Efyo halo exulilo lovanhu!

Betania okwa li okamukunda ke li eekilometa 3 lwaapo okudja kuJerusalem. (Johannes 11:18) Oivike inini manga Jesus ina fya omwa li mwa ningwa oshiningwanima shinyikifa oluhodi. Umwe womookaume kopofingo kaJesus, Lasarus, okwa li a hakukilwa koudu wa kwata moiti ndele ta fi.

Eshi Jesus a uda tete onghundana oyo, okwa li a lombwela ovahongwa vaye kutya Lasarus okwa kofa nonokutya okwa hala e ke mu pendule. (Johannes 11:11) Ovahongwa vaJesus kava li ve udite ko kutya okwa hala okutya shike, nomolwaasho a li e va lombwela monghedi ya yela a ti: “Lasarus okwa fya.” — Johannes 11:14.

Jesus okwa ka fika kuBetania konima yomafiku ane okudja eshi a pakwa, nokwa li ta kendabala okuhekeleka Marta, omumwaina wanakufya. Marta okwa ti: “Ngeno Ove wa li po, ngeno omumwameme ina fya.” (Johannes 11:17, 21) Jesus okwe mu nyamukula ta ti: “Aame enyumuko nomwenyo; ou ta itavele nge ota kala nomwenyo, nande na hangike a fya.” — Johannes 11:25.

Opo Jesus a ulike kutya eendjovo odo odoshili, okwa li a ya pombila ndele ta ingida ta ti: “Lasarus, dja mo!” (Johannes 11:43) Opo nee nakufya okwa dja mo, naasho osha li sha kumwifa ovo va li po.

Jesus okwa li a hangwa a nyumuna nale ovanhu vavali. Pomhito imwe okwa li a nyumuna okakadona kanini, okamonakadona kaJairus. Fimbo Jesus ine ka nyumuna, okwa li yo a popya kutya oka kofa. — Lukas 8:52.

Didilika kutya Jesus okwa li a faafanifa efyo laLasarus nolokamonakadona kaJairus neemhofi. Omolwashike mbela efaafanifo olo tali wapalele? Omunhu ngeenge okwa kofa iha kala e shii sha, nonghalo oyo oya yukila ko kediladilo lokutulumukwa po uhe udite ouyahame noito mono oixuna. (Omuudifi 9:5; tala oshimhungu shi na oshipalanyole, “Efyo ola fa eemhofi doshitula.”) Ovahongwa vaJesus vonale ova li ve udite ko nawa onghalo yashili yoonakufya. O-Encyclopedia of Religion and Ethics oya ti: “Kovashikuli vaJesus, efyo ola li la fa eemhofi nombila oyo onhele yokutulumukila . . . kwaavo va fila meitavelo.”a

Otashi tu hekeleke okushiiva kutya oonakufya ova kofa meembila noitava mono oixuna. Onghee hano, otu shii kutya oshike hashi ningwa po ngeenge otwa fi noinatu pumbwa vali okukala twa tila.

‘OMUNHU NGEENGE A FI, OTA KA NYUMUKA TUU VALI?’

Nonande ohashi kala shihafifa okutulumukwa po oufiku, mbela ope na ngoo oo ha kala a hala okukofa nakemutwaalele? Ngaashi Lasarus nokamonakadona kaJairus, oonakufya ovo va kofa meembila otava ka alukila ngoo vali momwenyo?

Tatekulululwa Job naye okwa li a pula epulo la fa olo eshi a li e li pokufya. Okwa pula ta ti: ‘Omunhu ngeenge a fi, ota ka nyumuka tuu vali?’ — Job 14:14.

Job okwa nyamukula epulo laye ta popi shi na sha naKalunga Omunaenghono adishe, a ti: “Ove ngeno u ifane, ame nohandi ku nyamukula, Ove ho djuulukwa oshilonga shomake oye.” (Job 14:15) Job okwa li e shii kutya Jehova okwa teelela nodjuulufi efiku olo ta ka nyumuna omupiya waYe omudiinini. Mbela Job okwa li ta diladila oshinima osho itashi dulu okuningwa? Hasho nandenande.

Eshi Jesus a nyumuna ovanhu osha li euliko la yela kutya Kalunga okwe mu pa eenghono dokufinda efyo. Ombibeli oya ti Jesus paife oku “neeshapi defyo.” (Ehololo 1:18) Onghee hano, Jesus ota ka yeulula eembila, ngaashi ashike a li a yandja elombwelo kutya emanya olo la li la idila pombila yaLasarus nali alangatifwe po.

Ombibeli oya popya kombinga yeudaneko lenyumuko lwoikando ihapu. Omweengeli umwe okwa li a shilipaleka omuprofeti Daniel ta ti: ‘Oto ka tulumukwa, ndele to ka nyumukila oshipewa shoye pexulilo lomafiku.’ (Daniel 12:13) Jesus okwa li a lombwela Ovasadukai, ovawiliki Ovajuda ovo va li inava itavela meudaneko lenyumuko, a ti: “Onye mwa puka, osheshi inamu shiiva omishangwa neenghono daKalunga.” (Mateus 22:23, 29) Omuyapostoli Paulus okwa ti: ‘Ondi neteelelo olo lomuKalunga, nokutya, otaku ka kala enyumuko lovayuki nolovalunde.’ — Oilonga 24:15.

OONAKUFYA OTAVA KA NYUMUNWA NAINI?

Enyumuko lovayuki nolovalunde otali ka ningwa naini? Omweengeli okwa li a lombwela omulumenhu omuyuki Daniel kutya ota ka nyumunwa “pexulilo lomafiku.” Marta naye okwa li a itavela kutya omumwaina Lasarus ota ka “nyumuka menyumuko mefiku laxuuninwa.” — Johannes 11:24.

Ombibeli oya kwatakanifa ‘efiku olo laxuuninwa’ nepangelo lOuhamba waKristus. Paulus okwa shanga a ti: “Oye [Jesus] e nokupangela fiyo ota tula ovatondi vaye aveshe koshi yeemhadi daye. Omutondi wahauxuuninwa ou ta hanaunwa po oye efyo.” (1 Ovakorinto 15:25, 26) Olo olo etomheno la kola kutya omolwashike tu na okwiilikana Ouhamba waKalunga u uye nehalo laye li wanifwe kombada yedu.b

Ngaashi Job a li e shi shii nawa, Kalunga okwa hala a ka nyumune oonakufya. Ngeenge efiku olo ola fiki, efyo otali ka xulifwa po shili. Nokape na vali oo te ke lipula kutya, ‘Mbela efyo olo exulilo lovanhu?’