Oshike hashi tu ningilwa, ngeenge otwa fi?

Mbela owa filwa nale umwe oo u hole neenghono? Monghalo ya tya ngaho inyikifa oluhodi, otashi dulika u lipule kutya: ‘Oshike hashi tu ningilwa ngeenge otwa fi? Mbela ope na ngoo eteelelo loku ka mona vali ovo va fya?’ Moshileshwa eshi naashi tashi landula ko, oto ka mona omanyamukulo opaMbiibeli taa hekeleke.

1. Oshike hashi tu ningilwa ngeenge otwa fi?

Jesus okwa yelekanifa efyo neemhofi didjuu. Omunhu, oo a kofa eemhofi didjuu, iha kala e shii osho tashi ningwa po momudingonoko. Efyo ola faafana ngahelipi neemhofi? Konima ngeenge omunhu okwa fi, iha kala e udite ouyahame wa sha. Iha kala a fya oudja, kashi na nee mbudi kutya okwa li e hole ookaume kaye novapambele vaye shi fike peni. Ombiibeli oya ti kutya ‘oonakufya inava shiiva nande osha.’— Lesha Omuudifi 9:5.

2. Ohatu mono ouwa ulipi eshi twa shiiva oshili kombinga yefyo?

Ovanhu vahapu ohava tila efyo nosho yo oonakufya! Ashike oto dulu okuhekelekwa kwaasho Ombiibeli ya popya kombinga yefyo. Jesus okwa ti: “Oshili otai ke mu mangulula.” (Johannes 8:32) Mepingafano naasho omalongelokalunga amwe haa hongo, Ombiibeli itai hongo kutya ngeenge omunhu okwa fi ope na sha shimwe osho hashi xupu po. Onghee hano, kape na oo ha mono oixuna ngeenge okwa fi. Natango, molwaashi oonakufya kave na eshi ve shii, itava dulu oku tu etela oshiponga. Onghee inatu pumbwa okuhafifa oonakufya, ile oku va longela noinatu pumbwa oku va ilikanena.

Ovanhu vamwe ohava ti kutya otava dulu okupopya noonakufya. Ashike osho itashi shiiva nandenande. Ngaashi twe lihonga, ‘oonakufya inava shiiva nande osha.’ Ovanhu ovo hava diladila kutya ohava popi noonakufya otashi dulika hava popi neendemoni odo hadi lifefa ovanhu ovo va fya. Onghee okushiiva oshili kombinga yefyo okwe tu amena keendemoni. Jehova okwe tu londwela tuha popye noonakufya molwaashi oku shii kutya okupopya neendemoni otaku dulu oku tu etela oshiponga.— Lesha Deuteronomion 18:10-12.

3. Lihonga kombinga yonghalo yashili omo mu na oonakufya

Ovanhu mounyuni ova itavela oinima i lili noku lili shi na sha naasho hashi tu ningilwa, ngeenge otwa fi. Ndele hakeshe shimwe osho sha itavelwa shi li mondjila.

• Ovanhu moshitukulwa sheni ova itavela shike kombinga yonghalo omo mu na oonakufya?

OKAVIDIO: Oonakufya ove li monghalo ya tya ngahelipi?— Okatukulwa kaxupi (1:19)

Lesha Omuudifi 3:20, ndele tamu kundafana omapulo taa shikula:

• She likolelela kovelishe oyo, oshike hashi ningilwa omunhu ngeenge okwa fi?

• Mbela ope na oshitukulwa shonhumba osho hashi xupu po, ngeenge omunhu okwa fi?

Ombiibeli oye tu lombwela kombinga yefyo laLasarus, kaume kopofingo kaJesus. Eshi to lesha Johannes 11:11-14, didilika osho Jesus a popya kombinga yonghalo omo mwa li Lasarus. Ndele tamu kundafana omapulo taa shikula:

• Jesus okwa faafanifa efyo nashike?

• Eyelekanifo olo otali tu hongo shike kombinga yonghalo omo mu na oonakufya?

• Ou uditile ngahelipi osho Ombiibeli ya popya shi na sha nefyo?

4. Ohatu mono ouwa eshi tu shii oshili kombinga yefyo

Okushiiva oshili kombinga yefyo okwe tu mangulula koumbada wokutila oonakufya. Lesha Omuudifi 9:10, ndele tamu kundafana epulo tali shikula:

• Mbela oonakufya otava dulu oku tu etela oshiponga?

Oshili yOmbiibeli oye tu amena koipupulu oyo kutya oonakufya ova pumbwa okuhafifwa, ile nokuli okulongelwa. Lesha Jesaja 8:19 nosho yo Ehololo 4:11, ndele tamu kundafana epulo tali shikula:

• Mbela oto diladila kutya Jehova oha kala e uditile ngahelipi omunhu oo ha longele nakufya, ile ta kongo ekwafo kuye?

5. Oshili kombinga yefyo ohai tu hekeleke

Ovanhu vahapu ova hongwa kutya ngeenge ova fi, otava ka monifwa oixuna omolwomapuko avo omonakudiwa. Ashike otashi tu hekeleke eshi tu shii kutya kape na oo ta ka mona oixuna, ngeenge okwa fi, nokuli naavo va ninga oinima inyanyalifi. Lesha Ovaroma 6:7, ndele tamu kundafana epulo tali shikula:

• Ombiibeli oya ti kutya, ngeenge omunhu okwa fi, Kalunga ihe mu tale ko vali e na ondjo omolwomapuko aye onale. Ndele mbela oto diladila kutya ngeenge omunhu okwa fi, oha mono oixuna omolwomapuko aye omonakudiwa?

Ngeenge otwa shiiva nawa Jehova, ohatu ka mona kutya ke na efiku a efe oonakufya va kale tava mono oixuna. Lesha Deuteronomion 32:4 nosho yo 1 Johannes 4:8, ndele tamu kundafana omapulo taa shikula:

• Mbela Kalunga, oo e na omaukwatya oo a tumbulwa meevelishe odo, oku na ngoo efiku a efe oonakufya va kale tava hepekwa momundilo?

• Mbela ou wete okushiiva oshili kombinga yoonakufya taku hekeleke? Omolwashike to tile ngaho?

ENGONGO

Ngeenge omunhu okwa fi, onghalamwenyo yaye opo ya xulila opo. Oonakufya ihava mono oixuna, noihava dulu okuhepeka ovanhu.

Eendululo

• Oshike hashi tu ningilwa ngeenge otwa fi?

• Ohatu mono ouwa ulipi eshi twa shiiva oshili kombinga yefyo?

• Oshili kombinga yefyo ohai tu hekele ngahelipi?

TALA OUYELELE WA WEDWA PO

Tala kutya oshitya “omwenyo” paMbiibeli otashi ti naanaa shike.

“Omwenyo oshike?” (Oshitukulwa shi li ko jw.org)

Tala ngeenge Kalunga oha longifa oheli, opo a hepeke ovakolokoshi.

Mbela oku na ngoo shili oheli omo hamu hepekelwa ovanhu? (3:07)

Mbela otwa pumbwa okukala twa tila oonakufya?

Eemhepo dOonakufya—Otadi Dulu Oku Ku Kwafa ile Otadi Ku Etele Oshiponga? Oko Di Li Shili? (okambo)

Tala nghee omulumenhu umwe a hekelekwa eshi e lihonga oshili kombinga yaasho hashi tu ningilwa ngeenge otwa fi.

“Onda li nda kumwa komanyamukulo Ombibeli a yela notaa ti sha” (Oshungonangelo, 1 Marsa 2015)