Oshileshwa 13
Ongahelipi To Dulu Okumona Elongelokalunga Lashili?
Mbela omalongelokalunga aeshe okwa pandika kuKalunga, ile limwe alike? (1)
Omolwashike ku na omalongelokalunga mahapu unene oo tae liti opaKriste? (2)
Ongahelipi to dulu okukoneka Ovakriste vashili? (3-7)
1. Jesus okwa tameka elongelokalunga lopaKriste limwe alike lashili. Onghee hano kunena oku na ashike okukala olutu limwe, ile ongudu imwe, yovailikani vashili vaJehova Kalunga. (Johannes 4:23, 24; Ovaefeso 4:4, 5) Ombibeli otai hongo kutya ovanhu ashike vanini ve li mondjila ya finana oyo ya finda komwenyo.—Mateus 7:13, 14.
2. Ombibeli oya xunganeka kutya konima yefyo lovayapostoli, omahongo a puka noilonga i he fi yopaKriste oya li tai ke uya kanini nakanini meongalo lopaKriste. Ovalumenhu otava ka nana ovaitaveli ve va shikule ponhele yokushikula Kristus. (Mateus 7:15, 21-23; Oilonga 20:29, 30) Omolwaashi tu wete omalongelokalunga mahapu unene e lili noku lili tae liti oo opaKriste. Ongahelipi hatu dulu okukoneka Ovakriste vashili?
3. Edidiliko la tongomana unene lOvakriste vashili olo kutya vo ove na ohole yashili mokati kavo. (Johannes 13:34, 35) Vo ihava hongwa va diladile kutya vo ovawa ve dule ovanhu vomihoko dimwe ile vomaluvala amwe. Noihava hongwa okutonda ovanhu vokoilongo i he fi yavo. (Oilonga 10:34, 35) Onghee hano vo ihava kufa ombinga moita. Ovakriste vashili otava kala nOvakriste vashili vakwao ve li novamwaxe ovalumenhu novakainhu.—1 Johannes 4:20, 21.
4. Edidiliko limwe lelongelokalunga lashili olo kutya oilyo yalo ohai fimaneke unene Ombibeli. Yo oye i tambula ko i li Eendjovo daKalunga noya itavela osho tai popi. (Johannes 17:17; 2 Timoteus 3:16, 17) Oya tala ko Eendjovo daKalunga di li da fimana unene di dule omadiladilo ile eenghedi dopanhu. (Mateus 15:1-3, 7-9) Ohai kendabala okukala metwokumwe nOmbibeli monghalamwenyo yayo yakeshe efiku. Onghee hano ihai udifa oshinima shonhumba shi ha longwe omanga yo vene tai shi longo.—Titus 1:15, 16.
5. Elongelokalunga lashili oli na yo okufimaneka edina laKalunga. (Mateus 6:9) Jesus okwa shiivifila vamwe edina laKalunga, Jehova. Ovakriste vashili ove na okuninga sha faafana. (Johannes 17:6, 26; Ovaroma 10:13, 14) Ovanhu velipi momudingonoko woye hava lombwele vamwe kombinga yedina laKalunga?
6. Ovakriste vashili ove na okuudifa kombinga yOuhamba waKalunga. Jesus osho a ninga. Ye okwa li ha popi alushe kombinga yOuhamba. (Lukas 8:1) Okwa lombwela ovahongwa vaye va udife etumwalaka olo tuu olo kombada yedu alishe. (Mateus 24:14; 28:19, 20) Ovakriste vashili ova itavela kutya Ouhamba waKalunga oo auke tau ka eta ombili neameno lashili kombada yedu eli.—Epsalme 146:3-5.
7. Ovahongwa vaJesus ove na okukala ve he fi oshitukulwa shounyuni ou mwii. (Johannes 17:16, NW) Vo ihave litula moinima younyuni yopapolotika nomeemhata dopanghalafano. Ohava henuka elihumbato, oilonga noikala tai eta oshiponga oyo i li apeshe mounyuni. (Jakob 1:27; 4:4) Oto dulu mbela okukoneka ongudu yopalongelokalunga momudingonoko wopunye oyo i na omadidiliko aa Oukriste washili?
Ovakriste vashili ove holafane, ova fimaneka Ombibeli, nohava udifa shi na nasha nOuhamba waKalunga