Oshike tashi ke tu ningilwa ngeenge otwa fi?

OTASHI dulika u shi shii nawa kutya kunena ovanhu ohava kulupa, ohava ehama nohava fi. Omafimbo amwe, ounona vamwe navo ohava fi nokuli. Mbela ou na okukala wa tila efyo ile ovanhu ovo va fya? —  Mbela ou shi shii kutya oshike tashi ke tu ningilwa ngeenge otwa fi?  — 

Kunena, kaku na omunhu oo a li a fya ndele ta nyumuka opo e tu lombwele kutya oshike hashi ningwa po ngeenge omunhu a fya. Ndele opa li omulumenhu umwe a li a nyumuka eshi Jesus, Omuhongi Munene, a li kombada yedu. Ohatu dulu okulihonga kombinga yaasho hashi ningilwa ovanhu ovo va fya ngeenge otwa lesha kombinga yomulumenhu oo. Omulumenhu oo okwa li kaume kaJesus, nokwa li ha di muBetania, oshilando shinini osho sha li popepi naJerusalem. Omulumenhu oo edina laye oLasarus, nokwa li e na ovamwainakadona vavali, Marta naMaria. Natu ka tale osho Ombibeli tai hokolola shi na sha naasho sha li sha ningwa po.

Efiku limwe Lasarus okwa li ta vele unene, ndele pefimbo opo Jesus okwa li e li kokule. Onghee hano, Marta naMaria ova li va tuma omutumwa a ka lombwele Jesus kutya omumwaina wavo Lasarus ota vele. Ova li va lombwela Jesus molwaashi ova li ve shii kutya Jesus ota dulu okuuya ndele ta velula omumwaina wavo. Ashike Jesus ke fi ondokotola, ndele okwa pewa eenghono kuKalunga opo a dule okuvelula omikifi adishe. — Mateus 15:30, 31.

Lasarus okwa li ta vele neenghono ndele ta fi, fimbo nokuli Jesus ina ya ko kuye. Ndele Jesus okwa li a lombwela ovahongwa vaye kutya Lasarus okwa kofa nota i e ke mu pendule. Ovahongwa kava li ve udite ko kutya Jesus okwa li a hala okutya shike eshi a ti kutya Lasarus okwa kofa. Onghee hano, Jesus okwa li e va yelifila a ti: “Lasarus okwa fya.” Mbela osho otashi ulike shike shi na sha nefyo? —  Otashi ulike kutya efyo ola fa omunhu a kofa eemhofi didjuu. Efyo ola fa omunhu a kofa eemhofi didjuu neenghono noita dulu okutwa ondjodi yasha nokuli.

Konima yefimbo Jesus okwe ke uya keumbo looMarta naMaria. Ookaume kaMarta, Maria naLasarus ova li ve uya okuhekeleka ovamwainakadona vaLasarus oo a fya. Eshi Marta a li a uda kutya Jesus oku li pokufika, okwa li a ya e ke mu shakeneke. Maria naye okwa li yo a ya diva kuJesus. Maria okwa li a nyika oluhodi neenghono nokwa li ta lili, ndele ta wile peemhadi daJesus. Ookaume kavo vamwe ovo va li tava landula Maria navo ova li yo tava lili.

Omuhongi Munene okwa li e va pula kutya openi va paka Lasarus, nomolwaasho ovanhu ova li va twala Jesus kekololo oko va li va paka Lasarus. Eshi Jesus a li a mona ovanhu aveshe tava lili, naye okwa li a hovela okulila. Jesus okwa li e shi shii kutya ohashi kala shinyikifa oluhodi ngeenge omunhu a filwa omuholike waye.

Jesus okwa li a lombwela ovanhu va ‘kufe ko emanya’ olo la li la idilwa poshivelo shekololo omo mwa li mwa pakwa Lasarus. Mbela ovanhu ova li ngoo ve likufa ko? —  Marta okwa li ta diladila kutya inali pumbwa okukufwa ko, eshi a ti: “Omwene, ye okwa nyika nale, osheshi nena okwa ninga omafiku ane.”

Ndele Jesus okwa li a pula Marta a ti: ‘Inandi ku lombwela kutya ngeenge to itavele oto mono efimano laKalunga?’ Jesus okwa li a hala okutya Marta ota ka mona oshinima osho tashi ka fimanekifa Kalunga. Mbela Jesus okwa li ta ka ninga po shike? Eshi ovanhu va li va kufa ko emanya, Jesus okwa ilikana mokule kuJehova, ndele ta ifana mokule ta ti: “ Lasarus, dja mo!” Mbela Lasarus okwa li ngoo ta ka dja mo? Okwa li ngoo ta dulu okudja mo?  — 

Mbela oto dulu okupendula omunhu oo a kofa? —  Heeno, ngeenge owa ifana mokule, ota penduka mo. Ndele mbela oto dulu ngoo okupendula omunhu oo a kofa mefyo? —  Hasho nandenande! Kashi na nee mbudi kutya ou ifane mokule shi fike peni, omunhu oo a fya ite ke ku uda. Fye naave, nosho yo ovanhu aveshe kombada yedu kunena, itatu dulu okuninga po sha opo tu pendule ovanhu ovo va fya.

Ndele Jesus ine tu fa, molwaashi okwa pewa eenghono de likalekelwa kuKalunga. Onghee hano, eshi Jesus a li a ifana Lasarus, opa li pa ningwa oshinima shikumwifi. Lasarus oo a li a ninga omafiku ane a fya okwa li a dja mo mekololo e na omwenyo. Okwa li ta fuda, ta ende nota dulu vali okupopya. Jesus okwa li shili a nyumuna Lasarus koufi! — Johannes 11:1-44.

Paife diladila kombinga yoshiningwanima osho: Oshike sha li sha ningilwa Lasarus eshi a li a fya? Mbela opa li pe na oshitukulwa shaye shimwe sha fiya po olutu ndele tashi ka kala nomwenyo ponhele imwe i lili? Mbela omwenyo waLasarus owa li wa ya meulu? Mbela okwa li pamwe naKalunga nosho yo novaengeli vayapuki e na omwenyo oule womafiku ane?  — 

Hasho nandenande, Lasarus ka li a ningilwa oinima ya tya ngaho. Dimbuluka kutya Jesus okwa li a popya kutya Lasarus okwa li a kofa. Oho kala monghalo ya tya ngahelipi ngeenge wa kofa? Ngeenge wa kofa eemhofi doshitula iho kala u shii osho tashi ningwa po pomudingonoko woye, hasho mbela? —  Ngeenge wa penduka, iho kala u shi shii kutya owa kala wa kofa oule wefimbo li fike peni ngeenge ino tala kovili.

Ovanhu ovo va fya navo ohava kala va fa omunhu oo a kofa eemhofi doshitula. Ihava kala ve shii osho tashi ningwa po. Ihava kala ve na omaliudo noitava dulu okuninga sha. Lasarus naye okwa li monghalo ya tya ngaho eshi a li a fya. Efyo ola fa omunhu a kofa eemhofi didjuu omo iha dimbuluka nande osha. Ombibeli oya ti: ‘Oonakufya inava shiiva nande sha.’ — Omuudifi 9:5, 10.

Diladila vali kwaashi: Ngeno Lasarus okwa li a ya meulu oule womafiku oo ane, mbela ngeno ina popya kombinga yasho? —  Mbela ngeno okwa ile meulu, ngeno Jesus okwe mu ifana mo ngoo a alukile kombada yedu a dje monhele oyo iwaiwa? —  Ngeno ine shi ninga.

Ashike ovanhu vahapu ohava ti kutya otu na omwenyo, nonokutya omwenyo oo ohau twikile okukala po konima eshi olutu la fya. Ovanhu va tya ngaho ohava ti kutya omwenyo waLasarus owa li ponhele yonhumba inau fya. Ndelenee Ombibeli hasho tai ti ngaho. Ombibeli oya ti kutya Kalunga okwa shita omunhu wotete, Adam, e li ‘Omwenyo u na omwenyo.’ Adam oye a li omwenyo. Ombibeli oya ti yo kutya eshi Adam a nyona, okwa fya. Kungaho, omwenyo oo wa li Adam owa fya, ndele tau shuna mondwi yedu omo wa dile. Ombibeli oya ti yo kutya oludalo laAdam alishe ola fyuulula oulunde nefyo. — Genesis 2:7; 3:17-19; Ovaroma 5:12.

Hano osha yela kutya ovanhu kave na omwenyo oo wa tukuka kumwe nolutu. Keshe umwe womufye oye omwenyo. Molwaashi ovanhu ova fyuulula oulunde komunhu wotete, Adam, Ombibeli oya ti kutya: “Omwenyo tau nyono u nokufya.” — Hesekiel 18:4.

Ovanhu vamwe ohava tila oonakufya. Ihava i popepi nomaendo molwaashi otava diladila kutya ovanhu ovo va fya ove na omwenyo oo hau tukauka kumwe nomalutu avo nonokutya otau dulu oku va etela oshiponga. Ndele mbela omunhu oo a fya ota dulu ngoo okweetela oshiponga ovanhu ovo ve na omwenyo? —  Hasho nandenande, ita dulu oku va etela oshiponga.

Ovanhu vamwe ova itavela nokuli kutya ovanhu ovo va fya otava dulu okwaaluka ve li eemhepo opo va talele po ovanhu ovo ve na omwenyo. Onghee hano, ohave va fiile oikulya. Ashike ovanhu ovo hava ningi ngaho inava itavela lela osho Kalunga a ti shi na sha novanhu ovo va fya. Ngeenge otwa itavela osho Kalunga a ti shi na sha novanhu ovo va fya, itatu ka kala twe va tila. Ngeenge otwa pandula shili Kalunga omolwomwenyo oo e tu pa, ohatu ke shi ulika mokukala hatu longo osho Kalunga a hokwa.

Ndele otashi dulika u lipule kutya: ‘Mbela Kalunga ota ka nyumuna ngoo ounona ovo va fya? Mbela okwa hala ngoo shili oku va nyumuna?’ Natu ka kundafane kombinga yaasho metukulwa tali landula.