Osho Jesus a honga kombinga yOuhamba waKalunga

“Okwa endaaenda noilando nomikunda ndele okwa udifa evangeli louhamba waKalunga.” — LUKAS 8:1.

OTU hole okupopya kombinga yoinima oyo ya fimana kufye. Jesus okwa ti: “Eshi shi yadi momutima, osho tashi popifa okanya.” (Mateus 12:34) Ngeenge otwa konakona kombinga yoinima oyo Jesus a popya pefimbo loukalele waye, ohatu dulu okufika pexulifodiladilo kutya okwa li a lenga Ouhamba waKalunga.

Ouhamba waKalunga oshike? Ouhamba oo epangelo olo hali pangelwa kohamba. Onghee hano, Ouhamba waKalunga oo epangelo olo la dikwa po kuKalunga. Jesus okwa li ha popi lwoikando kombinga yOuhamba waKalunga, wa li enenediladilo letumwalaka laye. Ouhamba owa tumbulwa mOmavangeli ane lwoikando i dule pe 110. Ashike Jesus ka li ashike a honga ovanhu kombinga yOuhamba waKalunga okupitila meendjovo, ndele okwa li yo e va honga shihapu shi na sha nao nosho yo osho tau ka ninga okupitila meenghatu daye.

Olyelye Ohamba yOuhamba waKalunga? Ohamba yOuhamba waKalunga inai hoololwa kovanhu. Ndele ponhele yaasho, Omupangeli a tya ngaho okwa hoololwa kuKalunga mwene. Jesus okwa holola okupitila mehongo laye kutya oye a hoololwa kuKalunga a ninge Ohamba.

Jesus okwa li e shii kutya omaxunganeko Ombibeli okwa xunganeka kutya Messias omuudanekwa ota ka pangela mOuhamba oo itau ka xula po. (2 Samuel 7:12-14; Daniel 7:13, 14; Mateus 26:63, 64) Dimbuluka kutya Jesus okwa li a popya a manguluka kutya oye Messias omuudanekwa. Kungaho, Jesus okwa li a dimina kutya oye Ohamba ya nangekwa po kuKalunga. (Johannes 4:25, 26) Onghee hano, osha yeleka eshi Jesus a li a longifa lwoikando outumbulilo “ouhamba wange.” — Johannes 18:36.

Jesus okwa li yo a honga kutya ope na ovanhu vamwe vali ovo tava ka pangela pamwe naye mOuhamba oo. (Lukas 22:28-30) Okwa ti kutya ovo tava ka pangela pamwe naye ove li “okangudu,” molwaashi omuvalu wavo owa ngabekwa. Okwa li e va lombwela a ti: “Xo a hala oku mu pa ouhamba.” (Lukas 12:32) Embo laxuuninwa lOmbibeli ola ulika kutya ovanhu ovo va pewa oufembanghenda woku ka pangela pamwe naKristus ove li 144 000. — Ehololo 5:9, 10; 14:1.

Ouhamba ou li peni? Jesus okwa li a lombwela omupangeli waRoma Pontius Pilatus a ti: “Ouhamba wange kau fi womounyuni ou.” (Johannes 18:36) Ouhamba waKalunga oo u li meke laKristus itau ka pangela okupitila movakalelipo vopanhu. Jesus okwa li a popya kombinga yOuhamba waKalunga lwoikando a ti: “Ouhamba weulu.”a (Mateus 4:17; 5:3, 10, 19, 20) Onghee hano, Ouhamba waKalunga oo epangelo lomeulu.

Eshi Jesus a li kombada yedu, okwa li a teelela filufilu okushuna meulu. Okwa li a lombwela ovo tava ka pangela pamwe naye kutya ngeenge okwa shuna ote ke va “longela onhele” opo va dule oku ka kala pamwe naye. — Johannes 14:2, 3.

Ouhamba otau ka wanifa po shike? Jesus okwa honga ovapwilikini vaye va kale hava ilikana kuKalunga tava ti: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:9, 10) Ehalo laKalunga ola kala tali wanifwa po meulu. Elalakano laKalunga li na sha nedu otali ka wanifwa po okupitila mOuhamba oo. Ndele opo osho shi ningwe, Ouhamba waKalunga otau ka etifa omalunduluko manene kombada yedu.

Ouhamba otau ka ninga shike kombada yedu? Jesus okwa ti kutya Ouhamba waKalunga otau ka kufa po owii aushe mokuxulifa po ovanawii. (Mateus 25:31-34, 46) Kungaho, oulingilingi nosho yo owii aushe otai ka xulifwa po. Jesus okwa honga kutya kombada yedu otaku ka kala ku yadi “ovananheni,” ovayuki, ovananghenda, “ovo ve nomitima da yela” nosho yo “ovanambili.” — Mateus 5:5-9.

Mbela ovanhu ovo ovadiinini otava ka kala kombada yedu oku kwa nyatekwa? Hasho nandenande! Jesus okwa udaneka kutya kombada yedu otaku ka ningwa omalunduluko manene okupitila mOuhamba waKalunga. Omulumenhu oo a li a valelwa pamwe naJesus okwa ti: ‘Jesus, dimbulukwe nge, ngenge wa fiki mouhamba woye.’ Jesus okwe mu nyamukula a ti: “Oshili handi ku lombwele, onena tuu eli to ka kala pamwe naame [mOparadisa].” (Lukas 23:42, 43) Doshili, Ouhamba waKalunga otau ka lundulula edu alishe li ninge oparadisa ngaashi ya li moshikunino shaEden.

Ouhamba otau ka ningila vali ovanhu shike? Jesus okwa li a ninga shihapu shihe fi ashike okuudaneka kombinga yaasho Ouhamba waKalunga tau ka ninga. Okwa li yo a ulika kutya otau ka ninga shike. Jesus okwa li a longa oikumwifilonga ihapu yokuvelula, nokungaho, okwa li a ulika kanini osho ta ka ninga pauyadi monakwiiwa pefimbo lepangelo lOuhamba waye. Evangeli la nwefwa mo ola popya kombinga yaJesus la ti: “Ye okwa endaaenda muGalilea ashishe, ndee ta longo meeshinagoga davo, ndele ta udifa evangeli louhamba, ndee ta velula oudu keshe noungone aushe movanhu.” — Mateus 4:23.

Jesus okwa li a velula omikifi di lili noku lili. Okwa li a “twikulula omesho omunhu a dalwa omupofi.” (Johannes 9:1-7, 32, 33) Jesus okwa li a kuma pahole omulumenhu umwe oo a li ta hepekwa koudu woshilundu unyanyalifa ndele ta veluka. (Markus 1:40-42) Eshi Jesus a li a etelwa “omufitamatwi e he shii kupopya nawa,” okwa li a ulika kutya “ovafitamatwi ohe va udifa ko novafindaka ohe va ningi va popye.” — Markus 7:31-37.

Ohamba oyo ya nangekwa po kuKalunga oi na yo eenghono okunyumuna nokuli noonakufya. Ombibeli oya popya ovanhu vatatu ovo va li va nyumunwa kuJesus. Okwa li a nyumuna okamonamati komufiyekadi umwe, okakadona komido 12 nosho yo kaume kaye omuholike Lasarus. — Lukas 7:11-15; 8:41-55; Johannes 11:38-44.

Jesus okwa xunganeka okupitila momuyapostoli Johannes kombinga yonakwiiwa ikumwifi oyo ya tuvikililwa ovapangelwa vOuhamba waKalunga, a ti: “Tala, etwali laKalunga oli li povanhu, Oye ta tula puvo, vo otava ningi ovanhu vaye, Kalunga mwene ota kala pamwe navo, Kalunga kavo; ndele ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” (Ehololo 1:1; 21:3, 4) Diladila ashike kombinga younyuni omo itamu ka kala oluhodi, ouyahame nosho yo efyo! Opo nee, eilikano olo kutya ehalo laKalunga nali wanifwe kombada yedu ngaashi meulu otali ka wanifwa pauyadi.

Ouhamba waKalunga otau uya naini? Jesus okwa honga kutya epangelo laye ola li tali ka hovela okupangela pefimbo limwe nefimbo olo a popya kutya ‘okuuya’ kwaye. Jesus okwa yandja ouyelele wopaxunganeko oo tau ulike kutya okukala po kwaye meenghono douhamba okwa li taku ka hovela naini. Pefimbo olo, mounyuni aushe omwa li tamu ka kala mu yadi omaupyakadi, mwa kwatelwa oita, ondjala, omakakamo edu, omikifi dolutapo nosho yo ehapupalo loukolokoshi. (Mateus 24:3, 7-12; Lukas 21:10, 11) Omaupyakadi oo nosho yo oinima ikwao ihapu oyo Jesus a xunganeka oya hovela unene okulimonikila okudja mo 1914, omudo omo Oita yotete yOunyuni ya hovela. Osho otashi ulike kutya Jesus ota pangele paife e li Ohamba. Mafiku Ouhamba otau ke uya, nehalo laKalunga otali ka wanifwa kombada yedu.b

Okuuya kwOuhamba waKalunga mbela otaku ka tya shike kwoove pauhandimwe? Osho otashi likolelele kwaasho kutya owa tokola okulinyenga ngahelipi ketumwalaka laJesus.

[Omashangelo opedu]