Oshike hashi ningwa pefyo?

Efyo olo ekondjifafano nomwenyo. Efyo ola fa eemhofi doshitula. (Johannes 11:11-14) Ovafi itava dulu okuuda ko, okumona ko, okupopya ile okudiladila sha. (Omuudifi 9:5, 10) Elongelokalunga loipupulu ohali hongo kutya ovafi ohava i mounyuni weemhepo va ka kale pamwe nooxekulululwa. Ombibeli hasho tai hongo osho.

Ovo va fya itava dulu oku tu kwafela, noitava dulu oku tu yahameka. Kovanhu oshi li oshinima shaapeshe okushikula eenghedindjikilile nokufiyawila oko va itavela kutya otaku hafifa oonakufya. Eshi otashi nyemateke Kalunga molwaashi oshe likolelela koipupulu yaSatana. Itashi hafifa tuu nee nande ovafi, molwaashi kave na omwenyo. Katu na okutila ile okwiilikana oonakufya. Otu na ashike okwiilikana Kalunga oye aeke. — Mateus 4:10.

Ovafi otava ka kala vali nomwenyo. Jehova ota ka pendula ovafi opo va kale nomwenyo moparadisa kombada yedu. Ndele efimbo olo oli li monakwiiwa natango. (Johannes 5:28, 29; Oilonga 24:15) Kalunga ota dulu okupendula ovo fya ngaashi ove to dulu okupendula meemhofi omunhu oo a kofa. — Markus 5:22, 23, 41, 42.

Ediladilo kutya ihatu fi olo oipupulu ya tandavelifwa kuSatana Ondiaboli. Satana neendemoni daye otava ningifa ovanhu va diladile kutya eemhepo doonakufya odi na omwenyo notadi etele ovanhu omikifi nosho yo omaupyakadi. Satana oha pukifa ovanhu, nomafimbo amwe ohe shi ningi okupitila meendjodi ile momamoniko. Jehova ota tokola ovo tava kendabala okupopya novafi. — Deuteronomion 18:10-12.