Oukumwe ohau didilikifa mo elongelokalunga lashili
‘Ame ohandi va eta kumwe ngaashi eedi moshiunda.’ — MIKA 2:12.
1. Eshito otali holola ngahelipi ounongo waKalunga?
OMUPSALME umwe okwa ti: “Omwene, oilonga yoye oi fike peni! Aishe owe i shita nounongo, edu oli yadi oishitwa yoye.” (Eps. 104:24) Ounongo waKalunga ou liwetikile moinima yokombada yedu omamiliyona oyo hai kala ya pumbwafana noi na onghalamwenyo ya kitakana neenghono, ngaashi omaludi oimeno, oupuka, oinamwenyo nosho yo eembakiteli. Kakele kaasho, olutu lomunhu oli na oitukulwa omayovi, ngaashi eesele dinininini nosho yo oitukulwa ikwao inene, oyo hai longele kumwe aishe opo omunhu a kale e na olutu le lixwa po noku na oukolele.
2. Ngaashi sha ulikwa pepandja eti-13, omolwashike oukumwe wOvakriste wa li tau monika wa fa oshikumwifilonga?
2 Jehova okwa shita ovanhu va kale tava kwafelafana. Okwe va shita ve na omaholokepo nomaukwatya a yoolokafana nosho yo omaunghulungu e lili noku lili. Natango, ovanhu votete okwe va shita ve na omaukwatya a fa aye, oo a li taa dulu oku va kwafela va kale tava longele kumwe nokukwafelafana. (Gen. 1:27; 2:18) Ndele nande ongaho, ovanhu vahapu kunena ova tukuka ko kuKalunga noitava dulu vali okukala moukumwe. (1 Joh. 5:19) Onghee hano, oukumwe oo wa li mokati keongalo lopaKriste lomefelemudo lotete owa li wa fa oshikumwifilonga molwaashi meongalo omo omwa li ovanhu ve lili noku lili, ngaashi ovapika Ovaefeso, ovakainhu ovanamadina Ovagreka, ovalumenhu ovahongwanhu Ovajuda nosho yo ovanhu ovo va li nale hava longele oikalunga. — Oil. 13:1; 17:4; 1 Tes. 1:9; 1 Tim. 6:1.
3. Ombibeli oya ti shike kombinga youkumwe wOvakriste, noshike hatu ka kundafana moshitukulwa eshi?
3 Elongelokalunga lashili ohali kwafele ovanhu va kale tava longele kumwe ngaashi oilyo yolutu hai longele kumwe. (Lesha 1 Ovakorinto 12:12, 13.) Oinima imwe oyo hatu ka kundafana moshitukulwa eshi ongaashi: Elongelokalunga lashili ohali hanganifa ovanhu ngahelipi? Omolwashike Jehova oye aeke ta dulu okuhanganifa ovanhu omamiliyona okudja moiwana aishe? Jehova ohe tu kwafele tu finde oinima ilipi oyo tai dulu okunyona po oukumwe wetu? Ovakriste vashili ova yooloka ko ngahelipi kOukwakriste ngeenge tashi uya pokukala moukumwe?
Elongelokalunga lashili ohali hanganifa ovanhu ngahelipi?
4. Elongelokalunga lashili ohali hanganifa ovanhu ngahelipi?
4 Ovalongelikalunga vashili ova dimina kutya Jehova oye e na oufemba wokukala Omunamapangelo aeshe meshito alishe, molwaashi oye a shita oinima aishe. (Eh. 4:11) Onghee hano, nonande Ovakriste vashili ove li momaulikumwe ovanhu ve lili noku lili nohava kala meenghalo da yoolokafana, aveshe ohava dulika keemhango daKalunga nohava kala metwokumwe nomafinamhango Ombibeli a faafana. Ovalongelikalunga vashili aveshe ohava fimaneke Jehova tava ti “Tate.” (Isa. 64:8; Matt. 6:9) Onghee hano, aveshe ove li ovamwainafana vopamhepo nohava hafele oukumwe oo wa popiwa komupsalme umwe, oo a ti: “Taleni, oshiwa nosha wapala shi fike peni, ovamwatate ngenge tava kala kumwe nombili”! — Eps. 133:1.
5. Oukwatya ulipi hau xumifa komesho oukumwe mokati kovalongelikalunga vashili?
5 Nonande Ovakriste vashili inava wanenena, ohava longele Kalunga moukumwe molwaashi ove li honga okukala ve holafane. Jehova oye aeke ha hongo Ovakriste va kale ve na ohole yashili. (Lesha 1 Johannes 4:7, 8.) Eendjovo daKalunga oda ti: “Djaleni efilonghenda lomomutima, ombili, elininipiko, engungumano noutalanheni, lididimikilafaneni, diminafaneni po omanyono, ngenge mwa ningafana nomukweni, ngaashi [Jehova, NW] e mu dimina po, osho nanye yo mu ninge; ndele kombada yaaishe djaleni ohole, oyo oshimangifo sha wana shoku mu manga kumwe.” (Kol. 3:12-14) Ohole oyo i li oshimangifo sha wana shoku tu mangela kumwe, oyo unene hai didilikifa mo Ovakriste vashili. Mbela ino didilika paumwene kutya oukumwe ohau yoolola mo ovalongelikalunga vashili? — Joh. 13:35.
6. Ongahelipi eteelelo lOuhamba hali tu kwafele tu kale moukumwe?
6 Ovalongelikalunga vashili ova hangana yo molwaashi ova itavela kutya Ouhamba waKalunga oo auke ekandulepo lomaupyakadi ovanhu. Ove shii kutya mafiku Ouhamba waKalunga otau ka pingena po omapangelo opanhu notau ka etela ovanhu ovaduliki omanangeko noupuna nombili yashili tai kalelele. (Jes. 11:4-9; Dan. 2:44) Onghee hano, Ovakriste ohava dulika keendjovo odo Jesus a li a lombwela ovashikuli vaye, tadi ti: “Vo kave fi vomounyuni, ngaashi Ame ndi he fi womounyuni.” (Joh. 17:16) Ovakriste vashili ihava kufa ombinga momalipumomumwe ounyuni; nomolwaasho ohava kala moukumwe nokuli nonande ovanhu ovo ve va dingilila otava lwifafana.
Ovakriste ohava mono ehongo lopamhepo okudja kodjo imwe aike
7, 8. Ehongo lopaMbibeli ohali xumifa komesho ngahelipi oukumwe wetu?
7 Ovakriste aveshe vomefelemudo lotete ova li moukumwe molwaashi ova li hava mono etwomukumo okudja kodjo imwe. Ova li va didilika kutya Jesus okwa li ta hongo eongalo noku li wilika okupitila molutuwiliki, olo la li la fikama po movayapostoli nosho yo movakulunhu vomuJerusalem. Ovalumenhu ovo ovatilikalunga ova li va kanghameka omatokolo avo kEendjovo daKalunga nova li ve na ovapashukili ovaendi ovo va li hava twala komaongalo omoilongo ihapu omatokolo oo a li a ningwa. Ombibeli oya popya kombinga yavamwe vomovapashukili ovo, ya ti: “Mokweendaaenda kwavo moilando noilando, ove va pa oipango ei ya ufwa kovayapostoli nokovakulunhu vomuJerusalem, ve i diinine yo.” — Oil. 15:6, 19-22; 16:4.
8 Sha faafana, Olutuwiliki olo la fikama po mOvakriste ovavaekwa ohali xumifa komesho oukumwe meongalo lomounyuni aushe nokunena. Olutuwiliki ohali nyanyangida oileshomwa momalaka mahapu oyo hai pameke omaongalo pamhepo. Eendja odo dopamhepo ohadi kala da kanghamena kEendjovo daKalunga. Onghee hano, ehongo la tya ngaho ihali di kovanhu, ndele ohali di kuJehova. — Jes. 54:13.
9. Ongahelipi oilonga oyo twa pewa kuKalunga hai tu kwafele tu kale moukumwe?
9 Ovapashukili Ovakriste ohava xumifa yo komesho oukumwe eshi tava kwatele komesho oilonga yokuudifa. Omhepo youmwainafana oyo ya hanganifa ovalongelikalunga oi na eenghono i dule kokule omhepo oyo hai hanganifa ovanhu ashike ngahenya mounyuni. Eongalo lopaKriste ola totwa po nelalakano lokufimanekifa Jehova, okulonga oilonga yokuudifa onghundana iwa, okuninga ovanhu ovahongwa nosho yo okutunga eongalo, ndele inali totwa po nelalakano lokwoongala ashike ngahenya. (Rom. 1:11, 12; 1 Tes. 5:11; Heb. 10:24, 25) Nomolwaasho omuyapostoli Paulus okwa li a lombwela Ovakriste vakwao a ti: ‘Kaleni mu li momhepo imwe, nye mu li omukoo umwe mokukondjela eitavelo levangeli pamwe naame.’ — Fil. 1:27.
10. Tu li oshiwana shaKalunga, otwa hangana meenghedi dimwe dilipi?
10 Tu li oshiwana shaJehova, otwa hangana molwaashi otwa tambula ko ounamapangelo waye, otu hole ovamwatate, otu na eteelelo mOuhamba notwa fimaneka ovo Jehova ta longifa okukwatela komesho. Jehova ohe tu kwafele tu finde oikala yonhumba oyo tai dulu okunyona po oukumwe wetu omolwokuhawanenena. — Rom. 12:2.
Nghee hatu dulu okufinda ounhwa nondubo
11. Omolwashike ounhwa hau eta etukauko, nongahelipi Jehova he tu kwafele tu finde oukwatya wa tya ngaho?
11 Ounhwa ohau etifa etukauko mokati kovanhu. Omunhu oo e na ounhwa ohe litale ko a fimana e dule vakwao, naluhapu oha kala a hafa ngeenge te litade. Ashike oikala ya tya ngaho luhapu ohai imbi ovanhu va kale moukumwe. Ngeenge vamwe ve udite omunhu te litade oshi na oupu va kwatwe kondubo. Omuhongwa Jakob okwa popya oshili a ti: “Elitangelo alishe la tya ngaha olii.” (Jak. 4:16) Okuungaunga navamwe nodino kaku fi oshinima shopahole. Shididilikwedi, Jehova okwa tula po oshihopaenenwa shelininipiko molwaashi oha ungaunga novanhu inava wanenena. David okwa ti: ‘Kalunga elininipiko loye la nenepeka nge.’ (2 Sam. 22:36, yelekanifa no-NW.) Eendjovo daKalunga otadi tu hongo okukala hatu tomhafana pandunge opo tu finde ounhwa. Paulus okwa li a nwefwa mo a pule ta ti: “Olyelye te ku tula komesho? Noshikwashike eshi u shi kwete, ino shi pewa? Ndele ngenge owe shi pewa, oshike to litange wa fa ino shi pewa?” — 1 Kor. 4:7.
12, 13. (a) Omolwashike shipu okutwila vamwe ondubo? (b) Okukala hatu tale ko vamwe ngaashi Jehova he va tale ko ohaku etifa shike?
12 Ondubo nayo luhapu ohai imbi ovanhu va kale moukumwe. Molwaashi inatu wanenena, atusheni ohatu dulu okukwatwa ‘kondubo,’ nokuli naavo va kala Ovakriste oule wefimbo lile otava dulu okutwila vamwe ondubo omafimbo amwe omolweenghalo davo, oiniwe, omaufembanghenda ile okudula kwavo. (Jak. 4:5, NW) Pashihopaenenwa, omumwatate umwe oo e na oukwaneumbo otashi dulika a kale a twila ondubo omulongi wefimbo li yadi eshi e na omaufembanghenda onhumba, ofimbo ina didilika kutya omulongi wefimbo li yadi otashi dulika ngoo naye e mu twila ondubo molwaashi e na ounona. Ongahelipi hatu dulu okukondjifa ondubo iha nyone po oukumwe wetu?
13 Opo tu henuke ondubo, natu dimbulukweni kutya Ombibeli oya li ya faafanifa oilyo yovavaekwa yeongalo lopaKriste noilyo yolutu lomunhu. (Lesha 1 Ovakorinto 12:14-18.) Pashihopaenenwa, nonande otashi dulika omesho oye haa longo oilonga ya fimana e dule omutima, mbela oilyo aishe oyo inai fimana? Sha faafana, Jehova okwa lenga oilyo aishe yeongalo, nokuli nonande imwe omafimbo amwe ohai dana onghandangala ya fimana i dule ikwao. Onghee hano, natu kale hatu tale ko ovamwatate ngaashi Jehova he va tale ko. Ponhele yokukala hatu twile vamwe ondubo, ohatu dulu oku va ulikila pauhandimwe kutya otu na ko nasha navo notu na ohokwe muvo. Ngeenge otwa ningi ngaho, otapa ka kala eyooloko pokati kOvakriste vashili naavo veengeleka dOukwakriste.
Oukwakriste owa tukauka
14, 15. Ovakriste ovashunimonima ova li va etifa ngahelipi etukauko?
14 Oukumwe wOvakriste vashili oudidilikwedi neenghono mokuyelekanifa nomashilafano oo e li meengeleka dOukwakriste. Mefelemudo etine, oushunimonima wOukwakriste owa li wa tandavela neenghono, nomupangeli umwe omupaani Omuroma okwa li te u kwatele komesho noku u xumifa komesho. Okudja opo, omauhamba mahapu oo a li oshitukulwa shaRoma okwa li e litukula ko kuRoma ndele taa toto po eengeleka dao.
15 Omauhamba mahapu omwaao okwa kala taa lwifafana oule womafelemido. Mefelemudo eti-17 nosho yo eti-18, Ovabritania, Ovafransa nosho yo ovanhu vokOilongo yaHangana ova li tava xumifa komesho omhepo yokukala omudiinini kEpangelo, nomhepo youkwashiwana ya tya ngaho oya li ya talwa ko i li ngaashi elongelokalunga. Mefelemudo eti-19 nosho yo eti-20, omhepo youkwashiwana oya li ya hovela okudana onghandangala momadiladilo ovanhu vahapu. Hauxuuninwa, eengeleka dOukwakriste oda tukaulwa moimhanga ihapu, naihapu yomuyo ohai yambidida omhepo youkwashiwana. Oilyo yeengeleka odo oya kala nokuli tai lwifafana novaitaveli vakwao vomoiwana imwe. Kunena, Oukwakriste owa tukaulwa koimhanga yomalongelokalunga nosho yo komhepo youkwashiwana.
16. Oinima imwe ilipi ya etifa etukauko mOukwakriste?
16 Mefelemudo eti-20, oimhanga omafele yOukwakriste oya li ya unganeka oshikonga shopalongelokalunga shi na sha noku i hanganifa opo i xumife komesho oukumwe. Ndele konima yomido omilongo deenghendabala da tya ngaho, eengeleka ashike dinini de limbwanga mumwe, ndele ovanhu ovo hava i keengeleka odo ihava tu kumwe moinima ngaashi ehongo loevolusi, okulikufa omadimo, oushenge nosho yo okuyapulilwa oufita kwovakainhu. Moitukulwa imwe yOukwakriste, ovawiliki veengeleka ohava hekula omahongo amwe oo a li a etifa etukauko tava kendabala okuhanganifa ovanhu va dja moimhanga i lili noku lili. Ndele nande ongaho, okuhekula omahongo kwa tya ngaho okwa nghundipaleka ashike eitavelo lovanhu noinaku hanganifa Oukwakriste.
Elongelokalunga lashili ola finda omhepo youkwashiwana
17. Ombibeli oya xunganeka ngahelipi kutya elongelokalunga lashili otali ka hanganifa ovanhu “pexulilo lomafiku”?
17 Nonande ovanhu vahapu ova tukauka neenghono kunena, oukumwe otau didilikifa mo natango ovalongelikalunga vashili. Omuprofeti waKalunga Mika okwa xunganeka a ti: ‘Ame ohandi va eta kumwe ngaashi eedi moshiunda.’ (Mika 2:12) Mika okwa xunganeka kutya elongelokalunga lashili otali ka kala li dule kokule omalongelokalunga aeshe, kutya nee ohaa longele oikalunga ile oilongo i li oikalunga. Okwa ti: “Pexulilo lomafiku omhunda yotembeli yOmwene otai ka kala ya pamenena koxulo yeemhunda, ndele tai lepala i dule oikulundudu aishe. Ndele oko taku ka tondokela oiwana. Osheshi oiwana aishe tai ka kala nokweenda, keshe shimwe, medina laKalunga kasho, ndelenee fye ohatu ka kala nokweenda medina lOmwene Kalunga ketu.” — Mika 4:1, 5.
18. Elongelokalunga lashili ohali kwafele ovanhu va ninge omalunduluko elipi?
18 Mika okwa popya yo kutya elongelokalunga lashili otali ka hanganifa naavo va li ve tondafane. Mika okwa ti: “Oiwana ihapu tai ka ya, ndee tai ti: Ileni, fye tu ka londeni komhunda yOmwene nokotembeli yaKalunga kaJakob, opo Ye e tu longe omalila aye, fye tu ende meendjila daye. . . . Ndele tava ka hambula omaongamukonda avo omatemo nomaonga avo oikashulifo. Oshiwana itashi yelulile vali eongamukonda oshiwana shikwao, ndele itave ke lilonga vali oukwaita.” (Mika 4:2, 3) Ovanhu ovo tava efa po okulongela oikalunga ile omhepo youkwashiwana ndele tava tambula ko elongelokalunga lashili, otava ka hafela okukala oshitukulwa shoumwainafana wa hangana womounyuni aushe. Kalunga ote va hongo eendjila daye dohole.
19. Okuhanganifwa kwovanhu omamiliyona melongelokalunga lashili otaku yandje oumbangi washike?
19 Oukumwe wOvakriste vashili mounyuni aushe kunena owe likalekelwa notau yandje oumbangi wa yela kutya Jehova ota twikile natango okuwilika oshiwana shaye okupitila momhepo yaye. Oohandimwe otava hanganifwa kunena okudja moiwana aishe monghedi oyo inai monika nande onale mondjokonona yovanhu. Osho oshi li ewanifo lididilikwedi lEhololo 7:9, 14, notashi ulike kutya mafiku ovaengeli vaKalunga otava ka mangulula “eemhepo” odo tadi ka hanauna po onghalelo ei yoinima youkolokoshi. (Lesha Ehololo 7:1-4, 9, 10, 14.) Kau fi tuu oufembanghenda okukala twa hangana tu li oumwainafana womounyuni aushe! Ndele mbela ongahelipi keshe umwe ta dulu okuxumifa komesho oukumwe wa tya ngaho? Osho otashi ka kundafanwa moshitukulwa tashi landula.
Oto nyamukula ngahelipi?
• Elongelokalunga lashili ohali hanganifa ovanhu ngahelipi?
• Ongahelipi hatu dulu okuhenuka ondubo iha nyone po oukumwe wetu?
• Omolwashike omhepo youkwashiwana inai tukaula ovalongelikalunga vashili?
[Efano pepandja 16]
Ovakriste vomefelemudo lotete ova li va dja momaputuko e lili noku lili
[Omafano pepandja 18]
Ongahelipi okukufa ombinga kwoye moilonga yokutunga Omalupale Ouhamba taku xumifa komesho oukumwe?