Etukulwa lotete

Okulongela Kalunga moukumwe mefimbo letu otaku ti shike?

1, 2. (a) Exumokomesho lihafifa lilipi tali ningwa mefimbo letu? (b) Eteelelo likumwifi lilipi ovanhu ovo ve na omitima da yuka ve na?

OPE na exumokomesho lihafifa li na sha nokulongela Kalunga moukumwe kongonga yedu. Omamiliyona ovanhu ovo va dja moiwana aishe, momihoko adishe nosho yo momalaka aeshe otaa hanganifwa. Omudo keshe ope na ovanhu vahapu ovo tava ongelwa. Ovanhu ovo otava hokololwa mOmbibeli ve li “eendombwedi” daJehova notava ifanwa “ongudu inene.” Otava ‘longele Kalunga omutenya noufiku.’ (Jesaja 43:10-12; Ehololo 7:9-15, yelekanifa NW.) Omolwashike mbela tava ningi ngaho? Omolwaashi ova shiiva Jehova e li Kalunga aeke kashili. Osho ohashi ve linyengifa va ninge okukalamwenyo kwavo ku kale metwokumwe neendjila daye diyuki. Natango, ove lihonga kutya otu li ‘momafiku axuuninwa’ ounyuni ou wopaife woukolokoshi nonokutya Kalunga ote ke u hanauna po mafiku ndele te u pingene po nounyuni mupe woparadisa.—2 Timoteus 3:1-5, 13; 2 Petrus 3:10-13.

² Eendjovo daKalunga otadi udaneke tadi ti: “Ngenge pa pita okafimbo kaningholi, omuhenakalunga ita kala po vali . . . Ndelenee ovananheni vo otava ka fyuulula edu, ndee tava ka hafela ombili inene.” (Epsalme 37:10, 11) “Ovayuki, vo otava ka fyuulula [edu, OB-1986], ndee tava kala mo alushe.” (Epsalme 37:29) “[Kalunga] ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.”—Ehololo 21:4.

3. Okulongela Kalunga moukumwe washili otaku holoka po ngahelipi?

³ Ovo tava hanganifwa paife melongelokalunga lashili otava ningi ovakalimo votete vomounyuni mupe oo. Ove lihonga kutya ehalo laKalunga olilipi notave li wanifa po ngaashi tava dulu. Okuulika kutya osha fimana, Jesus okwa ti: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” (Johannes 17:3) Omuyapostoli Johannes okwa shanga a ti: “Ounyuni otau xulu po pamwe nokahalu [kao]; ndelenee ou ta longo ehalo laKalunga, oye ta kala alushe.”—1 Johannes 2:17.

Osho taku ti lelalela

4. (a) Okwoongelwa kwovanhu vahapu va longele Kalunga moukumwe mefimbo letu okwa hala okutya shike lelalela? (b) Ombibeli otai hokolola ngahelipi eongelo olo?

⁴ Okwoongelwa kwovanhu vahapu va longele Kalunga moukumwe mefimbo letu okwa hala okutya shike lelalela? Oku li oumbangi wa yela kutya otu li popepi filufilu nexulilo lounyuni ou woukolokoshi, nounyuni mupe waKalunga otau ka tameka konima ashike yaasho. Otu li ovamoninomesho vomawanifo omaxunganeko Ombibeli oo a xunganeka eongelo olo linene. Exunganeko limwe lomuo otali ti: “Pexulilo lomafiku [omafiku aa axuuninwa] omhunda yotembeli yOmwene [elongelokalunga laye lashili la yeluka] otai ka kala ya pamenena koxulo yeemhunda [pombada yelongelokalunga loludi keshe], . . . Ndele oko taku ka tondokela oiwana. Ndele oiwana ihapu otai ka ya ndee tai ti: Ileni, fye tu londeni komhunda yOmwene nokotembeli yaKalunga kaJakob, opo Ye e tu longe omalila aye, fye tu ende neendjila daye.”—Mika 4:1, 2; Epsalme 37:34.

5, 6. (a) Ongahelipi shi li paushili kutya oiwana otai uya kuJehova? (b) Omapulo elipi tu na okulipula?

⁵ Nonande haiwana pauyadi tai uya keumbo laJehova lopamhepo omolwelongelokalunga, oohandimwe omamiliyona okudja moiwana aishe osho tava ningi. Eshi tave lihongo kombinga yomalalakano opahole nosho yo omaukwatya mawa aJehova Kalunga, omitima davo otadi linyengifwa unene. Otava lalakanene nelininipiko okushiiva kutya Kalunga ota pula shike kuvo. Omailikano avo okwa fa oo omupsalme oo a ti: “Longe nge, ndi ninge eshi we shi hokwa, osheshi Oove Kalunga kange.”—Epsalme 143:10.

⁶ Mbela ou liwete ove mwene mokati kongudu inene yovanhu ovo Jehova ta hanganifa paife moukumwe woku mu longela? Mbela elinyengo loye kehongo olo wa mona okudja mEendjovo daye otali ulike ngoo kutya ou udite ko shili kutya Jehova oye Odjo yalo? Ofiyo oponghatu ilipi to kala ‘nokweenda neendjila daye’?

Nghee oukumwe tau holoka po

7. (a) Xuuninwa oolyelye tava ka longela Kalunga moukumwe? (b) Omolwashike shi li sha endelela okuninga omulongeli waJehova paife, nongahelipi hatu dulu okukwafela vamwe ve shi ninge?

⁷ Jehova okwa lalakanena oishitwa aishe inaendunge i kale ya hangana melongelokalunga lashili. Inatu djuulukwa tuu efiku olo eshi aveshe ovo ve na omwenyo tava ka longela Kalunga aeke kashili! (Epsalme 103:19-22) Ndelenee fimbo osho inashi ningwa, Jehova oku na okuhanauna po aveshe ovo tava anye okulonga ehalo laye liyuki. Pafilonghenda laye, ota yandje omalombwelo komesho yefimbo shi na sha naasho ta ka ninga, opo ovanhu keshe pamwe va dule okumona omhito yokulundulula eenghedi davo. (Jesaja 55:6, 7) Onghee hano, mefimbo letu ‘ovapaani aveshe nomapata aeshe nomalaka aeshe noiwana aishe’ otai shiivifilwa elombwelo eli la endelela tali ti: “Tileni Kalunga, nye mu mu fimaneke, osheshi efimbo letokolo laye ole uya; linyongameneni ou a shita eulu nedu nefuta needjo domeva.” (Ehololo 14:6, 7) Mbela owa tambula ko elombwelo olo? Ngeenge osho, oshi li oufembanghenda woye okulombwela natango vamwe opo va shiive Kalunga kashili nove mu longele.

8. Konima eshi twe lihonga omahongo Ombibeli opehovelo, exumokomesho natango lilipi tu na okulalakanena twa mana mo?

⁸ Kashi fi elalakano laJehova okulongelwa kovanhu ovo hava ti kutya ove mu itavela ndele otava twikile nokulalakanena oinima yavo yopaumwene. Kalunga okwa hala ovanhu va ‘shiive ehalo laye’ noku li wanifa po mokukalamwenyo kwavo. (Ovakolossi 1:9, 10) Kungaha, ovanhu ovo ve na olupandu, ovo ve lihonga omahongo Ombibeli opehovelo ova hala okulalakanena oukulunhu wopaKriste. Ova hala okushiiva Jehova nawanawa, okuweda ko keudeko lavo lEendjovo daye li kale lomoule nosho yo oku di tula moilonga pauyadi mokukalamwenyo kwavo. Ova hala okuhopaenena omaukwatya aTate yetu womeulu nokutala ko oinima ngaashi ye he i tale ko. Osho ohashi ve linyengifa va konge eenghedi omo tava dulu okukufa ombinga moilonga oyo tai xupifa eemwenyo oyo a unganeka i longwe kombada yedu mefimbo letu. Mbela naave owa hala okuninga yo ngaho?—Markus 13:10; Ovaheberi 5:12–6:3.

9. Omeenghedi dilipi oukumwe washili tau shiiva kunena?

⁹ Ombibeli otai ulike kutya ovo tava longele Jehova ove na okukala oshiwana sha hangana. (Ovaefeso 4:1-3) Oukumwe oo ou na okukala po kunena nonande otu li mounyuni wa tukauka nohatu kondjo natango nokuhawanenena kwetu. Jesus okwa ilikana a mana mo opo ovahongwa vaye aveshe va kale umwe, tava hafele oukumwe washili. Osho okwa li tashi ka tya shike? Shotete, okwa li tava ka kala ve na ekwatafano liwa naJehova nosho yo nOmona waye. Oshitivali, okwa li tava ka kala va hangana navakwao. (Johannes 17:20, 21) Opo shi ningwe, eongalo lopaKriste otali longo li li ehangano olo okupitila mulo Jehova ta hongo oshiwana shaye.

Oinima ilipi tai etifa oukumwe?

10. (a) Oshike osho hatu kulike ngeenge ohatu longifa Ombibeli paumwene okukonga omanyamukulo omapulo oo e tu kuma? (b) Konakona oinima oyo tai etifa oukumwe wopaKriste mokunyamukula omapulo oo e li mokatendo aka.

¹⁰ Oinima iheyali oyo tai etifa okulongela Kalunga moukumwe oya tumbulwa pedu. Eshi to nyamukula omapulo oo a kwatakanifwa nayo, lipula nghee oshitwa keshe sha kuma ekwatafano loye naJehova nosho yo nOvakriste vakweni. Okudiladila koitwa oyo nokutala omishangwa odo da yandjwa ndele inadi tofwa mo otashi ke ku kwafela u kulike ounongo woye wopakalunga, oukeka woye wokudiladila nosho yo eendunge doye dokuyoolola—omaukwatya oo twa pumbwa atusheni. (Omayeletumbulo 5:1, 2; Ovafilippi 1:9-11) Tala koinima oyo kooshimwe.

(1) Otwa dimina oufemba waJehova wokutula po omufikamhango waashi shiwa naashi shii. “Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.”—Omayeletumbulo 3:5, 6.

Omolwashike tu na okukonga omayele newiliko kuJehova ngeenge hatu ningi omatokolo? (Epsalme 146:3-5; Jesaja 48:17)

(2) Otu na Eendjovo daKalunga odo tadi tu wilike. “Ondjovo yaKalunga mwe i uda kufye, mwe i tambula hangaashi ondjovo yovanhu, ndelenee ongaashi i li shili ondjovo yaKalunga, ei tai longo yo munye ava mwa itavela.”—1 Ovatessaloniki 2:13.

Oshiponga shilipi shi li po ngeenge ohatu ningi ashike osho tu “udite” shi li mondjila? (Omayeletumbulo 14:12; Jeremia 10:23, 24; 17:9)

Ngeenge katu shii kutya Ombibeli otai yandje omayele elipi shi na sha noshinima shonhumba, otu na okuninga shike? (Omayeletumbulo 2:3-5; 2 Timoteus 3:16, 17)

(3) Atusheni ohatu mono omauwa moprograma imwe yoku tu palula pamhepo. “Ovana voye aveshe tava ka kala va longwa kOmwene.” (Jesaja 54:13) “Tu filafaneni oshisho fye tu twafane omukumo mohole nomoilonga iwa. Tu ha efe [po okwoongala pamwe, OB-1986], ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo [lehanauno] tali ehene popepi.”—Ovaheberi 10:24, 25.

Omauwa elipi haa monika kwaavo hava longifa pauyadi elongekido laJehova loku tu palula pamhepo? (Jesaja 65:13, 14)

(4) Jesus Kristus oye Omuwiliki wetu ndele hamunhu kombada yedu. “Inamu itavela nande mu ifanwe rabbi, osheshi omuhongi weni oumwe, ndele onye amushe ovamwainafana. Ndele inamu ifana nande olyelye wokombada yedu xo, osheshi onye omu na xo umwe aeke, ou womeulu. Ndele inamu itavela mu ifanwe [omuwiliki], osheshi [omuwiliki] weni umwe aeke, oye Kristus.”—Mateus 23:8-10, yelekanifa OB-1954.

Mbela otu na okwiitavela kutya otu dule vamwe? (Ovaroma 3:23, 24; 12:3)

(5) Ohatu tale ko epangelo lOuhamba waKalunga kutya olo ashike eteelelo lovanhu aveshe. “Mu nokwiilikana ngaha: Tate yetu ou u li meulu! Edina loye nali yapulwe; ouhamba woye nau uye; ehalo loye nali wanifwe kombada yedu yo ngaashi meulu. Ndelenee kongeni tete ouhamba waKalunga nouyuki waye.”—Mateus 6:9, 10, 33.

‘Okukonga tete ouhamba’ ohaku kwafele ngahelipi okwaamena oukumwe wetu? (Mika 4:3; 1 Johannes 3:10-12)

(6) Omhepo iyapuki ohai imike omaukwatya oo a fimanenena movalongeli vaJehova okukaleka po oukumwe wopaKriste. “Oiimati yOmhepo oyo ei: ohole, ehafo, ombili, onheni, oukaume, ouwa, oudiinini, engungumano, elididimiko.”—Ovagalati 5:22.

Oshike tu na okuninga opo omhepo yaKalunga i imike oiimati yayo mufye? (Oilonga 5:32)

Okukala nomhepo yaKalunga ohaku nwefa mo ngahelipi ekwatafano letu nOvakriste vakwetu? (Johannes 13:35; 1 Johannes 4:8, 20, 21)

(7) Ovalongelikalunga vashili aveshe ohava kufa ombinga mokuudifa onghundana iwa yOuhamba. “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.”—Mateus 24:14.

Oshike shi na oku tu linyengifa tu kale twa hala okukufa ombinga iyadi moilonga yokuudifa? (Mateus 22:37-39; Ovaroma 10:10)

11. Ngeenge hatu tula moilonga omaushili Ombibeli mokukalamwenyo kwetu, oshidjemo otashi ka kala shike?

¹¹ Okulongela Jehova moukumwe otashi tu ehenifa kuye notashi shi ningi tashi shiiva okuhafela eendafano novaitaveli vakwetu tali mbilipaleke. Epsalme 133:1 otali ti: “Taleni, oshiwa nosha wapala shi fike peni, ovamwatate ngenge tava kala kumwe nombili.” Itashi mbilipaleke tuu okudja mo mounyuni wohole yokulihola mwene, woluhaelo nosho yo welongifo leenghono ndele hatu ongala naavo ve hole shili Jehova nohava dulika keemhango daye!

Henuka omanwefemo oo haa eta etukauko

12. Omolwashike tu na okuhenuka omhepo yemanguluko?

¹² Opo tu ha nyone po oukumwe wetu womounyuni aushe u na ondilo, otu na okuhenuka omanwefemo oo haa eta etukauko. Limwe lomuo olo omhepo yemanguluko yokumanguluka ko kuKalunga nosho yo keemhango daye. Jehova ohe tu kwafele tu i henuke mokunyaneka pomutenya odjo yayo, Satana Ondiaboli. (2 Ovakorinto 4:4; Ehololo 12:9) Satana oye a nwefa mo Adam naEva opo ve lipwililikile osho Kalunga a ti, nova tokole osho shi li omhinge nehalo laKalunga. Oshidjemo, oshe va etela oshiponga nosho yo fye. (Genesis 3:1-6, 17-19) Ounyuni ou owa dingililwa komhepo yemanguluko lokumanguluka ko kuKalunga nosho yo keemhango daye. Onghee hano, otu na okukondjifa omhepo oyo mufye.

13. Oshike tashi ka ulika kutya ohatu lilongekida shili oku ka kala mounyuni mupe waKalunga wouyuki?

¹³ Pashihopaenenwa, diladila keudaneko laJehova likumwifi lokupingena po ounyuni wopaife woukolokoshi neulu lipe nosho yo nedu lipe omo “tamu ka kala ouyuki.” (2 Petrus 3:13) Mbela osho kashi na oku tu linyengifa tu lilongekide tu ka kale po pefimbo olo eshi ouyuki tau ka kala po? Osho otashi tu pula okudulika komayele Ombibeli a yukilila, oo taa ti: “Inamu kala nokuhola ounyuni nakeshe eshi shi li mo. Ngenge pe na ou e hole ounyuni, ohole yaTate kai mo muye.” (1 Johannes 2:15) Onghee hano, ohatu henuka omhepo younyuni ou—oikala yao yemanguluko, okukala kwao u na ko na sha unene nokuliholamwene, oluhaelo nosho yo elongifo leenghono lao. Ohatu pwilikine kuJehova nohatu dulika kuye okudja komutima, kashi na nee mbudi kutya eamo lombelela yetu inai wanenena olilipi. Okukalamwenyo kwetu akushe otaku yandje oumbangi kutya okudiladila kwetu nosho yo omalinyengotomheno etu okwa yukifwa kokulonga ehalo laKalunga.—Epsalme 40:9.

14. (a) Omolwashike sha fimana okulongifa omhito paife yokulihonga eendjila daJehova noku di shikula mokukalamwenyo kwetu? (b) Omishangwa odo da yandjwa mokatendo otadi ti shike kufye?

¹⁴ Eshi eufwafimbo laJehova tali ke uya opo a hanaune po onghalelo ei yoinima youkolokoshi nosho yo aveshe ovo va hokwa okukalamwenyo kwayo, ita ka kwatakwata. Ita ka undulila komesho efimbo olo ile a lundulule omifikamhango daye opo a wapalele ovo tava kondjifa natango okukanyatela kounyuni ofimbo tave lihongo nokuwanifa po ehalo laKalunga, ndele hanomutima aushe. Paife olo efimbo lokukatuka onghatu! (Lukas 13:23, 24; 17:32; 21:34-36) Onghee hano, otashi hafifa omutima okumona ongudu inene tai longifa omhito oyo i na ondilo, tai lalakanene nomutima aushe ehongo olo Jehova ta yandje okupitila mEendjovo daye nosho yo mehangano laye nokweenda moukumwe mondjila yaye oyo tai twala mounyuni mupe. Mokulihonga shihapu kombinga yaJehova, omo ngoo ohole yetu yoku mu hola tai ningi yomoule nohatu kala twa hala oku mu longela.

Eenghundafana dokweendulula

• Elalakano laJehova li na sha nelongelokalunga olilipi?

• Konima eshi twe lihonga omahongo Ombibeli opehovelo, otwa pumbwa okulalakanena nomutima aushe exumokomesho lilipi?

• Oshike hatu dulu okuninga po pauhandimwe opo tu kale hatu longele Jehova moukumwe novalongelikalunga vakwetu?

[Efano pepandja 4]

“Ovananheni vo otava ka fyuulula edu, ndee tava ka hafela ombili inene”