Etumwalaka olo tu na okuudifa

“TILA KALUNGA KASHILI U DIININE OIPANGO YAYE”

NALE, fimbo eongalo lopaKriste inali totwa po, Jehova okwa li a lombwela omudiinini Abraham kutya ‘oiwana aishe kombada yedu’ otai ka nangekwa noupuna. (Gen. 22:18) Okwa li yo a nwefa mo Salomo a shange shi na sha noshiteelelwa osho ovanhu aveshe ve na okuwanifa po a ti: “Tila Kalunga [kashili, NW] u diinine oipango yaye. Osheshi omunhu keshe osho e nokuninga.” (Omuud. 12:13) Ndele mbela ongahelipi ovanhu vomoiwana aishe va li tava ka dula okulihonga kombinga yoinima oyo?

Nonande opa kala alushe ovanhu vamwe ovo vali va itavela eendjovo daKalunga, Ombibeli oya kala ya xunganeka kutya onghundana iwa otai ka udifwa mounyuni aushe i ningile oiwana aishe oundombwedi, naasho osha li tashi ka ningwa “mefiku lOmwene,” olo la hovela mo 1914. (Eh. 1:10) Shi na sha nefimbo olo, Ehololo 14:6, 7 ola xunganeka kutya etumwalaka olo la fimanenena tali wilikwa kovaengeli ola li tali ka shiivifilwa ‘omapata aeshe nomalaka aeshe noiwana aishe.’ Otava ladipikwa taku ti: “Tileni Kalunga, nye mu mu fimaneke, osheshi efimbo letokolo laye ole uya; linyongameneni ou a shita eulu nedu nefuta needjo domeva.” Kalunga okwa hala etumwalaka olo li udifwe. Otu na oufembanghenda wokukufa ombinga moilonga ya tya ngaho.

“Kalunga kashili.” Eshi Jehova a li a popya kutya, “onye Eendombwedi dange,” opa li pe na omhata i na sha nokutya Kalunga kashili elipi. (Jes. 43:10) Etumwalaka olo hatu udifa kali na sha ashike nokutya ovanhu ove na okukala ve na elongelokalunga ile va kale va itavela mukalunga. Ponhele yaasho, ova pumbwa okupewa omhito ve lihonge kutya Omushiti weulu nedu oye aeke Kalunga kashili. (Jes. 45:5, 18, 21, 22; Joh. 17:3) Kalunga oo kashili oye aeke ta dulu okuxunganeka shi na sha nonakwiiwa. Otu na oufembanghenda wokulombwela vamwe kutya okuwanifwa kweendjovo daJehova monakudiwa oku li ekanghameno la kola olo tali ulike kutya keshe osho a udaneka otashi ka wanifwa monakwiiwa. — Jos. 23:14; Jes. 55:10, 11.

Ovanhu vahapu ovo hatu udifile ohava longele oikalunga ile tave liti kutya ihava longele nande kalunga konhumba. Opo va pwilikine ngeenge hatu popi, otu na okupopya kombinga yoshinima osho navo ve na ohokwe musho. Ohatu dulu okumona ouwa moshihopaenenwa osho shi li mOilonga 17:22-31. Didilika kutya nonande omuyapostoli Paulus okwa li ta popi nelungi, okwa li a popya sha yela kutya omunhu keshe oku na okulihokolola kuKalunga oo e li Omushiti weulu nedu.

Shiivifila vamwe edina laKalunga. Ino ongaonga okushiivifila vamwe edina laKalunga kashili, Jehova. Jehova oku hole edina laye. (Ex. 15:3, OB-1954; Jes. 42:8, NW) Okwa hala ovanhu va shiive edina laye. Okwa shangififa edina laye mOmbibeli lwoikando i dulife po 7 000. Otu na oshinakuwanifwa shokukwafela ovanhu va shiive edina laye. — Deut. 4:35, NW.

Etimaumbwile lovanhu aveshe loku ka kala nomwenyo fiyo alushe ole likolelela kokushiiva Jehova nokwiifana edina laye ve na eitavelo. (Joel 2:32; Mal. 3:16; 2 Tes. 1:8) Ndele nande ongaho, ovanhu vahapu kave shii Jehova. Ovanhu ovo ova kwatela mo ovanhu vahapuvahapu ovo have liti kutya ohava longele Kalunga oo ta popiwa mOmbibeli. Nonande ove na Ombibeli nohave i lesha, otashi dulika vehe shii edina laKalunga molwaashi ka li mo momatoloko Eembibeli dihapu okunena. Ovanhu vamwe edina olo Jehova ohave li udu ashike ngeenge tava lombwelwa kovakwatelikomesho vomalongelokalunga avo kutya inave li longifa.

Ongahelipi to dulu okukwafela ovanhu va shiive edina laKalunga? Oto ka pondola oku va kwafela ngeenge owe va ulikile edina laye mOmbibeli yavo vene ngeenge omo li li. MEembibeli dimwe, edina olo ola holoka mo lwoikando omayovi, ofimbo mEembibeli dimwe edina olo oli li mEpsalme 83:18 ile muExodus 6:3-6, ile meshangelo lopedu olo la kwatakanifwa naExodus 3:14, 15 ile 6:3. Momatoloko Eembibeli dimwe, omautumbulilo ngaashi “Omwene” ile “Kalunga” oo a longifwa okupingena po edina laKalunga peemhito opo la longifwa melaka omo Ombibeli ya li ya shangwa pehovelo, okwa shangwa monghedi ye likalekelwa. Ngeenge edina laKalunga ka li mo mEembibeli donhumba dokunena, otashi dulika wa pumbwa okulongifa etoloko limwe lOmbibeli likulu opo u ulikile omunhu kutya edina olo ola kufwa mo mEembibeli dimwe. Moilongo imwe, oto dulu okuulikila ovanhu edina laKalunga momaimbilo opalongelokalunga ile komatungo onhumba oko la shangwa.

Oto dulu yo okulongifa Jeremia 10:10-13, moNew World Translation, opo u ulikile vamwe kutya Kalunga kashili elipi, nokuli nonande ohava longele oikalunga. Omushangwa oo otau popi kutya edina laKalunga olyelye notau yelifa yo kutya oye lyelye.

Ino tila okulongifa edina Jehova, u kale ashike ngeno to longifa omadinafimaneko ngaashi “Omwene” ile “Kalunga” ngaashi Oukwakriste hau ningi. Ndele osho itashi ti kutya otu na okulongifa edina laKalunga pomhito keshe hatu hovele okukundafana navamwe. Omolwonhondo, ovanhu vamwe otashi dulika va xulife po eenghundafana detu navo ngeenge otwa tumbula edina olo. Ndele ngeenge owa hovele eenghundafana novanhu, lwopokati opo ino kala wa fya ohoni okulongifa edina laKalunga.

Oshididilikwedi eshi Ombibeli ya longifa edina laKalunga oikando ihapu shi dulife eshi ya longifa omadinafimaneko aeshe kumwe ngaashi “Omwene” na “Kalunga.” Ndele nande ongaho, ovashangi vOmbibeli kava li va longifa edina laKalunga metumbulo keshe. Ove li longifa ashike opo sha pumbiwa nove shi ninga nefimaneko. Kungaho, ove tu tulila po oshihopaenenwa shiwa osho tu na okulandula.

Omunhu oo e lilwe po kedina olo. Nonande oshinima shihokwifa okukala tu shii kutya Kalunga oku na edina lolela, inashi wana ashike okukala tu mu shii kedina.

Opo tu kale tu hole Jehova nopo tu mu ifane tu na eitavelo, otwa pumbwa okushiiva kutya oKalunga a tya ngahelipi. Eshi Jehova a li a lombwela Moses edina laye pOmhunda yaSinai, okwa li a popya shihapu shihe fi ashike okweendulula edina “Jehova.” Okwa li a popya shi na sha nomaukwatya aye amwe oo a tongomana. (Ex. 34:6, 7) Jehova okwe tu tulila po oshihopaenenwa osho hatu dulu okushikula.

Kutya nee oto udifile ovo vape ile oto yandje oshipopiwa meongalo, ngeenge to popi shi na sha nomanangeko noupuna Ouhamba, popya kutya otaa holola shike kombinga yaKalunga oo e a udaneka. Ngeenge to popi shi na sha noipango yaye, divilika oushili oo kutya oipango oyo otai holola kutya Kalunga oku na ounongo nohole. Yelifa kutya oiteelelwa yaKalunga kai fi idjuu, ndele ponhele yaasho otai tu etele ouwa. (Jes. 48:17, 18; Mika 6:8) Yelifa osho oilonganghono yaJehova tai holola kombinga yomaukwatya aye, omifikamhango daye nosho yo omalalakano aye. Yelifa shi na sha nanghee Jehova ha longifa omaukwatya aye pandjele. Lombwela vamwe nghee u udite shi na sha naJehova. Ohole yoye yokuhola Jehova otai dulu oku ku kwafela u linyengife vamwe yo va kale ve hole Jehova.

Etumwalaka letu la endelela olo hatu udifa kunena ola kwatela mo okukwafela ovanhu va kale ve na etilo lokutila Kalunga. Otu na oku va kwafela va kulike etilokalunga la tya ngaho okupitila mwaasho hatu popi. Etilo olo olo etilo la yuka, okukala nonghumwe nefimaneko lomoule lokufimaneka Jehova. (Eps. 89:8) Ola kwatela mo yo okudimina kutya Jehova oku li Omutokoli munenenene nonokutya etimaumbwile letu lokukala nomwenyo fiyo alushe ole likolelela kokukala twa hokiwa kuye. (Luk. 12:5; Rom. 14:12) Onghee hano, etilokalunga la tya ngaho ola kwatela mo okukala tu hole Jehova nohole yomoule nokukala twa halelela oku mu hafifa. (Deut. 10:12, 13) Etilokalunga ohali tu linyengifa yo tu kale tu tonde osho shii, tu dulike koipango yaKalunga nosho yo oku mu longela nomutima aushe. (Deut. 5:29; 1 Omaf. 28:9; Omayel. 8:13) Ohali tu kwafele tuha kale tu na oihelele, hatu longele Kalunga ofimbo twa hokwa oinima younyuni. — 1 Joh. 2:15-17.

Edina laKalunga, “olo oshungongulu ya pama.” Ovanhu ovo va shiiva shili Jehova ove li meameno lashili. Ndele hasheshi ashike hava longifa edina laye ile molwaashi tava dulu okutumbula amwe omomaukwatya aye. Omolwaashi ve lineekela Jehova ye mwene. Omayeletumbulo 18:10 otaa popi shi na sha navo taa ti: “Edina [laJehova, NW] olo oshungongulu ya pama. Omuyuki ta hondama mo ndee ta amenwa.”

Longifa nawa omhito keshe oyo u na opo u ladipike vamwe va kale ve lineekela Jehova. (Eps. 37:3; Omayel. 3:5, 6) Okukala nelineekelo la tya ngaho otaku ulike kutya otu na eitavelo muJehova nosho yo momaudaneko aye. (Heb. 11:6) Eendjovo daKalunga otadi tu shilipaleke kutya ovo tava “ifana edina” laye molwaashi ve shii kutya oye Omupangeli weshito alishe, ve hole eemhango daye nova itavela filufilu kutya oye aeke Odjo yexupifo, otava ka xupifwa. (Rom. 10:13, 14) Eshi to hongo vamwe, va kwafela va kale ve na eitavelo la tya ngaho meembinga adishe dokukalamwenyo.

Ovanhu vahapu kunena ove na omaupyakadi oo e va wilila po pauhandimwe. Ihava kala ve wete kutya oshike ve na okuninga po. Va ladipika ve lihonge kutya ehalo laKalunga olilipi, ve lineekele muye nova tule moilonga osho tave lihongo. (Eps. 25:5) Va ladipika va pule ekwafo kuKalunga va mana mo noku mu pandula omolwoku va nangeka noupuna. (Fil. 4:6, 7) Eshi tava ende tava shiiva Jehova okupitila mokulesha eendjovo donhumba mOmbibeli nomokukala ve wete nghee ta wanifa po osho e va udanekela, otava ka mona eameno olo hali di mokuuda ko filufilu kutya edina laJehova otali ti shike. — Eps. 34:9; Jer. 17:7, 8.

Longifa nawa omhito keshe u kwafele ovanhu va mone kutya oshi li pandunge okutila Kalunga kashili, Jehova, nosho yo okudiinina oipango yaye.

‘EHEPAULULO LI NA SHA NAJESUS’

KONIMA eshi Jesus Kristus a nyumunwa, ofimbo ina ya meulu, okwa li a lombwela ovahongwa vaye a ti: ‘Otamu ka ninga eendombwedi dange fiyo okominghulo dounyuni.’ (Oil. 1:8) Ovapiya vaKalunga ovadiinini vokunena ova popiwa kutya ‘ove na ehepaululo li na sha naJesus.’ (Eh. 12:17) Mbela oho yandje oundombwedi nouladi shi fike peni?

Ovanhu vahapu ovo hava ti kutya ova itavela muJesus kave shii sha shi na sha nokukala po kwaye meulu fimbo ine uya kombada yedu. Kave shii ngeenge okwa li omunhu oo a li shili kombada yedu. Kave shii kutya omolwashike taku tiwa kutya Jesus Omona waKalunga. Kave shii shihapu shi na sha nonghandangala oyo ta dana mokuwanifwa kwelalakano laKalunga. Kave shii kutya ota ningi shike paife nokave shii kutya osho ta ka ninga monakwiiwa otashi ka kuma ngahelipi onghalamwenyo yavo. Vamwe ohava diladila nokuli kutya Eendombwedi daJehova inadi itavela muJesus. Oshi li oufembanghenda kufye oku va shiivifila oshili moinima aishe oyo.

Ovanhu vamwe ova itavela kutya Jesus oo a hokololwa mOmbibeli ka li ko shili. Vamwe ohava tale ko Jesus e li ashike omunhu munene. Vamwe inava itavela kutya Omona waKalunga. ‘Okuhepaululila ovanhu va tya ngaho oshili i na sha naJesus’ otaku pula eenghendabala, elidiiniko nosho yo okukala nelungi.

Kashi na nee mbudi kutya ovapwilikini voye ove na etaleko la tya ngahelipi, ova pumbwa okukala neshiivo li na sha naJesus ngeenge ova hala oku ka mona omwenyo waalushe. (Joh. 17:3) Kalunga okwa ulika sha yela kutya okwa hala ovanhu aveshe ‘va hepaulule kutya Jesus Kristus Oye Omwene’ nova dulike keenghonopangelo daye. (Fil. 2:9-11) Onghee hano, katu na okuhenuka okuudifila ovanhu ovo va kanyatela omadiladilo a puka ile ve na filufilu ondudi, molwaashi ashike twa tila okukala hatu tomhafana navo. Nonande peemhito dimwe ohatu dulu okupopya kombinga yaJesus Kristus twa manguluka, nokuli nonande opo hatu talele po omunhu wonhumba oshikando shotete, peemhito opo itashi wapalele, otashi dulika twa pumbwa okupopya nelungi opo tu kwafele ovapwilikini va kale tava diladila monghedi ya yuka shi na sha naye. Otashi dulika yo twa pumbwa okudiladila keenghedi omo hatu ka ninga etwalemo li na sha neembinga dimwe doshikundafanwa osho, odo hatu ke uya okukundafana pomhito imwe i lili. Ndelenee otashi dulika ito dulu okukundafana oinima aishe oyo ya kwatelwa mo fiyo osheshi wa hovela ekonakonombibeli nomunhu. — 1 Tim. 2:3-7.

Onghandangala ya fimanenena oyo Jesus ta dana mokuwanifwa kwelalakano laKalunga. Otwa pumbwa okukwafela ovanhu va ude ko kutya molwaashi Jesus oye “ondjila” ‘nonokutya kape na ou te uya kuXe, ngeenge hamuye ta pitile,’ osha yela kutya kape na oo ta dulu okukala nekwatafano liwa naKalunga ngeenge ina itavela muJesus Kristus. (Joh. 14:6) Omunhu ota dulu ashike okuuda ko Ombibeli, ngeenge oku shii onghandangala ya fimanenena oyo Omona waJehova woshiveli ta dana. Omolwashike mbela? Omolwaashi Jehova okwa hoolola Omona waye a kale ta dana onghandangala ya fimanenena mokuwanifwa kwomalalakano aYe aeshe. (Kol. 1:17-20) Omaxunganeko Ombibeli okwa yukifa elitulemo konghandangala oyo Jesus ta dana. (Eh. 19:10) Omaupyakadi aeshe oo a etifwa kounashibofa waSatana nokenyono laAdam otaa ka kandulwa po okupitila muJesus Kristus. — Heb. 2:5-9, 14, 15.

Opo omunhu a ude ko onghandangala oyo Kristus ta dana, oku na okudimina kutya ovanhu ove li monghalo ietifa onghenda omo itava dulu okudja mo kuvo vene. Atusheni otwa dalwa moulunde. Osho otashi dulika hashi tu kumu meenghedi di lili noku lili mokukalamwenyo kwetu, naasho otashi dulu oku tu twala mefyo paife ile monakwiiwa. (Rom. 3:23; 5:12) Tomhafana shi na sha noushili oo naavo to udifile. Opo nee yelifa kutya okupitila mekuliloyambo laJesus Kristus, Jehova okwe shi ninga tashi shiiva omolwohole yaYe opo ovo ve na eitavelo tali longo mekuliloyambo va mangululwe mo moulunde nefyo. (Mark. 10:45; Heb. 2:9) Osho oshe va yeululila omhito va dule oku ka hafela omwenyo waalushe va wanenena. (Joh. 3:16, 36) Oyo oyo aike onghedi omo hatu dulu okukala nomwenyo waalushe. (Oil. 4:12) U li omuhongi, kutya nee oto popi noohandimwe ile oneongalo, ino kala ashike wa wanenwa kokuyandja omauyelele a tya ngaho. Ndelenee va kwafela pahole nosho yo nelidiiniko va kale ve na olupandu li na sha nonghandangala oyo Kristus ta dana e li Omukulili. Olupandu la tya ngaho otali dulu okulinyengifa ovanhu va lundulule oikala yavo, elihumbato lavo nosho yo omalalakano avo monghalamwenyo. — 2 Kor. 5:14, 15.

Jesus okwa yamba po omwenyo waye lumwe aluke. (Heb. 9:28) Ashike paife ota longo noudiinini e li Omupristeri Omukulunhu. Kwafela vamwe va ude ko kutya osho osha hala okutya shike. Mbela ove li meenghalo dinyikifa oluhodi, ope na oinima oyo tai va nyemateke, otava mono oixuna ile ove na omaupyakadi omolwovanhu vehe na olukeno ovo ve va dingilila? Eshi Jesus a li kombada yedu, okwa li a pita meenghalo adishe odo. Oku shii kutya ohatu kala tu udite ngahelipi ngeenge tu li meenghalo da tya ngaho. Mbela otu wete twa pumbwa okufilwa onghenda kuKalunga omolwokuhawanenena kwetu? Ngeenge otwa ilikana kuKalunga e tu diminine po pakanghameno lekuliloyambo laJesus, Jesus oha kala ‘omupopili puTate.’ Ohe tu “ilikanene” omolwoukwao wananghali oo ha kala e tu uditile. (1 Joh. 2:1, 2; Rom. 8:34) Pakanghameno lekuliloyambo laJesus nosho yo okupitila moilonga yaye e li Omupristeri Omukulunhu, ohatu dulu okuya “kolukalwa lefilonghenda” tu pewe ekwafo pefimbo la wapala. (Heb. 4:15, 16) Nonande inatu wanenena, ekwafo olo Jesus te tu pe e li Omupristeri Omukulunhu ohali tu kwafela tu longele Kalunga tu na eliudo la koshoka. — Heb. 9:13, 14.

Kakele kaasho, okwa pewa eenghonopangelo dinene eshi a nangekwa po kuKalunga e li Omutwe weongalo lopaKriste. (Mat. 28:18; Ef. 1:22, 23) E li omutwe weongalo, oha wilike eongalo lopaKriste metwokumwe nehalo laKalunga. Ngeenge to hongo vamwe, va kwafela va shiive kutya Jesus Kristus oye Omutwe weongalo, ndele hamunhu umwe e lili. (Mat. 23:10) Okudja eshi wa shakena oshikando shotete nomunhu oo e na ohokwe, mu shiva e uye kokwoongala kweongalo olo li li moshitukulwa sheni, oko hatu konakona Ombibeli hatu longifa oishangomwa oyo ya nyanyangidwa ‘komupiya omudiinini nomunaendunge.’ Mu yelifila kutya “omupiya” olyelye nosho yo Omwene, opo a kale e shii kutya Jesus oku li omutwe weongalo. (Mat. 24:45-47) Mu yelifila kutya ovo hava nangekwa po ve li ovakulunhuongalo ove na tete okuwanifa po oiteelelwa ilipi yopamishangwa. (1 Tim. 3:1-7; Tit. 1:5-9) Mu yelifila kutya eongalo kali fi lovakulunhuongalo, ndele vo ove lile po ashike oku tu kwafela tu shikule oshikoti shaJesus Kristus. (Oil. 20:28; Ef. 4:16; 1 Pet. 5:2, 3) Kwafela ovo ve na ohokwe va mone kutya ope na ehangano lomounyuni aushe la unganekwa, olo hali longo koshi youkwamutwe waKristus.

Omahokololo Omavangeli otaa popi kutya eshi Jesus a li a ya muJerusalem okafimbo kanini ofimbo ina fya, ovahongwa vaye ova li ve mu tanga tava ingida tava ti ye ‘Ohamba oyo tai uya medina laJehova.’ (Luk. 19:38, yelekanifa NW.) Eshi ovanhu tava konakona Ombibeli moule, ohave lihongo kutya Jehova okwa pa Jesus eenghonopangelo odo da kuma ovanhu vomoiwana aishe. (Dan. 7:13, 14) Ngeenge to yandje oipopiwa meongalo ile to konakona Ombibeli navamwe, kwafela ovanhu va ude ko nova kale ve na olupandu li na sha nouwa oo hatu mono mokupangela kwaJesus.

Divilika kutya onghedi yetu yokukalamwenyo oyo hai ulike kutya otwa itavela shili kutya Jesus Kristus oku li Ohamba nonokutya otwa hala okudulika nehalo liwa keenghonopangelo daye. Popya kutya oilonga ilipi Jesus a pa ovashikuli vaye konima eshi a vaekwa a ninga Ohamba. (Mat. 24:14; 28:18-20) Kundafaneni osho Jesus, Omupukululi Omukumwifi, a ti shi na sha naasho tu na okupitifa komesho monghalamwenyo. (Jes. 9:5, 6; Mat. 6:19-34) Popya yo kutya Ohamba yOmbili oya ti ovashikuli vayo otava ka kala ve na omaukwatya a tya ngahelipi. (Mat. 20:25-27; Joh. 13:35) Lungama uha tokole vamwe kutya itava ningi ngaashi tava dulu. Ponhele yaasho, va ladipika va konakone kutya eenghatu odo hava katuka otadi holola shike shi na sha nokudulika kwavo kouhamba waKristus. Eshi to va ladipike va ninge ngaho, kala yo u shii kutya naave ou na okuninga sha faafana.

Kristus e li ekanghameno. Ombibeli oya faafanifa oilonga yokuninga ovanhu ovahongwa nokutungila kuJesus Kristus e li ekanghameno. (1 Kor. 3:10-15) Opo u pondole, kwafela ovanhu va shiive Jesus ngaashi a hokololwa mOmbibeli. Lungama uhe va ningife va diladile kutya oove ve na okushikula. (1 Kor. 3:4-7) Va kwafela va yandje elitulemo kuJesus Kristus.

Ngeenge ekanghameno ola dikwa po nawa, ovakonakonimbibeli otava ka uda ko kutya Kristus okwe tu fiila oshihopaenenwa tu “shikule oshikoti shaye.” (1 Pet. 2:21) Opo va ninge ngaho, va ladipika va leshe Omavangeli nokutula moilonga osho tave lihongo mo, ndele haku a tala ko ashike e li omahokololo e li paushili. Va kwafela va kaleke momadiladilo oikala nosho yo omaukwatya oo Jesus a li e na. Va ladipika va yandje elitulemo kunghee Jesus a li e uditile Xe, nghee a li e lididimikila omayeleko, nghee a li a ulika kutya oha dulika kuKalunga nosho yo nghee a li a ungaunga novanhu ovo va li meenghalo di lili noku lili. Divilika oilonga oyo Jesus a li a longa monghalamwenyo yaye. Ngeenge omukonakonimbibeli oku na okuninga omatokolo onhumba ile a taalela omayeleko onhumba, oku na okulipula kutya: ‘Ngeno Jesus okwa ninga po shike, ngeno oye a li monghalo ya tya ngaho? Onghedi yange yokukalamwenyo otai ulike ngoo kutya ondi na olupandu li na sha naasho a ningila nge?’

Ngeenge oto yandje oshipopiwa meongalo, ino diladila kutya molwaashi ovamwatate ova itavela muJesus, inava pumbwa oku mu shiiva nawanawa. Osho to popi otashi ka tya shihapu ngeenge owe va kwafele va tungile keitavelo olo. Ngeenge to popi kombinga yokwoongala, ku kwatakanifa nonghandangala oyo Jesus ta dana e li Omutwe weongalo. Ngeenge oto popi shi na sha noukalele womomapya, yandja elitulemo koikala oyo Jesus a li a ulika eshi a li ta wanifa po oukalele waye, nokupopya kombinga youkalele to yelifa kutya Kristus e li Ohamba ota ongele ovanhu va ka xupifwe nova ye mounyuni mupe.

Osha yela kutya otwa pumbwa okuninga shihapu shihe fi ashike okulihonga shi na sha neeshili dopehovelo di na sha naKristus. Opo ovanhu va ninge Ovakriste vashili, ove na okukala ve na eitavelo tali longo muKristus nokukala ve mu hole shili. Ohole ya tya ngaho otai ke ve linyengifa va kale hava dulika. (Joh. 14:15, 21) Ohai kwafele yo ovanhu va kale va kanyatela eitavelo lavo nonande ove li momaudjuu, va twikile okushikula oshikoti shaKristus mokukalamwenyo kwavo akushe, va ulike kutya ove li Ovakriste va pyokoka ovo va ‘twamifwa nova dikwa kekanghameno.’ (Ef. 3:17, yelekanifa NW.) Onghedi yokukalamwenyo ya tya ngaho otai ka fimanekifa Jehova, Kalunga naXe yaJesus Kristus.

“ONGHUNDANA EI IWA YOUHAMBA”

ESHI Jesus a li ta yandje ouyelele u na sha nedidiliko lokukala po kwaye nosho yo shi na sha nefimbo lexulilo longhalelo ei yoinima, okwa li a xunganeka a ti: “Evangeli eli louhamba [ile “onghundana ei iwa youhamba,” NW] otali udifilwa ounyuni aushe li ningile oiwana aishe ondombwedi, opo nee taku uya exulilo.” — Mat. 24:14.

Etumwalaka olo li na okuudifwa mounyuni aushe olilipi? Etumwalaka olo oli na sha nOuhamba oo Jesus e tu honga tu ilikane kuKalunga hatu ti: “Ouhamba woye nau uye.” (Mat. 6:10) Ehololo 11:15 otali u hokolola u li ‘Ouhamba wOmwene wetu [Jehova] naKristus waye,’ molwaashi Jehova oye e na eenghonopangelo adishe nokwa hoolola Kristus oye a ninge Ohamba. Ndele didilika kutya Jesus okwa li a xunganeka kutya etumwalaka olo la li tali ka udifwa pefimbo letu ola li tali ka kwatela mo shihapu shihe fi ashike osho sha li tashi udifwa kovahongwa vaye vomefelemudo lotete. Ovahongwa ovo ova li va lombwela ovanhu tava ti: “Ouhamba waKalunga wa ehena popepi nanye.” (Luk. 10:9) Jesus, oo a li a vaekwa a ninge Ohamba, okwa li mokati kavo. Ndele ngaashi sha shangwa muMateus 24:14, Jesus okwa li a xunganeka kutya oilonga yokuudifa yomounyuni aushe oya li tai ka kwatela mo okushiivifa oshiningwanima shimwe sha fimana mokuwanifwa kwelalakano laKalunga.

Omuprofeti Daniel okwa li a mona emoniko la kwatela mo oshiningwanima osho. Okwa li a mona ‘umwe a fa Omona womunhu,’ Jesus Kristus, ta pewa “kOmuxungu,” Jehova Kalunga, “eenghono nefimano noshilongo. Noiwana aishe omaludi nomalaka tae mu longele.” (Dan. 7:13, 14) Oshiningwanima sha tya ngaho shididilikwedi meshito alishe osha li sha ningwa meulu mo 1914. Okudja opo, Ondiaboli neendemoni dayo ova li va tewa mo meulu va umbilwa kombada yedu. (Eh. 12:7-10) Onghee hano, omafiku axuuninwa onghalelo ei yoinima ikulu okwa hovela momudo oo. Ndele fimbo onghalelo ei yoinima inai hanaunwa po, otaku udifwa etumwalaka mounyuni aushe kutya Ohamba yopaMessias oyo ya nangekwa po kuJehova otai pangele nale okudja kolukalwapangelo layo lomeulu. Omolwoilonga oyo yokuudifa, ovanhu keshe pamwe otava shiivifilwa etumwalaka olo. Onghedi omo tave linyenge ketumwalaka olo otai ulike kutya ova tala ko ngahelipi Kalunga Omukombadambada oo e li Omupangeli ‘wovanhu.’ — Dan. 4:32.

Ope na shihapu osho Ouhamba oo tau ka ninga, nomolwaasho hatu ilikana natango kutya “ouhamba woye nau uye,” ndele hakutya kutya otwa teelela Ouhamba waKalunga u ka dikwe po monakwiiwa. Ponhele yaasho, ohatu ilikana ngaho opo Ouhamba oo womeulu u katuke eenghatu u wanife po omaxunganeko ngaashi oo e li muDaniel 2:44 nosho yo Ehololo 21:2-4. Ouhamba oo otau ka ninga edu oparadisa omo tamu ka kala ovanhu ovo ve hole Kalunga nove hole vakwao. Eshi hatu udifa “onghundana ei iwa youhamba,” ohatu popi kombinga yonakwiiwa ya tya ngaho. Ndele ohatu lombwele yo vamwe nomukumo kutya Jehova okwa pa nale Omona waye eenghonopangelo pauyadi. Mbela oho divilike ngoo onghundana ei iwa ngeenge to udifa shi na sha nOuhamba?

Nghee to dulu okuyelifa kutya Ouhamba oshike. Ongahelipi hatu dulu okuwanifa po oshilonga shetu shokuudifa Ouhamba waKalunga? Ohatu dulu okupendula ohokwe yovanhu mokuhovela eenghundafana kombinga yoikundafanwa i lili noku lili, ndele oshi na yo okukala shi liwetikile kutya etumwalaka letu oli na sha nOuhamba waKalunga.

Oshinakuwanifwa shetu shokuudifa osha kwatela mo okulesha nokutofa omishangwa odo tadi popi shi na sha nOuhamba. Ngeenge to popi shi na sha nOuhamba, shilipaleka kutya ovo to popi navo ove shii kutya Ouhamba waKalunga oshike. Otashi dulika wa pumbwa okupopya shihapu shihe fi ashike okutya Ouhamba waKalunga epangelo. Kovanhu vamwe otashi dulika shi kale shidjuu okudiladila kutya Ouhamba oo uhe wetike ou li epangelo. Oto dulu okutomhafana navo meenghedi di lili noku lili. Pashihopaenenwa, ihatu dulu okumona eenghono dedu, ashike otu wete nghee hadi longo mokukalamwenyo kwetu. Ihatu dulu okumona oo a shita eenghono dedu, ndele oshi liwetikile kutya oku na eenghono dinene. Ombibeli otai popi shi na sha naye kutya oye “Ohamba yaalushe.” (1 Tim. 1:17, OB-1986) Ile oto dulu okuyandja oshihopaenenwa kutya moshilongo sha kula, ovanhu vahapu inava enda nande onale moshilandopangelo ile inava mona omupangeli wavo. Ohava udu ashike kombinga yoinima oyo ya pamba epangelo okupitila meenghundana. Sha faafana, Ombibeli, oyo ya nyanyangidwa momalaka e dule 2 200, otai tu lombwele kombinga yOuhamba waKalunga; otai tu lombwele yo kutya olyelye e li Ohamba yao nonokutya Ouhamba oo otau ningi shike. Oshungonangelo, oyo hai nyanyangidwa momalaka mahapu i dulife oifo ikwao, oya nuninwa ‘okushiivifa Ouhamba waJehova,’ ngaashi sha tumbulwa kombada yayo.

Opo ovanhu va ude ko kutya Ouhamba oshike, oto dulu okupopya kombinga yoinima yonhumba oyo va hala omapangelo avo e va ningile, ngaashi okukaleka po ouxupilo muwa nombili, okuxulifa po ekaulonyanga nonhondo, okuyandja ehongo nosho yo ekwafo lopaunamiti. Va yelifila kutya Ouhamba waKalunga oo ashike tau dulu okuwanifa po pauyadi omahalo ovanhu a yuka a tya ngaho nosho yo makwao. — Eps. 145:16.

Ladipika ovanhu va kale va hala okukala ovapangelwa vOuhamba oo u li meke laJesus Kristus e li Ohamba. Popya shi na sha noikumwifilonga oyo a li a longa oyo ya li tai ulike osho ta ka ninga e li Ohamba yomeulu. Kala ho popi shi na sha nomaukwatya makumwifi oo Jesus a li ha ulike. (Mat. 8:2, 3; 11:28-30) Yelifa yo kutya okwa yamba po omwenyo waye omolwetu nonokutya Kalunga okwe mu nyumunina omwenyo womeulu e na oukwatya wokuhafya. Paife ota pangele okudja meulu e li Ohamba. — Oil. 2:29-35.

Divilika kutya Ouhamba waKalunga otau pangele paife okudja meulu. Ashike kaleka momadiladilo kutya ovanhu vahapu kave wete eenghalo odo va teelela ngeno di kale po eshi Ouhamba waKalunga tau pangele. U na oshinima osho momadiladilo, va pula ngeenge ove shii kutya Jesus Kristus okwa ti kutya oshike sha li tashi ka didilikifa okupangela kwOuhamba oo. Tumbula oinima imwe oyo i li oshitukulwa shedidiliko, olo la kwatela mo oiningwanima i lili noku lili, oyo i li muMateus etukulwa 24, Markus etukulwa 13 ile Lukas etukulwa 21. Opo nee to va pula kutya omolwashike okunangekwa po kwaKristus meulu kwa etifa po eenghalo da tya ngaho kombada yedu. Va ulikila osho sha popiwa mEhololo 12:7-10, 12.

Opo u yandje oshihopaenenwa shi na sha naasho Ouhamba waKalunga tau ningi, lesha Mateus 24:14, ndele to hokolola kombinga yehongo lopaMbibeli olo tali hongwa mounyuni aushe paife. (Jes. 54:13) Lombwela ovanhu kombinga yeefikola doshali di lili noku lili omo Eendombwedi daJehova hadi mono ouwa, odo adishe da kanghamena kOmbibeli. Yelifa yo kutya kakele kokuya eumbo neumbo moukalele, ohatu konakona Ombibeli novanhu pauhandimwe ile nomaukwaneumbo oshali moilongo i dulife po 230. Mbela epangelo lopanhu lilipi tali dulu okuhonga ovanhu mounyuni aushe monghedi ya tya ngaho, ovapangelwa valo nosho yo ovanhu vamwe ve lili? Shiva ovanhu ve uye kOlupale lOuhamba, nove uye koyoongalele yEendombwedi daJehova, opo va mone nghee ehongo la tya ngaho hali nwefa mo okukalamwenyo kwovanhu. — Jes. 2:2-4; 32:1, 17; Joh. 13:35.

Mbela omuneumbo ota ka mona ngoo nghee onghalamwenyo yaye ya kumwa kOuhamba? Oto dulu okupopya nelungi kutya owe mu talela po molwaashi wa hala okukundafana naye kombinga yomhito oyo ya yeulukila ovanhu va hoolole omwenyo ve li ovapangelwa vOuhamba waKalunga. Ngahelipi mbela? Omokulihonga kutya Kalunga ota pula shike kufye nokukala metwokumwe noiteelelwa yaye. — Deut. 30:19, 20; Eh. 22:17.

Kwafela vamwe va pitife komesho Ouhamba. Ope na omatokolo oo omunhu e na okuninga nokuli nonande okwa tambula ko etumwalaka lOmbibeli. Mbela ota ka pitifa ngoo komesho Ouhamba waKalunga mokukalamwenyo kwaye? Jesus okwa ladipika ovahongwa vaye va ‘konge tete ouhamba.’ (Mat. 6:33) Ongahelipi hatu dulu okukwafela Ovakriste vakwetu va ninge ngaho? Omoku va tulila po oshihopaenenwa nokukundafana navo omaifano oo tava dulu okulalakanena, oo taa ulike kutya ova pitifa Ouhamba komesho. Omafimbo amwe oto dulu yo oku va pula ngeenge ova diladila shi na sha noinima yonhumba oyo tava dulu okuninga noto dulu yo okuhokolola oimoniwa yavamwe opo u ulike osho vamwe tava ningi opo va pitife komesho Ouhamba. Oto dulu yo okukundafana navo omahokololo omOmbibeli monghedi oyo tai va kwafele va kale ve na ohole yomoule yokuhola Jehova. Noto dulu yo oku shi ninga mokudivilika omaumbangi oo taa ulike kutya Ouhamba oo owa dikwa po shili. Oto dulu okudivilika kutya oilonga yokuudifa Ouhamba oya fimana shi fike peni. Ndele luhapu ouwa muhapu ohau di mokulinyengifa vamwe va katuke eenghatu ndele haku va lombwela odikilila oinima oyo ve na okuninga.

Nopehe na omalimbililo, etumwalaka la fimanenena olo tu na okuudifa oli na sha unene naJehova Kalunga, Jesus Kristus nosho yo Ouhamba. Otu na okudivilika eeshili da fimanenena di na sha navo nosho yo nOuhamba moilonga yetu yokuudifa, meongalo nosho yo mokukalamwenyo kwetu. Mokuninga ngaho ohatu ulike shili kutya ohatu mono ouwa mOfikola yOukalele woPauteokratika.