Konakona Eendjovo daKalunga
Ongahelipi to dulu okudidilika mo elongelokalunga lashili?
Moshitukulwa eshi omu na omapulo oo tashi dulika ho kala to lipula kombinga yao nosha ulika kutya openi to dulu okuhanga omanyamukulo ao mOmbibeli yoye. Eendombwedi daJehova otadi ka kala da hafa okukundafana naave kombinga yomanyamukulo oo.
1. Mbela oku na ashike elongelokalunga lashili limwe?
Jesus okwa honga ovashikuli vaye elongelokalunga limwe alike, elongelokalunga lashili. Ola fa ondjila oyo tai twala komwenyo. Jesus okwa popya shi na sha nondjila oyo a ti: ‘Ovanini vongaho ovo tave i mono.’ (Mateus 7:14) Kalunga oha hokwa ashike elongelokalunga olo le likolelela koshili yEendjovo daye. Ovalongelikalunga vashili aveshe ova hangana meitavelo limwe. — Lesha Johannes 4:23, 24; 14:6; Ovaefeso 4:4, 5.
2. Omolwashike omalongelokalunga mahapu e lili noku lili hae liti kutya opaKriste?
Ovaprofeti ovanaipupulu ova nyonauna Oukriste noku u longifa omolwouwa wavo vene. Ngaashi Jesus a popya, ohava monika va fa ‘eedi’ daye, ndele ohave lihumbata va fa omambungu a fya ondjala. (Mateus 7:13-15, 21, 23) Ovakriste ovashunimonima ova li va hapupala unene tuu konima eshi ovayapostoli vaJesus va fya. — Lesha Oilonga 20:29, 30.
3. Oinima imwe ilipi oyo tai ningifa elongelokalunga lashili li kale la yooloka ko komalongelokalunga amwe?
Ovalongelikalunga vashili ova fimaneka Ombibeli i li Eendjovo daKalunga. Ohava kendabala okukala metwokumwe nomafinamhango ayo. Onghee hano, elongelokalunga lashili ola yooloka ko kwaalo la kanghamena komadiladilo opanhu. (Mateus 15:7-9) Ovalongelikalunga vashili ohava kala metwokumwe naasho hava udifa. — Lesha Johannes 17:17; 2 Timoteus 3:16, 17.
Elongelokalunga lashili ola fimaneka edina laKalunga, Jehova. Jesus okwa shiivifa edina laKalunga. Okwa kwafela ovanhu va shiive Kalunga nokwe va honga va kale hava ilikana kutya edina laKalunga nali yapulwe. (Mateus 6:9) Elongelokalunga lilipi hali xumifa komesho okulongifwa kwedina laKalunga moshitukulwa sheni? — Lesha Johannes 17:26; Ovaroma 10:13, 14.
4. Ongahelipi to dulu okudidilika mo ovalongelikalunga vashili?
Ovakriste vashili ohava udifa kombinga yOuhamba waKalunga. Kalunga okwa li a tuma Jesus kombada yedu e uye a udife kombinga yOuhamba. Ouhamba waKalunga oo ashike eteelelo lovanhu. Jesus okwa li a twikila okupopya kombinga yao fiyo efiku lokufya kwaye. (Lukas 4:43; 8:1; 23:42, 43) Okwa lombwela ovashikuli vaye va udife kombinga yOuhamba waKalunga. Ngeenge owa talelwa po komunhu ta popi kombinga yOuhamba waKalunga, mbela omunhu oo otashi dulika e li melongelokalunga lilipi? — Lesha Mateus 10:7; 24:14.
Ovashikuli vaJesus kave fi oshitukulwa shounyuni ou woukolokoshi. Ihava kufa ombinga moinima yopapolotika ile meenhamanana dopanghalafano. (Johannes 17:16) Natango, ihava hopaenene elihumbato lii noikala yovanhu mounyuni. — Lesha Jakob 1:27; 4:4.
5. Oshike unene hashi didilikifa mo Ovakriste vashili?
Ovakriste vashili ove holafane nohole ya xwama. Ove lihonga mEendjovo daKalunga okufimaneka ovanhu vomihoko adishe. Nonande omalongelokalunga oipupulu luhapu ohaa yambidida neenghono oita yoiwana, ovalongelikalunga vashili ihava ningi ngaho. (Mika 4:1-4) Ponhele yaasho, oilyo yelongelokalunga lashili ohai longifa nehalo liwa efimbo layo nosho yo oiniwe yayo mokukwafela vamwe noku va twa omukumo. — Lesha Johannes 13:34, 35; 1 Johannes 4:20, 21.
Elongelokalunga lilipi la kanghamekela omahongo alo aeshe kEendjovo daKalunga, la fimaneka edina laKalunga nohali udifa kutya Ouhamba waKalunga oo ashike eteelelo lovanhu? Elongelokalunga lilipi li na ohole noihali yambidida oita? Oumbangi otau ulike kutya Eendombwedi daJehova. — 1 Johannes 3:10-12.
Opo u mone ouyelele wa wedwa po, tala etukulwa 15 lembo olo la ulikwa opo Ombibeli otai hongo lela shike?, la nyanyangidwa kEendombwedi daJehova.
[Efano pepandja 16]
“Otava ti ova shiiva Kalunga, ndelenee moilonga yavo otave mu likale.” — Titus 1:16