjifafana. Ndelenee Ouhamba waKalunga otau ka pingena po omapangelo aeshe opanhu. Otau ka pangela u li epangelo olo alike kombada yedu alishe. (Daniel 2:44) Opo nee itaku ka kala vali oita, omunyonena nelongifo leenghono. Ovanhu aveshe otava ka kala pamwe ve na ombili noukumwe.—Mika 4:3, 4.
7. Pefimbo lEpangelo laJesus lOmido Eyovi, ovanhu ovadiinini otava ka kala va wanenena, nedu alishe otali ka ninga oparadisa. Pexulilo lomido eyovi, Jesus ota ka kala a longa ashishe osho Kalunga e mu pula a longe. Opo nee ota ka shunifa Ouhamba kuXe. (1 Ovakorinto 15:24) Omolwashike ito lombwele ookaume koye novaholike voye kombinga yaasho Ouhamba waKalunga tau ka ninga?
[Picture on page 13]
Koshi yepangelo laJesus, itaku ka kala vali outondwe ile onhondo